పిల్లలు ఫోన్ లో అస్సలు చూడకూడనివి ఇవే..!

ఈ రోజుల్లో పిల్లలు అందరూ స్మార్ట్ ఫోన్లకు బానిసలుగా మారిపోతున్నారు. దీని కారణంగా మొండిగా తయారౌతున్నారు. చదువులోనూ వెనకపడుతున్నారు. మరి, పిల్లలతో ఈ అలవాటు మాన్పించాలంటే ఏం చేయాలో ఇప్పుడు తెలుసుకుందాం..    

ఈరోజుల్లో స్మార్ట్ ఫోన్ వాడనివారు ఎవరూ ఉండటం లేదు. ఇంట్లో నలుగురు మనుషులు ఉంటే.. నలుగురికి ఒక ఫోన్ ఉంటుంది. ఇంట్లో పేరెంట్స్ కి ఫోన్ ఉంటే.. పిల్లలకు ఈజీగానే ఆ ఫోన్ లకు అలవాటు పడుతున్నారు. బయట ఆడుకునేవారి కంటే, ఫోన్ లో టైమ్ పాస్ చేసే పిల్లలే ఎక్కువయ్యారు. నిజానికి, ఫోన్ నుంచి పిల్లలు చాలా విషయాలు నేర్చుకుంటున్నప్పటికీ, దాని వల్ల వారి చదువు, ఆరోగ్యం దెబ్బతినే అవకాశం చాలా ఎక్కువగా ఉంది. 

పిల్లలు ఫోన్ కి ఎంత బానిసగా మారిపోయారు అంటే.. అది ఇవ్వకుంటే దారుణంగా ప్రవర్తిస్తున్నారు. హింసకు కూడా వెనకాడటం లేదు. రీసెంట్ గా ఓ పిల్లాడు ఫోన్ కోసం తల్లిని క్రికెట్ బ్యాట్ తో కొట్టాడట. తల్లిని కొట్టి.. ఆ తర్వాత ఫోన్ లో గేమ్స్ ఆడుకున్నాడట. ఈ వీడియో నెట్టింట వైరల్ గా మారింది. ఈ స్థితిలో కి చేరుకోక ముందే పిల్లలకు  ఫోన్ లకు బానిసగా మారకుండా, లైన్ లో  పెట్టాలి. అదెలాగో ఇప్పుడు చూద్దాం..

పిల్లల్లో స్మార్ట్‌ఫోన్ వ్యసనం

అశ్రద్ధ 

ఫోన్లు మనసును లాక్కుంటాయి. పిల్లలు చదవాలని ప్రయత్నిస్తున్నప్పుడు, గేమ్ యాప్స్ నోటిఫికేషన్స్ వాళ్ళని పక్కదారి పట్టిస్తాయి. ఇలా పదే పదే పిల్లల మనసు ఫోన్ వైపు మళ్ళడం వల్ల చదువుల్లో ఆసక్తి తగ్గుతుంది.

దీన్ని నివారించడానికి పిల్లలు చదువుకు కూర్చుంటే ఫోన్‌ని సైలెంట్ మోడ్ లేదా DND (Do Not Disturb)లో పెట్టండి. దీన్ని పిల్లలకు కూడా చెప్పాలి. మీ ఫోన్‌ని పిల్లలు ఎంతసేపు వాడాలి, యాప్స్‌కి పరిమితులు ఎలా పెట్టాలో కూడా చెప్పాలి.

గేమ్స్‌కి బానిసలు: 

పిల్లలు ఎక్కువగా ఫోన్ వాడితే ఆన్‌లైన్ గేమ్స్‌కి బానిసలవుతారు. దీనివల్ల చదువుకునే సమయం తగ్గుతుంది. కొంతమంది పిల్లలు రాత్రి పూట కూడా నిద్ర లేకుండా ఆడతారు. ఇది ఆరోగ్యానికి మంచిది కాదు. తినడం కూడా మానేసి గేమ్స్‌లో మునిగిపోతారు.

ఇలా పెరిగే పిల్లలు క్లాసులో శ్రద్ధ పెట్టరు. అందుకే స్కూల్ రోజుల్లో, రాత్రిళ్ళు పిల్లలు గేమ్స్ ఆడితే తల్లిదండ్రులు సమయ పరిమితులు విధించాలి. రాత్రి పడుకునే ముందు ఫోన్ వాడకుండా పుస్తకం చదవడం అలవాటు చేయించాలి.

సోషల్ మీడియా: 

ఇన్‌స్టాగ్రామ్, యూట్యూబ్ వంటి యాప్స్‌లో గంటల తరబడి వీడియోలు చూడడం మంచిది కాదు. ఇది సమయం వృధా. పిల్లల చదువు సమయం మాత్రమే కాదు, మానసిక ఆరోగ్యం కూడా దెబ్బతింటుంది. ఈ వీడియోలు చూసే అలవాటు వల్ల పిల్లలు ఇతరులతో తమని తాము పోల్చుకునే అవకాశం ఉంది. దీనివల్ల ఒత్తిడి కూడా రావచ్చు. మీ పిల్లలు యూట్యూబ్ షార్ట్స్ వంటి సోషల్ మీడియాలో ఎక్కువ వీడియోలు చూస్తుంటే వాటి లాభనష్టాల గురించి తల్లిదండ్రులు చెప్పాలి. వాళ్ళ వాడకం సమయాన్ని తగ్గించాలి. 

ఫోన్‌లో హోంవర్క్: 

ఫోన్‌లో మనకు కావాల్సిన చాలా సమాచారం ఉంది. ఏ విషయం గురించైనా ఇంటర్నెట్‌లో తెలుసుకోవచ్చు. కానీ దీన్నే నమ్ముకుంటే చదువుకు ఉపయోగం ఉండదు. ఫోన్‌ని చదువుకు ఉపయోగకరమైన సాధనంగా ఎలా వాడాలో తల్లిదండ్రులు పిల్లలకు చెప్పాలి. ఫోన్ సాయం లేకుండా హోంవర్క్ చేయడానికి పిల్లల్ని ప్రోత్సహించాలి.  

రాత్రిపూట స్క్రీన్ టైమ్: 

రాత్రిళ్ళు ఫోన్లు ఎక్కువగా వాడితే ఆరోగ్యం దెబ్బతింటుంది. రాత్రిళ్ళు మన శరీరం విశ్రాంతి తీసుకుంటుంది. ఆ సమయంలో పిల్లలు ఫోన్‌లో మునిగితే ఫోన్ స్క్రీన్ నుండి వచ్చే నీలి కాంతి నిద్ర చక్రాన్ని దెబ్బతీస్తుంది. ఇలా విశ్రాంతి లేకుండా ఉండడం వల్ల స్కూల్‌లో అలసట, చదువుల్లో అశ్రద్ధ వస్తాయి. పిల్లలు పడుకునే ముందు ఒక గంట ముందు నుండి ఫోన్ ఇవ్వకూడదు.  

అనవసరమైన యాడ్స్: 

పిల్లలు ఫోన్ చూడడాన్ని సరిగ్గా గమనించకపోతే ఇంటర్నెట్‌లో అసభ్యకరమైన, అనవసరమైన విషయాలు చూసే అవకాశం ఉంది. దానివల్ల చదువుల్లో అశ్రద్ధ రావచ్చు. కొంతమంది పిల్లలకు మానసిక ఆరోగ్యం దెబ్బతింటుంది. పిల్లలు వాడే ఫోన్లలో సమాచారాన్ని ఫిల్టర్ చేయడానికి తల్లిదండ్రులు సెట్టింగ్స్ చూడాలి. ఇంటర్నెట్‌ని సురక్షితంగా వాడడం పిల్లలకు నేర్పించాలి. వాళ్ళకు ఏమైనా బాధ ఉంటే తెలుసుకుని వాళ్ళకి సలహాలు ఇవ్వాలి.