Hyderabad Haleem : ఏమిటీ... ఒక్క నెలలోనే హైదరబాదీలు ఇంత హలీం తిన్నారా..!
హైదరాబాదీలకు నాన్ వెజ్ అంటే ఎంత ఇష్టమో మరోసారి బైటపడింది. కేవలం ఒక్క నెలలోనే నగరంలో హలీం విక్రయాలు ఊహించని స్థాయిలో జరిగాయి. యావత్ దేశాన్నే ఆశ్చర్యానికి గురిచేసేలా నగరంలో హలీం బిజినెస్ జరిగింది. పదువు, వందలు కాదు ఏకంగా వేలకోట్లను హలీం కోసం ఖర్చుచేసారు హైదరబాదీలు.
Hyderabad Haleem
Haleem : హైదరాబాద్ అనగానే ముందుగా ఘుమఘుమలాడే నాన్ వెజ్ వంటకాలే గుర్తుకువస్తాయి. సహజంగానే తెలంగాణ ప్రజలకు ముక్కలేనిదే ముద్ద దిగదు... ఇక హైదరాబాద్ లో అయితే నాన్ వెజ్ ప్రియుల సంఖ్య మరీ ఎక్కువ. ఈ నవాబుల నగరంలో మూడుపూటలు మాంసాహారం తినేవారు ఉన్నారంటే అతిశయోక్తి కాదు.
హైదరాబాద్ బిర్యానీ గురించి ప్రత్యేకంగా చెప్పాల్సిన అవసరం లేదు... నగరంలో ఏమూలకు వెళ్ళినా బిర్యానీ దొరుకుతుంది. కానీ ఓ నెలలో మాత్రం ఈ బిర్యానీని మరో నాన్ వెజ్ వంటకం వెనక్కినెడుతుంటుంది... ఎక్కడ చూసినా ఆ ఆహారమే కనిపిస్తుంది. చివరకు బిర్యాని అమ్మే హోటళ్లు సైతం దాన్ని అమ్ముతాయి... ఆ వంటకం ఏమిటో కాదు ఎంతో రుచికరమైన హలీం.
రంజాన్ మాసంలో మాత్రమే లభించే హలీంను ఉపవాసదీక్ష చేపట్టే ముస్లింలే కాదు హిందువులు కూడా లొట్టలేసుకుంటూ తింటారు. కేవలం ఒక్కనెల మాత్రమే ఈ హలీం విరివిగా లభిస్తుంది. దేశంలోని అన్నిప్రాంతాల్లోనూ ఇది లభించినా హైదరాబాదీ హలీం టేస్ట్ ఇంకెక్కడా రాదు. మరీముఖ్యంగా నగరంలోని కొన్ని హోటళ్లు, రెస్టారెంట్స్ లభించే హలీం చాలా స్పెషల్... మెత్తటి హలీంకు నెయ్యి దట్టించి, దోరగా వేయించిన ఉల్లిపాయలు, డ్రైప్రూట్స్ వేసి ఇస్తారు... దాని రుచి అద్భుతం... మహాద్భుతం అంటారు.
గత నెల మార్చిలో రంజాన్ ఉపవాస దీక్షలు కొనసాగాయి. ఈ సందర్భంగా హైదరాబాద్ లో హలీం విక్రయాలు భారీగా జరిగాయి. కేవలం ఒక్క నెలలోనే రికార్డుస్థాయిలో హలీం అమ్మకాలు జరిగాయి. దేశమే ఆశ్చర్యపోయేలా హైదరాబాదీలు హలీం తిన్నారు...దీంతో పదులు, వందలు కాదు ఏకంగా వేలకోట్లలో బిజినెస్ జరిగింది. అంతేకాదు హలీం మరిన్ని రికార్డులు కూడా నెలకొల్పింది... వాటిగురించి తెలుసుకుందాం.
Hyderabad Haleem
హలీం అమ్మకాల్లో దేశంలోనే హైదరాబాద్ టాప్ :
రంజాన్ మాసంలో ఉపవాసంచేసే ముస్లింలకు వెంటనే ఎనర్జీ ఇచ్చే వంటకం హలీం. మాంసాన్ని మెత్తగా ఉడికించి పేస్ట్ లా చేసి మసాలాలు దట్టించి ఈ హలీంను తయారుచేస్తారు. నోటికి రుచికరంగా ఉండటమే కాదు ఈజీగా జీర్ణమై వెంటనే శక్తిని ఇస్తుంది. అందువల్లే రంజాన్ మాసంలో ప్రతి ముస్లిం హలీం తినేందుకు ఇష్టపడతారు.
ఇక కేవలం ఒకేనెల లభించే హలీంను ముస్లింలే కాదు ఇతర మతాలవారు కూడా ఇష్టంగా తింటారు. హైదరాబాద్ లో అయితే సాయంత్రం అయ్యిందంటే చాలు హలీం బట్టిలచుట్టూ జనం గుమిగూడి కనిపిస్తారు... రంజాన్ నెలంతా ఇదే సీన్ కనిపిస్తుంది. హలీం ధర ఎంతున్నా సరే లెక్కచేయకుండా రుచి చేస్తుంటారు. దీంతో ఈ రంజాన్ నెలలో కేవలం హలీం అమ్మకాల ద్వారానే కోట్లలో బిజినెస్ జరుగుతుంది.
గత మార్చి నెలంతా రంజాన్ ఉపవానదీక్షలు జరిగాయి. మార్చి 2న ప్రారంభమై మార్చి 31 రంజాన్ పండగతో ఉపవాసదీక్షలు ముగిసాయి. ఈ నెలంతా హలీం అమ్మకాలు జోరుగా సాగాయి... కేవలం హైదరాబాద్ నగరంలోనే ఏకంగా వెయ్యి కోట్ల రూపాయల హలీం విక్రయాలు జరిగినట్లు అంచనా. దేశంలోని మరే నగరంలోనూ ఈ స్థాయిలో అమ్మకాలు జరగలేవు... ఇలా హలీం అమ్మకాల్లో హైదరాబాద్ రికార్డుల మోత మోగించింది.
Haleem
హైదరాబాద్ హలీం రికార్డులు :
రంజాన్ మాసంలో అంటే గత మార్చినెలలో హైదరాబాద్ లో ఏకంగా 6 వేలకు పైగా హలీం కేంద్రాలు వెలిసినట్లు సమాచారం. పిస్తా హౌస్, షా గౌస్, బావర్చీ, మెహఫిల్ వంటి పెద్ద రెస్టారెంట్లు వీటికి అదనం. ఇలా నగరంలో ప్రతిరోజూ లక్షలాది కిలోల హలీం విక్రయాలు జరిగాయి... చిన్న విక్రయ కేంద్రాల్లో రోజుకు సగటున 100 నుండి 200 ప్లేట్లు, పెద్ద రెస్టారెంట్స్ లో 500 నుండి 1000 ప్లేట్ల హలీం విక్రయాలు జరిగాయి.
నగరంలో హలీం ధర ఒక్కోచోట ఒక్కోలా ఉంది... కొన్ని రెస్టారెంట్లతో ఒక్కరు తినే సింగిల్ హలీం 300 ఉండగా ఫ్యామిలీ ప్యాక్ రూ.600 నుండి రూ.800 వరకు అమ్మారు. ఇలా రోజుకు రూ.30 నుండి రూ.35 కోట్ల వరకు హలీం వ్యాపారం జరిగిందని అంచనా. వారాంతాల్లో అంటే శుక్ర, శని, ఆదివారాల్లో హలీం అమ్మకాలు మరింత ఎక్కువగా జరిగేవని చెబుతున్నారు. ఆశ్చర్యకరమైన విషయం ఏంటంటే పాతబస్తీతో పాటు మిగతా హైదరాబాద్ ప్రాంతంలో కంటే సైబరాబాద్ ప్రాంతంలో హలీం విక్రయాలు జోరుగా సాగాయి.
గత ఏడాదితో పోలిస్తే ఈ ఏడాది హలీంకు డిమాండ్ పెరిగిందని... 20 శాతం అధికంగా అమ్మకాలు జరిగినట్లు హైదరాబాద్ హోటల్ సంఘాల ప్రతినిధులు చెబుతున్నారు. కేవలం హోటల్స్ లోనే కాదు ఫుడ్ డెలివరీ యాప్స్ స్విగ్గీ, జొమాటోలో కూడా గత నెల హలీం ఆర్డర్లే ఎక్కువగా వచ్చాయట. ఇలా హైదరాబాద్ హలీం అమ్మకాల విషయంలో రికార్డులు బద్దలుకొట్టింది.