Clay pot: మట్టికుండను ఇలా శుభ్రం చేశాకే దాన్ని వాడండి, నీళ్లు చల్లగా తాజాగా ఉంటాయి
Clay pot: వేసవిలో మట్టి కుండను అధికంగా వాడుతారు. నిజానికి ఫ్రిజ్ కన్నా మట్టి కుండ వాడడమే ఆరోగ్యకరం. అయితే మట్టి కుండను వాడేముందు ఎలా క్లీన్ చేయాలో తెలుసుకోండి. ఇక్కడ కొన్ని చిట్కాలు ఇచ్చాము.
చల్లని నీళ్ల కోసం మట్టికుండ
వేసవికాలం వచ్చేసింది. చల్లని నీళ్ల కోసం ఎంతోమంది మట్టి కుండ తెచ్చుకుంటారు. కానీ చాలా మంది ఫ్రిజ్ నీళ్లు తాగుతూ ఉంటారు. ఈ నీళ్ల కన్నా మట్టికుండలో నిల్వ చేసిన నీళ్లు తాగడమే ఆరోగ్యం. మట్టికుండలో నీళ్లు సహజంగా చల్లగా ఉండటంతో పాటు ఆరోగ్యానికి కూడా మంచివని చెబుతారు. అయితే మట్టికుండను సరిగ్గా శుభ్రం చేయకపోతే నీటిలో దుర్వాసన రావడం, రుచి మారడం, బ్యాక్టీరియా పెరగడం వంటి సమస్యలు తలెత్తుతాయి. అయితే మట్టికుండను ఉపయోగించే ముందు దాన్ని శుభ్రపరచుకోవాలి. ముఖ్యంగా వేసవిలో ఎక్కువ కాలం పాటూ నీరు నిల్వ చేయడం వల్ల కుండ త్వరగా మురికి పడే అవకాశం ఉంటుంది.
వేటితో శుభ్రం చేయాలి?
మట్టికుండను వాడే ముందు పరిశుభ్రం చేసుకోవాలి. కుండను వాడేటప్పుడు ప్రతి 2 నుంచి 3 రోజులకు ఒకసారి కుండను క్లీన్ చేయడం ఉత్తమం. ఇలా చేయడం వల్ల కుండలో ఉండే మలినాలు, వాసనలు తొలగిపోతాయి. కుండను శుభ్రం చేసే సమయంలో సబ్బులు, కెమికల్ క్లీనర్లు వాడకూడదు. ఇవి కుండలోని రంధ్రాలలో ఇరుక్కుపోయి నీటి రుచిని చెడగొడతాయి. అందుకే సహజ పదార్థాలు వాడాలి. నిమ్మరసం, ఉప్పు లేదా బేకింగ్ సోడా వంటివి ఉపయోగిస్తే కుండలోని మురికి సులభంగా తొలగిపోతుంది. ముందుగా కుండలో నీరు పోసి కొద్దిసేపు నానబెట్టి, తర్వాత ఈ పదార్థాలతో మెల్లగా రుద్దితే మంచి ఫలితం కనిపిస్తుంది.
కొత్త కుండ అయితే
శుభ్రం చేసిన తర్వాత కుండను బాగా కడిగి పూర్తిగా ఆరబెట్టాలి. కుండలో తడి ఉండగానే నీరు పోయకూడదు. కుండ లేదా కుండలోని నీరు దుర్వాసన వచ్చే అవకాశం ఉంది. కాబట్టి కుండను నీడలో పూర్తిగా ఆరిన తర్వాత మాత్రమే ఉపయోగించాలి. అలాగే కొత్తగా కొనుగోలు చేసిన మట్టికుండ అయితే దాన్ని వెంటనే వాడకూడదు. దాన్ని కనీసం 24 గంటలు నీటిలో నానబెట్టి, తర్వాత బాగా కడిగి ఉపయోగించాలి. ఇలా చేయడం వల్ల మట్టిలో ఉన్న దుమ్ము, మలినాలు తొలగిపోతాయి. దీంతో నీటి రుచి కూడా బావుంటుంది.
మట్టికుండ ఎక్కడ పెట్టాలి?
మట్టికుండను ఇంట్లో ఎక్కడ పెట్టాలన్నది కూడా ఎంతో ముఖ్యం. కుండను ఎప్పుడూ శుభ్రమైన, గాలి వచ్చే ప్రదేశంలో ఉంచాలి. కింద నుంచి కూడా గాలి ప్రసారం అయ్యేలా స్టాండ్పై కుండను ఉంచితే మంచిది. కుండపై మూత పెట్టడం కూడా అవసరం. దీనివల్ల దుమ్ము పడకుండా ఉంటుంది. మట్టికుండలో నీళ్లు ఆరోగ్యకరంగా ఉండాలంటే శుభ్రంగా ఉంచడం మంచిది. ఈ చిన్న చిన్న చిట్కాలు పాటిస్తే వేసవిలో చల్లటి, శుభ్రమైన నీటిని తాగవచ్చు.
