Good Parenting Tips: మీరు మంచి పేరెంట్సేనా? ఒకసారి చెక్ చేస్కోండి
ఈ రోజుల్లో పిల్లల్ని పెంచడం అంతా ఈజీ పని కాదు. ఒకప్పుడు తాతమ్మలు, తాతలు ఇలా బంధుజనం మధ్యలో పిల్లలు ఈజీగా పెరిగేవారు. వారిని చూసి మంచి, చెడు తెలుసుకునేవారు. కానీ ఇప్పుడు ఆ పరిస్థితి లేదు. మరి ఇప్పటి పిల్లలు మంచిగా పెరగాలంటే తల్లిదండ్రులు ఎలా ఉండాలో? ఏం చేయాలో ఒకసారి తెలుసుకోండి.
ఉరుకుల పరుగుల జీవితం. భార్యాభర్తలు ఇద్దరూ ఉద్యోగం చేస్తేనే గడిచే రోజులివి. మరి ఇలాంటి రోజుల్లో పిల్లలకు మంచి, చెడు ఎలా తెలుస్తాయి? పేరెంట్స్ ఎలా ఉంటే పిల్లలు మంచిగా పెరుగుతారో ఇప్పుడు చూద్దాం.
పిల్లల్ని బాగా పెంచడానికి కఠినమైన నియమాలు అవసరం లేదు. ప్రేమ, శ్రద్ధ, ఆప్యాయత చాలు. మరీ ముఖ్యంగా తల్లిదండ్రులు తమ కలల్ని పిల్లలపై రుద్దకూడదు, వాళ్ళ ప్రతిభను గుర్తించి మార్గనిర్దేశం చేయాలి. వాళ్ళకి ఏమి ఇష్టమో తెలుసుకొని, దాన్ని ఎలా సాధించాలో నేర్పాలి.
పిల్లలకు స్వేచ్ఛనివ్వాలి
తల్లిదండ్రులు పిల్లల స్వేచ్ఛను అడ్డుకోకూడదు. వాళ్ళ పనులను వాళ్ళే చేసుకునే విధంగా ప్రోత్సహించాలి. చేసుకోనివ్వాలి.హోంవర్క్, ఇంటి పనులు, స్నేహితులను కలవడం, ఆటలు ఆడటం లాంటి వాటికి స్వేచ్ఛ ఇవ్వాలి. వాళ్ళని సమాజంతో కలవకుండా చేస్తే అబద్ధాలు చెప్పడం అలవాటు అవుతుంది. హోంవర్క్, స్కూల్ పనుల్లో తల్లిదండ్రులు సహాయం చేయాలి.
మంచి అలవాట్లు..
తల్లిదండ్రులు మంచి ప్రవర్తిన కలిగి ఉంటే పిల్లలు ఆటోమేటిక్ గా మంచిగా ప్రవర్తిస్తారు. పేరెంట్స్ ఎప్పుడూ పిల్లల ముందు చెడుగా మాట్లాడకూడదు. వారు మంచిగా ఉంటే పిల్లలు దయ, ప్రేమ, సానుభూతి, మర్యాదలు నేర్చుకుంటారు.
ఆవేశం వద్దు
ఇంట్లో గొడవలు, తిట్లు, కొట్లాటలు పిల్లల మీద చెడు ప్రభావం చూపుతాయి. కుటుంబ సభ్యులతో, పొరుగువారితో మర్యాదగా ఉండాలి. సమస్యలు వచ్చినప్పుడు ప్రశాంతంగా మాట్లాడుకోవాలి. గొడవ పడకూడదు.
పిల్లలను ప్రేమించండి
రోజులో ఎంత బిజీగా ఉన్నా కూడా పిల్లలతో ప్రేమగా ఉండటానికి సమయం కేటాయించాలి. వాళ్ళతో మాట్లాడాలి. ఆడుకోవాలి. కలిసి భోజనం చేయాలి. కథలు చెప్పాలి. వారిని ప్రశాంతంగా నిద్రపుచ్చాలి.
తప్పు చేస్తే క్షమించండి
పిల్లల తప్పులు సరిదిద్దుతున్నప్పుడు తల్లిదండ్రులు వారి తప్పులను కూడా గుర్తించాలి. ఒకవేళ తప్పు చేస్తే పిల్లలకు క్షమాపణ చెప్పాలి. ఇది వాళ్ళలో మంచి గుణాన్ని పెంచుతుంది.
క్రమశిక్షణ..
క్రమశిక్షణ చాలా ముఖ్యం. చిన్నప్పటి నుంచే పిల్లలకు క్రమశిక్షణ నేర్పాలి. పెద్దలకు గౌరవం ఇవ్వడం నేర్పించాలి. తోటివారిని ప్రేమించడం నేర్పించాలి.
నిష్కపటంగా మాట్లాడండి
రోజూ పిల్లలతో మాట్లాడండి. వాళ్ళు తమ రోజు గురించి చెప్పినప్పుడు వినాలి. అప్పుడే మీపై వాళ్ళకు నమ్మకం పెరుగుతుంది. వాళ్ళ ఆలోచనలు మీతో పంచుకోవడానికి కంఫర్ట్ గా ఫీల్ అవుతారు