- Home
- Life
- Relationship
- True Love Psychology: సైకాలజీ ప్రకారం మనల్ని నిజంగా ప్రేమించే వ్యక్తులు ఎలా ఉంటారో తెలుసా?
True Love Psychology: సైకాలజీ ప్రకారం మనల్ని నిజంగా ప్రేమించే వ్యక్తులు ఎలా ఉంటారో తెలుసా?
ప్రతి ఒక్కరి జీవితంలో ప్రేమానుబంధాలు ముఖ్యమైనవి. నిజమైన ప్రేమ ఎప్పుడూ మన మంచే కోరుకుంటుంది. కానీ నిజమైన ప్రేమ అంటే ఏంటి? ఒక వ్యక్తి మనల్ని నిజంగా ప్రేమిస్తే ఎలా ఉంటారు. వారిని ఎలా గుర్తించాలి. సైకాలజీ నిపుణులు ఏం చెబుతున్నారో ఇక్కడ చూద్దాం.
True Love Psychology
సైకాలజీ ప్రకారం నిజమైన ప్రేమ ఎప్పుడూ పెద్ద పెద్ద మాటల్లో ఉండదు. “నేను నిన్ను ఎంత ప్రేమిస్తున్నానో తెలుసా?” అని పదే పదే చెప్పేవాళ్లకన్నా, మన బాధను మాటలకన్నా ముందు గుర్తించే వాళ్లే నిజంగా ప్రేమించే వ్యక్తులు. మనం నవ్వుతున్నామా, లోపల బాధను దాచుకున్నామా అనే విషయం మనం చెప్పకుండానే అర్థం చేసుకునే వాళ్లు చాలా అరుదు. అలాంటి వాళ్లు మన జీవితంలో ఉంటే, వాళ్లే మనల్ని నిజంగా ప్రేమించే వ్యక్తులని సైకాలజీ చెబుతోంది.
బలహీనతలను గౌరవిస్తారు
సైకాలజీ ప్రకారం నిజంగా ప్రేమించే వ్యక్తులు మన విజయాలకన్నా మన బలహీనతలను ఎక్కువగా గౌరవిస్తారు. మనం తప్పు చేసినా అర్థం చేసుకునే ప్రయత్నం చేస్తారు. మన మాట పూర్తయ్యేలోపు మధ్యలో మాట్లాడకుండా వినడం వాళ్ల సహజ స్వభావం. సైకాలజీ ప్రకారం ఇది ఎమోషనల్ సేఫ్టీకి స్పష్టమైన సూచన. ఎవరి దగ్గర అయితే మనం మనలాగే ఉండగలమో వారిదే నిజమైన ప్రేమ అని సైకాలజీ చెబుతోంది.
మార్పులను గమనిస్తారు..
అలాగే నిజంగా ప్రేమించే వాళ్లు మనలోని మార్పులను గమనిస్తారు. మన వాయిస్ కొంచెం మారినా, మన ప్రవర్తన సాధారణంగా లేదని వాళ్లకు అనిపించినా వెంటనే అడుగుతారు. “ఏమైంది?” అనే ఒక చిన్న ప్రశ్న వెనుక వాళ్ల లోతైన ప్రేమ దాగి ఉంటుంది. మనం మాట్లాడకపోయినా మన సైలెన్స్ వెనుక ఉన్న భావాన్ని అర్థం చేసుకోవడానికి ప్రయత్నిస్తారు.
నియంత్రణ ఉండదు..
సైకాలజీ ప్రకారం నిజమైన ప్రేమలో నియంత్రణ ఉండదు. మనల్ని మార్చాలని కాదు, మనల్ని అర్థం చేసుకోవాలని కోరుకుంటారు. మన నిర్ణయాలను, మన స్పేస్ని గౌరవిస్తారు. సైకాలజీ ప్రకారం ఇది సెక్యూర్ అటాచ్ మెంట్ లక్షణం. మనపై ప్రేమ పేరుతో అధికారం చూపించే వాళ్లు నిజంగా మనల్ని ప్రేమించరు, వాళ్లు తమ భయాన్ని ప్రేమగా చూపిస్తారు.
అవసరం ఉన్నా, లేకున్నా..
నిజంగా ప్రేమించే వ్యక్తులు మనకు అవసరం ఉన్నప్పుడు కనిపిస్తారు, మనకి అవసరం లేనప్పుడు కూడా మన జీవితంలో సైలెంట్ గా ఉంటారు. ఎప్పుడూ అంటి పెట్టుకుని ఉండరు, అలాగని పూర్తిగా దూరమవ్వరు. ఈ సమతుల్యతే వారి నిజమైన ప్రేమకు నిదర్శనం. మన ఆనందం చూసి అసూయపడరు, మన బాధ చూసి విసుగు చెందరు.
స్వార్థం తక్కువ..
సైకాలజీ ప్రకారం నిజమైన ప్రేమలో స్వార్థం తక్కువగా ఉంటుంది. “నాకేం దక్కుతుంది?” అనే ఆలోచన కంటే, “నువ్వు బాగున్నావా?” అనే ప్రశ్నే ముందు వస్తుంది. మన సంతోషమే వాళ్ల సంతోషంగా మారుతుంది. మన కోసం త్యాగం చేస్తున్నామన్న భావన కూడా వాళ్లకు ఉండదు. ఎందుకంటే ప్రేమలో త్యాగం భారంగా అనిపించదు.
ముఖ్యంగా నిజంగా ప్రేమించే వాళ్లు కోపం వచ్చినా, బాధ వచ్చినా, దూరం వెళ్లిపోతామనే మాటలు ఉపయోగించరు. సైకాలజీ ప్రకారం ఇది ఎమోషనల్ మెచ్యూరిటీకి స్పష్టమైన సంకేతం. వాళ్లు సమస్య నుంచి పారిపోరు, సమస్యను పరిష్కరించాలనుకుంటారు.
హడావిడి ఉండదు
సైకాలజీ ప్రకారం నిజమైన ప్రేమలో హడావిడి ఉండదు. కానీ భద్రత ఉంటుంది. మనల్ని ఎక్కడ తక్కువ చేయకుండా, అసలు ఆ ఊహే రాకుండా, మన విలువను మనకు గుర్తు చేసే వాళ్లు నిజంగా ప్రేమించే వ్యక్తులు. అలాంటి వాళ్లు జీవితంలో ఒక్కరున్నా వారు అదృష్టవంతులేనని సైకాలజీ విశ్లేషణలు చెబుతున్నాయి.
