పిల్లల్లో కంటి చూపు సమస్యలకు సెల్ ఫోన్లే కారణం కాదు.. ఇవి కూడా కావచ్చు
ఈ కాలం పిల్లలు చిన్న వయసులోనే కంటి చూపు సమస్యలను ఎదుర్కొంటున్నారు. అందరూ ఎలక్ట్రానిక్ వస్తువులే కారణం అని అనుకుంటారు. కాని దీనికి చాలా కారణాలు ఉన్నాయి. అవేంటో వివరంగా ఇప్పుడు చూద్దాం.
నెలలు నిండకుండా పుట్టడం
పిల్లల్లో కంటి చూపు సమస్యలకు చాలా కారణాలున్నాయి. పుట్టుకతోనే రావచ్చు లేదా తర్వాత వచ్చే అవకాశాలు ఎక్కువగా ఉంటాయి.
నెలలు నిండకుండా పుట్టిన పిల్లలకు 'రెటినోపతి ఆఫ్ ప్రీమెచ్యూరిటీ (ROP)' అనే కంటి సమస్య వచ్చే అవకాశం ఎక్కువ అని డాక్టర్లు చెబుతున్నారు. కంటిలోని రెటీనా పూర్తిగా డెవలప్ అవ్వకపోవడం వల్ల ఇలా జరుగుతుంది. దీనివల్ల కంటి చూపు దెబ్బతింటుంది. కొన్నిసార్లు అంధత్వానికి కూడా దారితీస్తుంది.
జనటికల్ గా కూడా రావచ్చు
కొన్ని కంటి సమస్యలు వంశపారంపర్యంగా వస్తాయి. కలర్ బ్లైండ్నెస్, గ్లాకోమా, రెటినిటిస్ పిగ్మెంటోసా వంటివి తల్లిదండ్రుల నుంచి పిల్లలకు సంక్రమించే అవకాశం ఉంది.
ఇన్ఫెక్షన్లు
గర్భధారణ సమయంలో తల్లికి వచ్చే ఇన్ఫెక్షన్లు కూడా పిల్లల కళ్ళను ప్రభావితం చేస్తాయి. రూబెల్లా, టాక్సోప్లాస్మోసిస్, సైటోమెగాలోవైరస్ వంటి వైరస్ ఇన్ఫెక్షన్లు పిల్లల కంటి చూపును దెబ్బతీస్తాయి. పుట్టిన తర్వాత వచ్చే కొన్ని ఇన్ఫెక్షన్లకు సరిగ్గా చికిత్స చేయకపోతే కంటి చూపు సమస్యలు వస్తాయి.
పోషకాహార లోపం
విటమిన్ ఎ లోపం పిల్లల్లో కంటి చూపు సమస్యలకు ఒక ముఖ్య కారణం. విటమిన్ ఎ లోపం రాత్రిపూట కంటి చూపు సమస్యలను కలిగిస్తుంది. కొన్నిసార్లు కార్నియా డ్రై అయిపోయి అంధత్వానికి దారితీస్తుంది.
ఇవే కాకుండా మయోపియా (దగ్గర చూపు), హైపర్మెట్రోపియా (దూర చూపు), ఆస్టిగ్మాటిజం వంటివి పిల్లల్లో సాధారణంగా కనిపించే కంటి సమస్యలు. సరైన కళ్ళద్దాలు వాడితే సరిపోతుంది. చికిత్స చేయకపోతే చదువులో వెనుకబడిపోవడం, 'లేజీ ఐ' వంటి సమస్యలు వస్తాయి.
నాడీ సంబంధిత సమస్యలు
మెదడుకు సంబంధించిన సమస్యలు కూడా పిల్లల కంటి చూపును ప్రభావితం చేస్తాయి. ఉదాహరణకు మెదడుకు గాయం లేదా మెదడు అభివృద్ధి లోపాలు కంటి చూపు సమస్యలకు దారితీస్తాయి.
కేటరాక్ట్
సాధారణంగా పెద్దవారిలో వచ్చే కేటరాక్ట్ (కంటి తెర), కొంతమంది పిల్లలకు పుట్టుకతోనే వస్తుంది. దీనివల్ల కంటిలోని లెన్స్ మసకబారి, చూపు మసకబారుతుంది. సర్జరీ ద్వారా దీన్ని సరిచేయవచ్చు.
నివారణ, గుర్తింపు
గర్భధారణ సమయంలో తల్లి ఆరోగ్యం, పోషకాహారం చాలా ముఖ్యం. తల్లికి వచ్చే ఇన్ఫెక్షన్లకు సరైన చికిత్స తీసుకోవడం వల్ల పిల్లల కళ్ళను కాపాడుకోవచ్చు.
విటమిన్ ఎ లోపం ఉన్న పిల్లలకు సప్లిమెంట్స్ ఇవ్వడం ద్వారా కంటి చూపు సమస్యలను నివారించవచ్చు.
పిల్లలకు క్రమం తప్పకుండా కంటి పరీక్షలు చేయించుకోవాలి. పాఠశాలలో చేరడానికి ముందు కంటి పరీక్ష చేయించుకోవడం చాలా ముఖ్యం.
పిల్లలు ఆడుకునేటప్పుడు కళ్ళకు రక్షణగా ఉండే కళ్ళద్దాలు లేదా హెల్మెట్ ధరించడం వల్ల కంటికి గాయాలు కాకుండా చూసుకోవచ్చు.
ఎక్కువసేపు సెల్ఫోన్, ట్యాబ్లెట్ లేదా కంప్యూటర్ స్క్రీన్లను చూడటం వల్ల పిల్లల కళ్ళపై ఒత్తిడి పెరుగుతుంది. అవసరమైనంత వరకే స్క్రీన్ టైమ్ ఇవ్వాలి.