పిల్లలు ఆడుకోకపోతే ఏమౌతుందో తెలుసా?

ఒకప్పుడు పిల్లలు తోటి పిల్లలతో కలిసి ఆరుబయట పొద్దంతా ఏదో ఒక గేమ్ ఆడుతుండేవారు. కానీ ఇప్పుడు మొబైల్ ఫోన్లకు అలవాటు పడి ఇంట్లో ఓ మూలన కూర్చొని ఆన్లైన్ గేమ్స్ ను ఆడుతున్నారు. కానీ దీనివల్ల మీ పిల్లలు ఎలా తయారువుతారో తెలుసా? 

కరోనాకు ముందు పిల్లలు ఇంటి చుట్టుపక్కల పిల్లలు, ఫ్రెండ్స్ తో బయటకు వెళ్లి ఆడుకునేవారు. ఆటలో పడి తినడం కూడా మర్చిపోయేవారు. కానీ ఇప్పుడు ఇంట్లో ఏదో ఒక మూలన కూర్చొని ఫోన్లకు అతుక్కుపోతున్నారు. పిల్లల్లో మారుతున్న ఈ అలవాటు వల్ల వారు సోమరులుగా మారిపోతున్నారు. అంతేకాదు ఫోన్ల వాడకం వల్ల పిల్లల ఆరోగ్యం దెబ్బతింటుంది. వారికి ఆనందం అనేది లేకుండా పోతోంది. చాలా మంది పిల్లలను టీవీ కాకుంటే ఫోన్, ఫోన్ కాకుంటే టీవీని చూస్తుంటారు. వీటివల్ల కూర్చున్న దగ్గర నుంచి పక్కకు కూడా జరగాల్సిన అవసరం ఉండదు. కానీ ఈ అలవాటు వల్ల పిల్లల ఆరోగ్యం ఏమౌతుందో ఒక్క సారి ఆలోచించారా? 

Children

ఆటలు కూడా శారీరక శ్రమే అవుతుంది. బయట ఆడుకోని పిల్లలు పెద్దవారయ్యాక కూడా ఎలాంటి పనులు చేయడానికి ఇష్టపడరు. ఇది పిల్లల్ని సోమరులుగా మారుస్తుంది. ఇది మీ పిల్లలు పెద్దవారయ్యాక ఎన్నో సమస్యలను కలిగిస్తుంది. 

సోమరితనం లక్షణాలు

- ఓకేదగ్గర కూర్చోవడం, పనుల పట్ల ఇంట్రెస్ట్ లేకపోవడం
-ఉత్సాహంగా లేకపోవడం
-కష్టపడి పనిచేయడానికి ఇష్టపడకపోవడం

స్థూలకాయం

సోమరితనం వల్ల  పిల్లలు కూర్చున్న దగ్గర నుంచి పక్కకు కూడా వెళ్లరు. దీనివల్ల మీ పిల్లల శారీరక శ్రమ తగ్గుతుంది. యాక్టివిటీ తగ్గడం వల్ల పిల్లలు ఊబకాయం బారిన పడతారు. విపరీతంగా బరువు పెరుగుతారు. అంతేకాదు టైప్ 2 డయాబెటిస్, అధిక కొలెస్ట్రాల్ , అధిక రక్తపోటు వంటి జీవక్రియ సమస్యలు వచ్చే ప్రమాదం కూడా ఉంది. 

గుండె జబ్బులు

పిల్లలు ఆడుకోకపోవడం వల్ల గుండె జబ్బుల రిస్క్ కూడా బాగా పెరుగుతుంది. అవును వ్యాయామం చేయకపోవడం వల్ల వారి గుండె బలహీనపడుతుంది. ఇది రక్తపోటు, కొలెస్ట్రాల్ పెరగడానికి కారణమవుతుంది. దీనివల్ల గుండెపోటు లేదా స్ట్రోక్ వచ్చే అవకాశాలు ఉన్నాయి. అందుకే పిల్లలు తమ గుండెను ఆరోగ్యంగా ఉంచుకోవాలంటే చిన్నప్పటి నుంచే వ్యాయామం చేస్తుండాలి. 

కండరాల అస్థిపంజర సమస్యలు

శారీరక శ్రమ లేకపోవడం, ఎలక్ట్రానిక్ స్క్రీన్ల ముందు ఎక్కువ సమయం గడపడం వల్ల పిల్లలు చిన్న వయస్సు నుంచే కండరాల సమస్యల బారిన పడాల్సి వస్తుంది. ఈ సమస్యలలో ఒకటి కండరాల బలం తగ్గడం.

మీ పిల్లలు సోమరులుగా మారొద్దంటే వారికి ఫిట్ ఉండటం ఎలాగో నేర్పించండి. ఇందుకోసం చిన్న వయసు నుంచే బయటకు వచ్చి శారీరక శ్రమ చేసేలా ప్రోత్సహించాలి. కష్టపడి పనిచేయాలని బలవంతం చేయకుండా పిల్లలు ఫిట్ గా ఉండేలా చూసుకోండి. ఇది తల్లిదండ్రులుగా మీ బాధ్యత. రాత్రి భోజనం తర్వాత కొద్దిసేపు నడవమని చెప్పండి. పిల్లలు సోమరులుగా మారకుండా ఉండేందుకు ఫోన్ ను తక్కువ సేపు చూసేలా జాగ్రత్త తీసుకోండి. ఎక్కువ సమయం ఆడుకోమని చెప్పండి.