Weather Update : ఫిబ్రవరిలో తెలుగు రాష్ట్రాల వాతావరణం ఎలా ఉంటుందంటే...

February Weather : జనవరి ముగింపుతో దాదాపు చలికాలం ముగిసినట్లే. ఫిబ్రవరి వచ్చింది కాబట్టి చలి తగ్గి మెళ్లిగా ఎండలు మొదలవుతాయి. ఈ నెలలో వాతావరణం ఎలా ఉండనుందంటే..  

Image Credit : summer weather

తెలుగు రాష్ట్రాల్లో ఎండా వాన..

Weather Alert : తెలుగు రాష్ట్రాల్లో ప్రస్తుతం విచిత్రమైన వాతావరణం ఉంది... ఓవైపు చలి, మరోవైపు ఎండలు కొనసాగుతున్నాయి. ఇది చాలదన్నట్లు అప్పుడప్పుడు వర్షాలు పలకరిస్తున్నాయి. ఇలా కొన్నిప్రాంతాల ప్రజలు ఒకేసారి చలి, ఎండా, వాన పరిస్థితులతో ఇబ్బంది పడుతున్నారు. వాతావరణ పరిస్థితుల మార్పు ప్రజలు ఆరోగ్యాన్ని దెబ్బతీస్తోంది. కాబట్టి ప్రజలు ఈ పరిస్థితుల్లో జాగ్రత్తగా ఉండాలని వైద్య నిపుణులు సూచిస్తున్నారు.

Image Credit : @chetansabnis/X

ఏపీలో కొనసాగుతున్న చలి

చలికాలం ముగింపుకు చేరుకుంది... అందుకే మెళ్లిగా ఎండలు మొదలవుతున్నాయి. ఆంధ్ర ప్రదేశ్ లో అటు చలి, ఇటు ఎండలు కొనసాగుతున్నాయి. మన్యం ప్రాంతాల్లో ఇప్పటికీ కనిష్ఠ ఉష్ణోగ్రతలు నమోదవుతున్నాయి... జి. మాడుగులలో 8.2, అరకులో 9, చింతపల్లిలో 10, ముంచంగిపుట్టులో 11 డిగ్రీల ఉష్ణోగ్రతలు ఉన్నాయి. ఇదే సమయంలో కోస్తా, రాయలసీమ జిల్లాల్లో పగటి ఉష్ణోగ్రతలు పెరిగాయి... నందిగామలో అత్యధికంగా 33.6 డిగ్రీల టెంపరేచర్ నమోదయ్యింది. ఇప్పుడే ఎండలు ఇలా ఉంటే నడి వేసవిలో ఇంకెలా ఉంటాయోనని ప్రజలు కంగారుపడుతున్నారు.

Image Credit : Getty

తెలంగాణలో ఫిబ్రవరి వెదర్ అప్డేట్...

ఇక  తెలంగాణ విషయానికి వస్తే ఫిబ్రవరి చివర్లో ఎండలు ముదిరే అవకాశాలున్నాయని వెదర్ మ్యాన్ ప్రకటించారు. ఫిబ్రవరి 7 లేదా 8 వరకు చలిగాలులు కొనసాగుతాయని... ఉదయం, రాత్రులు 14-16 డిగ్రీలు, మధ్యాహ్నం మాత్రం 29-31 డిగ్రీల ఉష్ణోగ్రతలు ఉంటాయని తెలంగాణ వెదర్ మ్యాన్ తెలిపారు. ఫిబ్రవరి 8 తర్వాత వాతావరణంలో కొంత మార్పు ఉంటుందని... ఉదయం, రాత్రి ఉష్ణోగ్రతలు 16-17 డిగ్రీలు, మధ్యాహ్నం ఉష్ణోగ్రతలు 32 డిగ్రీలకు పైన ఉంటాయని వెల్లడించారు.

Image Credit : Getty

ఈసారి ఆలస్యంగా వేసవి..

మొత్తంగా చూసుకుంటే ఈసారి ఎండలు కాస్త ఆలస్యంగా మొదలవనున్నాయని తెలంగాణ వెదర్ మ్యాన్ తెలిపారు. ఏప్రిల్, మే నెలల్లో ఎండలు మండిపోతాయని... అత్యధిక ఉష్ణోగ్రతలు ఉంటాయని హెచ్చరించారు. అయితే వేసవిలో కూడా అప్పుడప్పుడు వర్షాలు కురిసే అవకాశాలున్నాయని వాతావరణ నిపుణులు చెబుతున్నారు.

Image Credit : Getty

ప్రస్తుతం తెలంగాణ వాతావరణం ఎలా ఉంది..?

ప్రస్తుతం తెలంగాణవ్యాప్తంగా 10 డిగ్రీలకు పైనే  అత్యల్ప ఉష్ణోగ్రతలు నమోదవుతున్నాయి. నిన్న (ఫిబ్రవరి 1, ఆదివారం) ఆదిలాబాద్ లో అత్యల్పంగా 13.5, మెదక్ లో 15.2 డిగ్రీల ఉష్ణోగ్రత నమోదయ్యింది. ఇక హన్మకొండలో 17.5, రామగుండంలో 17.8, నల్గొండలో 17.8, ఖమ్మంలో 18, నిజామాబాద్ లో 18, మహబూబ్ నగర్ లో 18, భద్రాచలంలో 20.2 డిగ్రీల లోయెస్ట్ టెంపరేచర్స్ నమోదయ్యాయి. అత్యధికంగా భద్రాచలంలో 32.4 డిగ్రీల ఉష్ణోగ్రత నమోదయ్యింది.

ఇక హైదరాబాద్ విషయానికి వస్తే పటాన్ చెరులో అత్యల్పంగా 14 డిగ్రీల ఉష్ణోగ్రత నమోదయ్యింది. ఇక హయత్ నగర్ లో 15, రాజేంద్రనగర్ లో 15, హకీంపేటలో 17.2, దుండిగల్ లో 17.6, బేగంపేటలో 19 డిగ్రీల ఉష్ణోగ్రత నమోదయ్యింది. అత్యధికంగా హకీంపేటలో 29.6 డిగ్రీల ఉష్ణోగ్రత నమోదయ్యింది. ఇవాళ(జనవరి 2, సోమవారం) హైదరాబాద్ లో ఆకాశం పాక్షికంగా మేఘాలతో నిండి ఉంటుందని... రాత్రి పొగమంచు కురిసే అవకాశాలుంటాయని హైదరాబాద్ వాతావరణ కేంద్రం తెలిపింది.