ప్రధాని మోదీ మొదట రాజకీయ జెండా పట్టింది ఈయనకోసమే ... ఎవరీ బసంత్ భాయ్?

ప్రధాని నరేంద్ర మోదీ తన చిన్నతనంలోనే చేసిన రాజకీయ ప్రచారాన్ని గుర్తుచేసుకున్నారు. తెలిసీతెలియని వయసులో తాను ఓ మంచివ్యక్తి కోసం రాజకీయ జెండా పట్టానని అన్నారు. ఇంతకూ ప్రధాని ఎవరికోసం ప్రచారం చేసారో తెలుసా? 

PM Modi Podcast

PM Modi Podcast: ప్రధానమంత్రి నరేంద్ర మోదీ ప్రముఖ స్టాక్ బ్రోకరేజ్ సంస్థ 'జెరోధా' సహ వ్యవస్థాపకులు నిఖిల్ కామత్ నిర్వహించే పాడ్ కాస్ట్ లో పాల్గొన్నారు. ఈ సందర్భంగా తన రాజకీయ, పాలనా వ్యవహారాల గురించే కాదు వ్యక్తిగత విషయాల గురించి కూడా ప్రధాని పంచుకున్నారు. తనకు చిన్నప్పుడు రాజకీయాలపై ఎలా మక్కువ పెరిగిందో ప్రధాని మోదీ వివరించారు. 

ప్రస్తుత రాజకీయాల్లో డబ్బు, నాయకులపై అవినీతి ఆరోపణల ప్రధాని స్పందించారు.ఈ క్రమంలోనే రాజకీయాల్లో మంచి వ్యక్తులకు కూడా స్థానం ఉంటుందని... ప్రజలు వారిని నమ్ముతారని ప్రధాని తెలిపారు. ఇలా తన చిన్నతనంలో ఓ మంచి నాయకుడికి ప్రజలు పట్టం కట్టారని... ఆయన కోసం తెలిసీతెలియనివయసులో తానుకూడా పనిచేసానని ప్రధాని మోదీ వివరించారు.

మొదటిసారి రాజకీయ జెండాపట్టింది ఆయనకోసమే : మోదీ 

నిఖిల్ కామత్ పాడ్ కాస్ట్ ఇంటర్వ్యూలో ప్రధాని మోదీ తన చిన్నప్పటి సంఘటనను గుర్తుచేసుకున్నారు. గుజరాత్ లోని వాద్ నగర్ లో తాను పుట్టిపెరిగానని... చిన్నతనంలో ఆ ఊళ్లో బసంత్ భాయ్ పారిఖ్ అనే ఒక వైద్యుడు ఉండేవారని గుర్తుచేసారు. ఆయన కంటి వైద్య నిపుణుడు... మంచి వక్త, హిందీ, గుజరాతీలో అనర్గళంగా మాట్లాడగరు. ప్రజలకు సేవ చేయాలని ఆయన తాపత్రయపడేవారు. ఈ క్రమంలోనే ఒకసారి స్వతంత్ర అభ్యర్థిగా ఎన్నికల్లో పోటీ చేయాలని నిర్ణయించుకున్నారని ప్రధాని తెలిపారు.

ఆయన కోసం మొదటిసారి తాను ఎన్నికల ప్రచారంలో పాల్గొన్నానని... స్నేహితులమంతా కలిసి వానరసేనలా మారి జెండా పట్టుకుని ఆయన వెంట తిరిగామని ప్రధాని గుర్తుచేసుకున్నారు. ఆయన ప్రజల నుండి ఎన్నికల కోసం ఒక్కో రూపాయి తీసుకున్నారని... ఆ తర్వాత ఒక బహిరంగ సభలో ఆ డబ్బుల లెక్క చెప్పారని ప్రధాని తెలిపారు. మొత్తం రెండువందల యాభై రూపాయలు వచ్చాయని... ఆ మొత్తాన్ని ఎలా ఖర్చుచేసింది డాక్టర్ బసంత్ భాయ్ వివరించారని ప్రధాని తెలిపారు.

ఈ ఎన్నికల్లో చాలా తక్కువ ఓట్లతో బసంత్ భాయ్ గెలిచారు... కానీ గెలిచారని ప్రధాని మోదీ వెల్లడించారు. ఈ స్టోరీ ఎందుకు చెబుతున్నానంటే ఆయన చాలామంది వ్యక్తి... కానీ చాలా తక్కువ ఓట్లతో గెలిచారు. ఇలా ప్రజలకు సేవ చేయాలనే ఆయన ప్రయత్నం ఫలించిందన్నారు.  

రాజకీయాలకు అర్థం చెప్పిన ప్రధాని :

రాజకీయాలను ఎన్నికలు, ఎమ్మెల్యే, ఎంపీగా విభజించారని ప్రధాని అన్నారు. కానీ మనం సామాజిక జీవితానికి సంబంధించిన ఏ పనిలో పాల్గొన్నా అది రాజకీయ ప్రభావాన్ని చూపుతుందన్నారు. ఎవరైనా ఒక చిన్న ఆశ్రమాన్ని నిర్వహిస్తున్నా, బాలికల విద్య కోసం పనిచేస్తున్నా, స్వయంగా ఎన్నికల్లో పోటీ చేయకపోయినా వారి ప్రయత్నాల ఫలితంగా రాజకీయ ఫలితం మారుతుందన్నారు. 

రాజకీయాలను వేరే కోణంలో చూడాలని... ఇందులో ఓటరు కూడా ఒక రాజకీయ నాయకుడని ప్రధాని అన్నారు. తన ఓటు వేసినప్పుడు ఎవరికి ఇవ్వాలి, ఎవరికి ఇవ్వకూడదనే భావన సగటు ఓటర్ కు ఉంటుందన్నారు. ఎవరికి ఎందుకు ఓటు వేయకూడదో స్పష్టత వుంటుందని...బయటకు చెప్పకున్నా మనసులో ఒక భావన ఉంటుందన్నారు ప్రధాని మోదీ.