కాపర్ బాటిల్ నీళ్లను తాగితే మన ఆరోగ్యానికి ఎన్నో ఆరోగ్య ప్రయోజనాలు కలుగుతాయి. అందుకే ఉదయం లేచిన వెంటనే ఈ బాటిల్ లోని నీళ్లను తాగాలని నిపుణులు చెబుతుంటారు.
నీటిలో ఉండే హానికరమైన సూక్ష్మజీవులు, శిలీంధ్రాలు, బ్యాక్టీరియాను తొలగించే సామర్థ్యం రాగి పాత్రకు ఉంటుంది. అందుకే నీళ్లను శుద్ధి చేయడానికి రాగిని ఎన్నో ఏండ్ల నుంచి ఉపయోగిస్తున్నారు. రాగి వాటర్ బాటిల్ లో నీళ్లను పోస్తే అవి సహజంగా శుద్ధి చేయబడతాయి. అలాగే సురక్షితంగా ఉంటాయి. అసలు రాగి బాటిల్ నీటిని తాగితే ఎలాంటి ఆరోగ్య ప్రయోజనాలు కలుగుతాయో ఇప్పుడు తెలుసుకుందాం..
జీర్ణక్రియ పనితీరును మెరుగుపరుస్తుంది
రాగిలోని యాంటీ బాక్టీరియల్, యాంటీ ఇన్ఫ్లమేటరీ లక్షణాలు కడుపులో హానికరమైన బ్యాక్టీరియా, మంటను తగ్గిస్తాయి. రాగి బాటిల్ లోని నీటిని తాగడం వల్ల అంటువ్యాధులు, అల్సర్లు, అజీర్థి సమస్య నుంచి ఉపశమనం పొందొచ్చు. అంతేకాదు రాగి కడుపును శుభ్రపరచడానికి, నిర్విషీకరణ చేయడానికి కూడా సహాయపడుతుంది. ఇది మూత్రపిండాలు, కాలేయం రెండింటి పనితీరును మెరుగుపర్చడానికి సహాయపడుతుంది.
బరువు తగ్గడానికి సహాయపడుతుంది
రాగి శరీరంలో పేరుకుపోయిన కొవ్వును విచ్ఛిన్నం చేయడానికి, తగ్గించడానికి సహాయపడుతుంది. అలాగే జీర్ణ పనితీరును కూడా ఆప్టిమైజ్ చేస్తుంది. ఈ ప్రక్రియ శరీరానికి అవసరమైన వాటిని మాత్రమే నిలుపుకోవటానికి, మిగిలిన వాటిని తొలగించడానికి సహాయపడుతుంది. ఇది బరువు తగ్గేందుకు సహాయపడుతుంది. మీరు బరువు తగ్గాలనుకుంటే రాగి బాటిల్ వాటర్ ను తాగడం అలవాటు చేసుకోండి.
గాయాలను త్వరగా నయం చేస్తుంది
రాగిలో యాంటీ బాక్టీరియల్, యాంటీ ఇన్ఫ్లమేటరీ, యాంటీ వైరల్ లక్షణాలు పుష్కలంగా ఉంటాయి. ఇది గాయాలను నయం చేయడానికి బాగా సహాయపడుతుంది. ఈ లక్షణాలు కొత్త కణాల ఉత్పత్తికి సహాయపడతాయి. అలాగే శరీర రోగనిరోధక శక్తిని బలోపేతం చేస్తాయి.
ఆర్థరైటిస్, కీళ్లకు సహాయపడుతుంది
రాగి శక్తివంతమైన శోథ నిరోధక లక్షణాలను కలిగి ఉంటుంది. ఇది ఆర్థరైటిస్ సమస్యలను తగ్గించడానికి సహాయపడుతుంది. రుమటాయిడ్ ఆర్థరైటిస్ తో సహా దీనితో సంబంధం ఉన్న నొప్పులను తగ్గించడానికి ఇది ఎఫెక్టీవ్ గా పనిచేస్తుంది. రాగి ఎముకలను బలోపేతం చేసే లక్షణాలను కూడా కలిగి ఉంటుంది.
