Monkeypox: మరో మహమ్మారి కానుందా?.. ప్రపంచ దేశాలకు విస్తరిస్తున్న మంకీపాక్స్.. డబ్ల్యూహెచ్ వో ఆందోళన
World Health Organisation: మంకీపాక్స్ కేసులు క్రమంగా పెరుగుతున్నాయి. ఇప్ప‌టికే ప్ర‌పంచంలోని 12కు పైగా దేశాల్లో ఆందోళ‌న‌క‌ర స్థాయిలో మంకీపాక్స్ కేసులు న‌మోద‌వుతున్నాయ‌ని ప్రపంచ ఆరోగ్య సంస్థ ఆందోళన వ్య‌క్తం చేస్తోంది.
Monkeypox alert: క‌రోనా వైరస్ మహమ్మారి ప్రభావం కొన‌సాగుతున్న త‌రుణంలో ప్ర‌స్తుతం మరో వైరస్ ప్ర‌మాద ఘంటిక‌లు మోగిస్తున్న‌ది. అదే మంకీపాక్స్.. ప్ర‌స్తుతం మంకీపాక్స్ కేసులు ప్ర‌పంచంలోని చాలా దేశాల్లో ఆందోళ‌న‌క‌రంగా పెరుగుతున్నాయ‌ని ప్రపంచ ఆరోగ్య సంస్థ ఆందోళన వ్య‌క్తం చేస్తోంది. బ్రిటన్‌లో మొదట్లో కోతులకు సంక్రమించే మంకీపాక్స్ వ్యాధిని మ‌నుషుల‌కు సోకిన‌ట్టు గుర్తించారు. దీని తరువాత ఇప్పటివరకు కెనడా, స్పెయిన్ సహా 12 కంటే ఎక్కువ దేశాలలో ఈ వైరస్ కేసులు ప్ర‌స్తుతం ఆందోళ‌న‌క‌ర స్థాయిలో పెరుగుతున్నాయ‌ని రిపోర్టులు పేర్కొంటున్నాయి. ప్రపంచ ఆరోగ్య సంస్థ (డబ్ల్యూహెచ్వో) వివ‌రా ప్ర‌కారం.. నెద‌ర్లాండ్స్, పోర్చుగల్, స్పెయిన్, స్వీడన్, యూకే, అమెరికాల‌లో మంకీపాక్స్ కేసులు క్రమంగా పెరుగుతున్నాయి. ప్ర‌స్తుతం కొన‌సాగుతున్న ప‌రిస్థితుల‌ను ప‌రిగ‌ణ‌లోకి తీసుకుంటే మంకీపాక్స్ కేసులు మరింత పెరిగే అవకాశం ఉందని WHO తెలిపింది. తాజా ప‌రిణామాల‌ను నిత్యం ప‌ర్య‌వేక్షిస్తున్నామ‌ని పేర్కొంది.
కోవిడ్-19కి భిన్నంగా మంకీపాక్స్ వ్యాపిస్తుంది. ఇప్పటి వరకు భారతదేశంలో ఒక్క కేసు కూడా నమోదు కానప్పటికీ, క్రమంగా వివిధ దేశాల్లో ఈ వైరస్ వ్యాప్తి చెందడం ప్రజల్లో భయాందోళనలకు గురిచేస్తోంది. WHO ప్రభావిత దేశాలతో కలిసి పని చేస్తోంది.. మంకీపాక్స్ గురించి మరింత స‌మాచారం సేక‌రిస్తోంది. దీనికి సంబంధించి త్వ‌ర‌లోనే మార్గ‌ద‌ర్శ‌కాలు జారీ చేయ‌నున్న‌ట్టు వెల్ల‌డించింది. ఇప్పుడు, ఇజ్రాయెల్ కూడా విదేశాల నుండి తిరిగి వచ్చిన వ్యక్తిలో వైరల్ ఇన్ఫెక్షన్ మంకీపాక్స్ మొదటి కేసును ధృవీకరించింది. ఇదిలా ఉండగా, గ్లోబల్ మంకీపాక్స్ వ్యాప్తి పరిస్థితి ఆందోళన చెందాల్సిన విషయం అని అమెరికా అధ్యక్షుడు జో బైడెన్ అన్నారు. శనివారం నాటికి, ప్రపంచ ఆరోగ్య సంస్థ ప్ర‌కారం.. మంకీపాక్స్ కేసులు చాలా దేశాలకు విస్త‌రించిన‌ప్ప‌టికీ.. 12 దేశాల్లో ఆందోళ‌న‌క‌రంగా విస్త‌రిస్తున్న‌ది. ఇప్ప‌టికే వంద‌ల్లో కేసులు న‌మోద‌య్యాయి. అనుమానిత కేసులు సైతం క్రమంగా పెరుగుతున్నాయి. ఈ క్ర‌మంలోనే మొదటి కేసును గుర్తించిన ఇజ్రాయెల్.. అనుమానిత కేసులను పరిశీలిస్తున్నట్లు తెలిపింది. జ్వరం, గాయాలతో విదేశాల నుంచి తిరిగొచ్చిన వారందరూ వైద్యులను సంప్రదించాలని కోరింది.
దక్షిణ కొరియాలోని ఒసాన్ ఎయిర్ బేస్‌లో విలేకరులతో మాట్లాడుతూ.. అమెరికా అధ్యక్షుడిగా ఆసియాకు తన మొదటి పర్యటనను కొనసాగించడానికి జపాన్‌కు బయలుదేరే ముందు అతను దళాలను సందర్శించినప్పుడు మంకీపాక్స్ గురించి ప్ర‌శ్నించ‌గా.. దీని గురించి ఇంకా పూర్తిస్థ‌యి స‌మాచారం లేక‌పోయిన‌ప్ప‌టికీ ప్ర‌స్తుతం కొన‌సాగుతున్న ప‌రిస్థితులు గ‌మ‌నిస్తే..ప్రతి ఒక్కరూ ఆందోళన చెందాల్సిన విషయమ‌ని బైడెన్ అన్నారు. మశూచికి సంబంధించిన వ్యాధి కేసులు గతంలో మధ్య మరియు పశ్చిమ ఆఫ్రికాతో సంబంధాలు ఉన్న వ్యక్తులలో మాత్రమే కనిపించాయి. కానీ బ్రిటన్, స్పెయిన్, పోర్చుగల్, ఇటలీ, యుఎస్, స్వీడన్ మరియు కెనడా అన్నీ ఇన్ఫెక్షన్‌లను నివేదించాయి, ఎక్కువగా గతంలో ఆఫ్రికాకు వెళ్లని యువకులలో.. ఫ్రాన్స్, జర్మనీ, బెల్జియం మరియు ఆస్ట్రేలియాల‌లో కూడా కేసులను గుర్తించారు. ఈ క్ర‌మంలోనే ప్రపంచ ఆరోగ్య సంస్థ అత్య‌వ‌స‌రంగా స‌మావేశ‌మైంది. మంకీపాక్స్ పై చ‌ర్చించింది. ఇన్ఫెక్షన్ మరిన్ని దేశాలకు వ్యాపించే అవకాశం ఉందని డబ్ల్యూహెచ్వో హెచ్చరించింది. .
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
