Motivational story: మూర్ఖులతో ఎందుకు వాదించకూడదో తెలుసా? గాడి, కుక్క చదివితే మీకే అర్థమవుతుంది

కథలు మన ఆలోచన విధానాన్ని మారుస్తుంటాయి. అందుకే మన పెద్దలు చెప్పే కథలను చిన్నప్పుడు ఎంతో ఆసక్తిగా వింటాం. చిన్న కథలో జీవితానికి సరిపడే సారం ఉంటుంది. అలాంటి ఒక మంచి కథ గురించి ఈరోజు తెలుసుకుందాం..  

Telugu story

మూర్ఖులతో వాదించకూడదని పెద్దలు చెబుతుంటారు. తమది తప్పని తెలిసినా కొందరు తామే కరెక్ట్‌ అని వాదిస్తుంటారు. అలాంటి వారితో వీలైనంత వరకు దూరంగా ఉండాలని సూచిస్తుంటారు. మూర్ఖులతో వాదనకు దూరంగా ఉండడం ఎంత అవసరమో ఒక కథ చక్కగా వివరిస్తుంది. ఇంతకీ ఏంటా కథ.? అందులో ఉన్న నీతి ఏంటో ఇప్పుడు తెలుసుకుందాం.. 

ఒక అడవిలో గాడిద, కుక్క ఉంటాయి. గాడిద గడ్డిని చూసి అది నీలం రంగులో ఉందని అంటుంది. అది విన్న కుక్క గడ్డి నీలం రంగులో ఉండడం ఏంటి.? అది పచ్చగా ఉంది అంటుంది. అయితే గాడిద మాత్రం ససేమిరా అంటుంది. గడ్డి నీలం రంగులోనే ఉందని వాదిస్తుంటుంది. దీంతో ఇద్దరు కలిసి అడవికి రాజైన సింహం దగ్గరికి వెళ్తారు. జరిగిందంతా చెబుతారు. 

అదంతా విన్న సింహం కుక్కకు శిక్ష విధిస్తున్నట్లు తీర్పునిచ్చి గాడిదను అక్కడి నుంచి వెళ్లిపోమ్మంటుంది. కుక్క ఒక్కసారిగా షాక్‌ అవుతుంది. 'అదేంటి.. రాజా! గాడిదను శిక్షించాల్సింది పోయి నన్ను శిక్షిస్తున్నావు. గడ్డి నీలం రంగులో ఉండదని మీక్కూడా తెలుసుకాదా? ఇలాంటి తీర్పు ఇచ్చారేంటి అంటూ బాధపడుతుంది. దీనికి సింహం బదులిస్తూ.'ఆ గాడిద తెలివి తక్కువదనే విషయం నీకు వెంటనే అర్థమై ఉండాలి. అలాంటి గాడిదతో వాగ్వాదం చేయడం నీ తప్పు. దీనికోసం నా దగ్గరికి రావడం ఇంకో తప్పు. నీకు శిక్ష వేసింది గడ్డి రంగు గురించి కాదు. తెలివి తక్కువ గాడిదతో వాగ్వాదానికి దిగినందుకు' అని చెబుతుంది. దీంతో కుక్కకు అసలు విషయం అర్థమవుతుంది. 

నీతి: మన చుట్టూ కూడా ఇలాంటి గాడిదలాంటి మనుషులు కొందరు ఉంటారు. ప్రతీ చిన్న విషయానికి వాదిస్తుంటారు. తమది తప్పని తెలిసినా మూర్ఖత్వంగా వాగ్వాదానికి దిగుతుంటారు. అలాంటి వారితో వీలైనంత వరకు దూరంగా ఉండాలి. లేదంటే నువ్వే కరెక్ట్‌ అని చెప్పి అక్కడి నుంచి వెళ్లిపోవాలి. అంతే తప్ప అలాంటి వారితో వాదిస్తూ మీ సమయాన్ని వృధా చేసుకోవడం పెద్ద తప్పు.