Dhoni Injury : ధోనికి మళ్లీ గాయం... ఇక ఐపిఎల్ కు గుడ్ బై చెప్పినట్లేనా..?
వరుస గాయాలతో సతమతం అవుతున్న స్టార్ క్రికెటర్ మహేంద్ర సింగ్ ధోని ఇండియన్ ప్రీమియర్ లీగ్ దూరమైనట్లేనా…? చెన్నై సూపర్ కింగ్స్ హెడ్ కోచ్ స్టీఫెన్ ఫ్లెమింగ్ ఏమంటున్నారంటే..
ధోనికి ఏమయ్యింది..?
చెన్నై సూపర్ కింగ్స్ (CSK) సపోర్టర్స్ మాత్రమే కాదు క్రికెట్ ను అభిమానించే ప్రతి ఇండియన్ కోరుకునేది ఒక్కటే... స్టార్ క్రికెటర్ మహేంద్ర సింగ్ ధోని ధనాధన్ షాట్లు బాదుతుంటే చూడాలి. ఇంటర్నేషనల్ క్రికెట్ నుండి రిటైరైనా ఐపిఎల్ లో అతడి ఆటను చూడాలని ఎదురుచూస్తున్నారు... కానీ ఇప్పటివరకు ధోని మైదానంలోకి దిగలేదు. దీంతో ఈ ఐపీఎల్ 2026 సీజన్‌లో అతడు ఆడటంపై అనుమానాలు నెలకొన్నాయి. ఇప్పటికే గాయంతో నెల రోజులుగా ఆటకు దూరంగా ఉన్న ధోనీ… ప్రాక్టీస్ సమయంలో మరోసారి గాయపడినట్లు సమాచారం.
ధోని మెరుపులు ఇక చూడలేమా..?
గతేడాది మాదిరిగానే ఈసారి కూడా ఎంఎస్ ధోని ఆడతాడని అభిమానులు భావించారు... చివర్లో వచ్చినా మెరుపులు చూడవచ్చని భావించారు. కానీ మార్చి 28న గౌహతిలో రాజస్థాన్ రాయల్స్‌తో జరిగిన తొలి మ్యాచ్‌కు ముందే అతడి పిక్క కండరాల గాయమైంది. అప్పటి నుంచి దాదాపు నెల రోజులుగా అతను ఏ మ్యాచ్‌లోనూ ఆడలేదు. సిఎస్కే తరఫున ధోనీ 8 మ్యాచ్‌లకు దూరం కావడం అభిమానులను ఆందోళనకు గురిచేస్తోంది.
ధోని కోసం అభిమానుల ఎదురుచూపులు..
ఇటీవల వాంఖడే స్టేడియంలో ముంబై ఇండియన్స్‌తో మ్యాచ్‌కు ముందు ధోనీ బ్యాటింగ్, కీపింగ్ ప్రాక్టీస్ చేశాడు... దీంతో ఈ మ్యాచ్ ఆడతాడని అభిమానులు ఆశించారు. కానీ ధోని మైదానంలోకి దిగలేదు. ఆ తర్వాత చెపాక్‌లో గుజరాత్ టైటాన్స్‌తో జరిగిన మ్యాచ్‌లోనూ అతను ఆడలేదు. ఆ మ్యాచ్‌లో చెన్నై 8 వికెట్ల తేడాతో ఓడిపోయింది. ఇది ఈ సీజన్‌లో CSKకి ఐదో ఓటమి.
ధోని గాయంపై చెన్నై కోచ్ ఏమన్నారంటే..
అయితే ఈ ఐపీఎల్ సీజన్‌లో ఎంఎస్ ధోనీ రీఎంట్రీ మరింత ఆలస్యమయ్యేలా ఉంది. ఇటీవల వార్మప్ ప్రాక్టీస్ సెషన్‌లో అతని గాయం మళ్లీ తిరగబెట్టిందట. దీంతో అతను ఎప్పుడు జట్టులోకి వస్తాడనే దానిపై అనిశ్చితి పెరిగింది.
గుజరాత్ టైటాన్స్‌తో ఓటమి తర్వాత చెన్నై హెడ్ కోచ్ స్టీఫెన్ ఫ్లెమింగ్ మాట్లాడుతూ.. 'వార్మప్ సమయంలో ధోనీకి అప్పటికే గాయమైన పిక్క కండరాలు మళ్లీ బెణికాయి. దీంతో అతను కోలుకోవడానికి మేము అనుకున్నదానికంటే ఎక్కువ సమయం పడుతుంది. గాయం తీవ్రం కాకుండా చాలా జాగ్రత్తగా ఉంటాం' అని చెప్పారు. ఈ సీజన్ తొలి అర్ధభాగంలో ధోనీ లేకపోవడం CSK జట్టు బ్యాలెన్స్‌పై పెద్ద ప్రభావం చూపింది. కీలక సమయాల్లో జట్టులో అనుభవం లోపించడం స్పష్టంగా కనిపించింది.
ధోని ఆడతాడా.. లేదా..?
ధోనీ పరిస్థితిపై ఫ్లెమింగ్ మాట్లాడుతూ.. 'అతని గాయంలో మెరుగుదల ఉంది. కానీ ఇంకా పూర్తిగా సిద్ధంగా లేడు. మెడికల్ టీమ్ అతన్ని నిశితంగా గమనిస్తోంది. అతను ఎప్పుడు తిరిగొస్తాడనేదానిపై కచ్చితమైన టైమ్‌లైన్ లేదు' అన్నారు.
గత ఐపీఎల్ సీజన్‌లో ఎంఎస్ ధోనీ మోకాలి నొప్పితోనే వికెట్ కీపింగ్, బ్యాటింగ్ చేశాడు. లోయర్ ఆర్డర్‌లో బ్యాటింగ్ చేసిన ధోనీ, 14 మ్యాచ్‌ల్లో 24.50 సగటు, 135.17 స్ట్రైక్ రేట్‌తో 196 పరుగులు చేశాడు. కానీ ఈసారి ధోని మెరుపు బ్యాటింగ్ మిస్సవుతున్నారు అభిమానులు.
