మెదక్ లో త్వరలోనే ప్రియాంక గాంధీ సభ: బీసీ డిక్లరేషన్ ప్రకటించనున్న కాంగ్రెస్

త్వరలోనే  మెదక్ లో  కాంగ్రెస్ అగ్రనేత ప్రియాంక గాంధీతో   సభను  ఏర్పాటు  చేయాలని  ఆ పార్టీ భావిస్తుంది.  రెండు  రోజుల్లో  ఈ విషయమై  స్పష్టత  వచ్చే అవకాశం ఉంది.    

మెదక్ లో ప్రియాంక గాంధీ సభ

కర్ణాటక  రాష్ట్రంలో  విజయం సాధించిన కాంగ్రెస్  పార్టీ తెలంగాణపై  ఫోకస్ పెట్టింది.  తెలంగాణ రాష్ట్రం ఇచ్చినా కూడా  రెండు దఫాలు  అధికారానికి ఆ పార్టీ దూరంగా  ఉంది. దీంతో  ఈ ఏడాది చివర్లో  జరిగే అసెంబ్లీ ఎన్నికలపై   కాంగ్రెస్  పార్టీ నాయకత్వం  కేంద్రీకరించింది.  

తెలంగాణలో  అధికారాన్ని దక్కించుకోనేందుకు  అనుసరించాల్సిన వ్యూహాలపై  కాంగ్రెస్  పార్టీ  ఫోకస్ పెట్టింది.   రాష్ట్రంలో  మరోసారి ప్రియాంకగాంధీ సభను  ఏర్పాటు  చేయాలని  ఆ పార్టీ  భావిస్తుంది.  జూన్  చివరి వారం లేదా  జూలై  మొదటి వారంలో  ప్రియాంక గాంధీ సభను ఏర్పాటు  చేయాలని కాంగ్రెస్  పార్టీ ప్లాన్  చేస్తుంది.    సోమవారంనాడు  జరిగే  పీసీసీ సమావేశంలో  ఈ విషయమై  చర్చించనున్నారు.

indira gandhiగతంలో మెదక్ ఎంపీ స్థానం నుండి ఇందిరాగాంధీ విజయం సాధించారు.  అయితే  అదే జిల్లాలో  ప్రియాంక గాంధీ సభను  ఏర్పాటు చేయాలని  కాంగ్రెస్ నాయకత్వం  భావిస్తుంది. ఈ నెల  8వ తేదీన  కర్ణాటక  అసెంబ్లీ ఎన్నికల ప్రచారాన్ని ముగించుకొని  ప్రియాంక గాంధీ  హైద్రాబాద్ కు వచ్చారు.  హైద్రాబాద్ సరూర్ నగర్ స్టేడియంలో   యూత్ డిక్లరేషన్ ను  ప్రకటించారు.  

రానున్న  రోజుల్లో బీసీ  డిక్లరేషన్  ను  కాంగ్రెస్ పార్టీ ప్రకటించనుంది.   బీజేపీ నేతలు  రెండు  రోజుల క్రితం  బీసీ డిక్లరేషన్ ను  ప్రకటించారు.   తెలంగాణ రాష్ట్రంలో  బీసీ  ఓటర్లు  ఆయా పార్టీల గెలుపు ఓటముల్లో కీలకంగా వ్యవహరిస్తారు. దీంతో  బీసీలను  తమ వైపునకు తిప్పుకొనేందుకు  పార్టీలు  ప్రయత్నాలు  ప్రారంభించారు.

సరూర్ నగర్ స్టేడియంలో జరిగిన  కాగ్రెస్ యువ సంఘర్షణ సభలో  యూత్ డిక్లరేషన్ లోని ముఖ్యాంశాలను  రేవంత్ రెడ్డి వివరించారు.  యూత్ డిక్లరేషన్ లో  తాము ఇచ్చిన అమలు చేయకపోతే   కాంగ్రెస్ ప్రభుత్వాన్ని  కూల్చివేయాలని  ప్రియాంక గాంధీ కోరారు.  కాంగ్రెస్ పార్టీ తెలంగాణలో అధికారంలోకి వచ్చిన వెంటనే  యూత్ డిక్లరేషన్ ను అమలు  చేస్తామని  ప్రియాంక గాంధీ హామీ ఇచ్చారు.  తెలంగాణలో కాంగ్రెస్ అధికారంలోకి వస్తే  యువతకు  ఏం చేయనున్నారో  యూత్ డిక్లరేషన్ లో  కాంగ్రెస్ ప్రకటించింది.

ప్రియాంకగాంధీ  ద్వారా బీసీ డిక్లరేషన్ ను  కాంగ్రెస్ పార్టీ ప్రకటించే అవకాశాలు కూడా లేకపోలేదు.   తెలంగాణ రాష్ట్రంలో  ఎన్నికలకు  ఆరు మాసాల సమయం ఉంది.   ఎన్నికల షెడ్యూల్ నాటికే  అన్ని వర్గాలకు  ఏం  చేయనున్నామో  కాంగ్రెస్ పార్టీ  ప్రకటించనుంది.