ఒక్క చేతిలో ఎన్ని గాజులు వేసుకోవాలి?

పెళ్లితో ఆడవారి జీవితంలో ఎన్నో మార్పులొస్తాయి. ముఖ్యంగా కట్టు, బొట్టులో. పెళ్లి తర్వాత నుదిటిన ఖచ్చితంగా బొట్టుపెట్టుకోవాలని, మెడలో తాళి బొట్టు, చేతులకు గాజలు వేసుకోవాలని, కాలి వేళ్లకు మెట్టెలు పెట్టుపెట్టుకోవాలనే నియమాలు ఉన్నాయి. ఇవన్నీ ఆమె ముత్తైదువని చూపిస్తాయి. అయితే ప్రస్తుత కాలంలో చాలా మంది మహిళలు గాజలును వీలైనంత తక్కువగా వేసుకుంటున్నారు. ఒక్కో చేతికి ఒకటి, రెండు లేదా మూడు వేసుకుంటున్నారు. కొంతమంది ఆడవారైతే ఒక చేతికి వాచ్ పెట్టుకుని.. ఇంకో చేతికి ఒకటిరెండు గాజులను వేసుకుంటున్నారు. కానీ హిందూ మతంలో పెళ్లైన ఆడవారు ఒక్కోచేతికి కొన్ని గాజులను ఖచ్చితంగా వేసుకోవాలి. హిందూ మతంలో ప్రకారం.. ఒక్క చేతికి ఎన్ని గాజులు వేసుకోవాలో ఇప్పుడు తెలుసుకుందాం పదండి. 
 

చంద్రుని చిహ్నం

వాస్తు శాస్త్రంలో.. గాజులను బుధుడు, చంద్రుడి చిహ్నాలుగా భావిస్తారు. వీటిని వేసుకోవడం పెళ్లైన ఆడవారికి ఎంతో శుభదాయకమని చెబుతున్నారు.

మానసిక ఒత్తిడి నుంచి ఉపశమనం

చేతులకు గాజులను కేవలం అందం కోసమే వేసుకుంటారని చాలా మంది అనుకుంటారు. నిజమేంటంటే? చేతులకు గాజులను వేసుకోవడం వల్ల మానసిక ఒత్తిడి తగ్గుతుంది. ఇది ఆడవాళ్ల మానసిక ఆరోగ్యాన్ని కూడా మెరుగుపరుస్తుంది.

ఒక చేతిలో ఎన్ని గాజులు వేసుకోవాలి? 

ఎవరికి నచ్చినన్ని వారు గాజులను వేసుకుంటుంటారు. కానీ జ్యోతిష్యం ప్రకారం.. పెళ్లైన ప్రతి మహిళ ఒక్క చేతిలో కనీసం 21 గాజులను వేసుకోవాలి. అలాగే రెండు చేతులకు సమానంగా గాజులు ఉండాలి. 

బ్రాస్ లెట్

గాజులతో పాటుగా మీరు మీ చేతులకు  బ్రాస్లెట్లను కూడా ధరించొచ్చు. ఇందుకోసం బంగారం లేదా వెండితో చేసిన 2 బ్రేస్ లెట్లను కలిపి వేసుకోవచ్చు. 
 

నవ వధువు ఎన్ని గాజులు వేసుకోవాలి?

కొత్తగా పెళ్లైన ఆడవారు ఖచ్చితంగా గాజులను నిండుగా వేసుకోవాలని పెద్దలు చెప్తుంటారు. నవ వధువులు ఒక సంవత్సరం పాటు చేతులకు గాజు గాజులను వేసుకోవాలనే సాంప్రదాయం ఉంది. ఏడాది కాకుండా కనీసం 40 రోజుల పాటైనా గాజులను కచ్చితంగా వేసుకోవాలని జ్యోతిష్యులు చెబుతున్నారు. 

కొత్త గాజులను ఏ సమయంలో వేసుకోవాలి

మీరు మీ పాత గాజులను తీసేసి కొత్తవాటిని వేసుకోవాలనుకుంటే.. కొత్త గాజులను ఉదయం లేదా సాయంత్రం పూట మాత్రమే మార్చుకోండి. మధ్యాహ్నం పూట పాత గాజులను తీసేసి కొత్త గాజులను వేసుకోకూడదు. 

ఏ కలర్ గాజులు వేసుకోవాలి? 

పెళ్లైన ఆడవారు ఎప్పుడూ కూడా ఎరుపు, ఆకుపచ్చ లేదా పసుపు రంగు గాజులనే వేసుకోవాలని జ్యోతిష్యులు చెబుతున్నారు. వీళ్లు పొరపాటున కూడా నలుపు, ముదురు రంగుల గాజులను వేసుకోకూడదు.