Washington DC: అమెరికా బ్యాంకింగ్ చరిత్రలోనే అతిపెద్ద వైఫల్యాలుగా నిలిచిన సిలికాన్ వ్యాలీ బ్యాంకు, సిగ్నేచర్ బ్యాంకు పతనాలు యావత్ ప్రపంచాన్ని ఆలోచనలో పడేశాయి. ఈ రెండు బ్యాంకులు మూతపడటం అనేది ఆర్థిక మాంద్యం రానుందనడానికి సూచనలుగా ఉన్నాయా? అని చాలా మంది ఆందోళన వ్యక్తం చేస్తున్నారు.
Silicon Valley Crisis Explaine: సిలికాన్ వ్యాలీ బ్యాంక్, సిగ్నేచర్ బ్యాంకులు వరుసగా వారం రోజుల్లోనే కుప్పకూలడం ప్రాంతీయ అమెరికా బ్యాంకుల్లో భారీ ఆర్థిక మాంద్యం భయాలను రేకెత్తించింది. ఈ వైఫల్యాలు అమెరికా బ్యాంకింగ్ చరిత్రలో అతిపెద్ద టాప్-3 పతనాలలో ఉన్నాయి. అంతకుముందు ప్రపంచ ఆర్థిక మాంద్యం క్రమంలో 2008 లో వాషింగ్టన్ మ్యూచువల్ పతనం ఇందులో అగ్రస్థానాన్ని ఆక్రమించింది. వాషింగ్టన్ మ్యూచువల్ పతనం ప్రపంచ ఆర్థిక మాంద్యానికి దారితీసింది.. ఇది దాదాపు రెండు సంవత్సరాలు కొనసాగింది. ఇప్పుడు అమెరికాలోని రెండు బ్యాంకుల పతనం యావత్ ప్రపంచాన్ని ఆలోచనలో పడేశాయి. ఈ రెండు బ్యాంకులు మూతపడటం అనేది ఆర్థిక మాంద్యం రానుందనడానికి సూచనలుగా ఉన్నాయా? అని చాలా మంది ఆందోళన వ్యక్తం చేస్తున్నారు. అసలు ఈ బ్యాంకులు మూత పడటానికి కారణాలు ఏంటీ..? సిలికాన్ వ్యాలీ సంక్షోభం ఎందుకొచ్చింది..?
సిలికాన్ వ్యాలీ బ్యాంక్...
1983 లో స్థాపించబడిన సిలికాన్ వ్యాలీ బ్యాంక్ అమెరికాలో 16 వ అతిపెద్ద బ్యాంకుగా గుర్తింపు ఉంది. ఈ బ్యాంకు తన పతనానికి ముందు అమెరికాలోని వెంచర్ సపోర్ట్ టెక్నాలజీ కంపెనీల్లో సగానికి పైగా సేవలు అందించేదిగా కొనసాగింది. ఇటీవలి సంవత్సరాలలో టెక్ పరిశ్రమ వేగవంతమైన వృద్ధి నుండి బ్యాంక్ ప్రయోజనం పొందింది. రుణాలతో సహా బ్యాంక్ ఆస్తులు 2019 చివరి నాటికి 71 బిలియన్ డాలర్ల నుండి 2022 మార్చి చివరి నాటికి 220 బిలియన్ డాలర్లకు అంటే దాదాపు మూడు రెట్లు పెరిగాయి.
సిలికాన్ వ్యాలీ బ్యాంకులో ఏం తప్పు జరిగింది?
సంక్షిప్తంగా చెప్పుకోవాలంటే సిలికాన్ వ్యాలీ బ్యాంక్ వద్ద డిపాజిటర్లకు చెల్లించడానికి తగినంత నగదు లేదు కాబట్టి కాలిఫోర్నియా రెగ్యులేటర్లు బ్యాంకును మూసివేశారు. బ్యాంకు సంపదను కూడబెట్టిన తర్వాత దాని పెట్టుబడి నిర్ణయాలతో బ్యాంకు సమస్యలను గుర్తించవచ్చు. వడ్డీ రేట్లు చాలా తక్కువగా ఉన్నప్పుడు ఎస్వీబీ తన డిపాజిట్లలో ఎక్కువ భాగం ప్రభుత్వ బాండ్లలో పెట్టుబడి పెట్టింది. బాండ్లను సురక్షిత పెట్టుబడిగా పరిగణించడంతో, ద్రవ్యోల్బణాన్ని చల్లబరచడానికి ఫెడరల్ రిజర్వ్ గత సంవత్సరం వడ్డీ రేట్లను పెంచడం ప్రారంభించే వరకు ఈ ఆలోచన బాగా పనిచేసింది. వడ్డీ రేట్లు పెరిగినప్పుడు బాండ్ల ధరలు తగ్గుతాయి. దీంతో ఖాతాదారుల ఉపసంహరణ అభ్యర్థనల క్రమంలో విలువ పడిపోయినప్పటికీ బ్యాంక్ తన పెట్టుబడులలో కొన్నింటిని విక్రయించవలసి వచ్చింది.
వీటిలో కొన్ని సెక్యూరిటీల విక్రయంతో 1.8 బిలియన్ డాలర్ల నష్టం వాటిల్లిందనీ, ఆ నష్టాన్ని పూడ్చుకునేందుకు నిధులు సమీకరించలేకపోయామని ఎస్వీబీ ఇటీవల తెలిపింది. ఈ ప్రకటనలు ఇన్వెస్టర్లలో భయాందోళనలు సృష్టించాయి. దీంతో దాని స్టాక్ 60 శాతం పడిపోయింది. మార్చి 10 న, కాలిఫోర్నియా రెగ్యులేటర్లు బ్యాంకును స్వాధీనం చేసుకున్నారు. అన్ని డిపాజిట్లకు ఫెడరల్ డిపాజిట్ ఇన్సూరెన్స్ కార్పొరేషన్ బాధ్యతను అప్పగించారు.
ఈ సంక్షోభాన్ని అమెరికా ప్రభుత్వం ఎలా ఎదుర్కొంటోంది..?
సిలికాన్ వ్యాలీ బ్యాంక్ డిపాజిట్లలో దాదాపు 175 బిలియన్ డాలర్లు ఇప్పుడు ఫెడరల్ డిపాజిట్ ఇన్సూరెన్స్ కార్పొరేషన్ లేదా ఎఫ్డిఐసి నియంత్రణలో ఉన్నాయి. ఎస్వీబీ ఆస్తులన్నింటినీ వేలానికి పెట్టారు. ఇటీవల ఈ బ్యాంకు యూకే విభాగాన్ని హెచ్ ఎస్ బీసీ కొనుగోలు చేసింది. ఫెడరల్ రిజర్వ్ కూడా ఎస్వీబీ పర్యవేక్షణను సమగ్రమైన, పారదర్శకమైన-వేగవంతమైన సమీక్ష కోసం ప్రణాళికలను ప్రకటించింది. ఏం జరిగిందో పూర్తి వివరాలు వెల్లడిస్తామని, ఈ రంగంపై నిబంధనలను కఠినతరం చేయాలని రెగ్యులేటర్లు, బ్యాంకింగ్ రెగ్యులేటర్లను కోరతామని అధ్యక్షుడు జో బైడెన్ హామీ ఇచ్చారు. విఫలమైన బ్యాంకు నష్టాలకు పన్ను చెల్లింపుదారుల డబ్బు బాధ్యత వహించదని బెయిలవుట్ ప్యాకేజీని ఆయన తోసిపుచ్చారు.
నిపుణులు ఆందోళన.. ఆర్థిక మాంద్యం భయాలు..
సిలికాన్ వ్యాలీ బ్యాంకు, సిగ్నేచర్ బ్యాంకులు వరుసగా కుప్పకూలడంపై బ్యాంకింగ్ నిపుణులు ఆందోళన వ్యక్తం చేస్తున్నారు. ఈ పతనం ప్రపంచవ్యాప్తంగా బ్యాంకింగ్ షేర్లను దెబ్బతీసిందని పేర్కొంటున్నారు. సమీప భవిష్యత్తులో మార్కెట్లు పతనం కొనసాగవచ్చని చెబుతున్నారు. "స్వల్పకాలంలో అన్ని మార్కెట్లు అస్థిరంగా ఉన్నాయని నేను అనుకుంటున్నాను. ఈ భయం సహేతుకమైనది. 2008 సంక్షోభం తరువాత ఇది అతిపెద్ద యూఎస్ బ్యాంక్ వైఫల్యం. కానీ ఇది ఎక్కువ కాలం కొనసాగుతుందని నేను అనుకోవడం లేదు" అని స్విట్జర్లాండ్ కు చెందిన అంతర్జాతీయ ఫిన్టెక్ ప్లాట్ ఫామ్ యూ హోడ్లర్ సహ వ్యవస్థాపకురాలు ఇలియా వోల్కోవ్ చెప్పారు. అయితే, సిలికాన్ వ్యాలీ బ్యాంకు పతనం ఇతర అమెరికా బ్యాంకులపై తీవ్ర ప్రభావం చూపుతుందని పేర్కొన్నారు. ప్రజల్లో ఆర్థిక మాంద్యం భయాందోళనను సైతం పెంచిందన్నారు.
