పొడవైన జుట్టు కావాలా? అయితే ఇలా చేయండి

జుట్టు సంరక్షణలో ఏ మాత్రం అజాగ్రత్తగా ఉన్నా జుట్టు విపరీతంగా ఊడిపోతుంది. చుండ్రు కూడా వస్తుంది. అయితే జీవన శైలిలో కొన్ని మార్పులు చేసుకుంటే మీ జుట్టు బలంగా, పొడుగ్గా పెరుగుతుంది.  

hair care

స్ట్రాంగ్, పొడవాటి జుట్టు ఉండాలని ప్రతి అమ్మాయి ఆశపడుతుంది. అందుకోసం ఎన్నెన్నో చేస్తుంటారు. కానీ ప్రస్తుతం చాలా మంది జుట్టు రాలడం, చుండ్రు, వెంట్రుకలు తెగిపోవడం వంటి సమస్యలతో బాధపడుతున్నారు. నిజానికి జుట్టు రాలడానికి ఎన్నో కారణాలు ఉన్నాయి. జుట్టు సంరక్షణలో చిన్న అజాగ్రత్త కూడా ఎన్నో జుట్టు సమస్యలను కలిగిస్తుంది. అయితే మీరు కొన్ని జీవనశైలిలో మార్పులు చేసుకుంటే మీ జుట్టు అందంగా, పొడుగ్గా పెరుగుతుంది. ఇందుకోసం ఏం చేయాలంటే?

తలకు మసాజ్

రోజూ కాసేపు తలకు మసాజ్ చేయడం మర్చిపోకండి. ఎందుకంటే ఇది మీ జుట్టు పొడుగ్గా పెరిగేలా చేస్తుంది. అందులో గోరు వెచ్చని నూనెతో మసాజ్ చేయండి. ఇది మీ నెత్తిమీద రక్త ప్రసరణను పెంచుతుంది. అలాగే జుట్టు వృద్ధి చెందడానికి సహాయపడుతుంది.

తలస్నానం

తలకు నూనె రాసుకుని స్నానం చేయడం అలవాటు చేసుకోండి. ఇలా వారానికి ఒకసారి చేయండి. ఇది జుట్టు సహజత్వాన్ని నిర్వహించడానికి, జుట్టు ఆరోగ్యంగా ఉండేందుకు సహాయపడుతుంది. 

అవసరమైన పోషకాలు

జుట్టు పెరిగేందుకు పోషకాలు ఎక్కువగా ఉండే ఆహారాన్ని ఖచ్చితంగా తినండి. ప్రోటీన్లు, విటమిన్ ఎ, విటమిన్ బి, విటమిన్ సి, విటమిన్ డి, విటమిన్ ఇ లు ఎక్కువగా ఉండే ఆహారాలను తినండి. ఆకుకూరలు, బీన్స్, చిన్న చేపలు, చికెన్ లో మీ జుట్టుకు అవసరమైన పోషకాలు పుష్కలంగా ఉంటాయి. 

హెయిర్ కట్టింగ్

జుట్టును కత్తిరించుకోవడం వల్ల కూడా మీ జుట్టు బాగా పెరుగుతుంది. ప్రతి మూడు నెలలకోసారి జుట్టును కత్తిరించుకోవడం మంచిదని నిపుణులు చెబుతున్నారు. ఇది జుట్టు చివరలు విచ్ఛిన్నం కాకుండా నిరోధిస్తుంది. దీంతో మీ జుట్టు బాగా పెరుగుతుంది. 

షాంపూ

ప్రతిరోజూ షాంపూతో తలస్నానం చేయడం వల్ల జుట్టు ఆరోగ్యం దెబ్బతింటుంది. మీకు తెలుసా..? షాంపూను వారానికి రెండు లేదా మూడు రోజులు మాత్రమే ఉపయోగించాలి. షాంపూ ను ఎక్కువగా ఉపయోగించడం వల్ల జుట్టు పెరగడానికి సహాయపడే సహజ నూనె తగ్గిపోతుంది. షాంపూ చేసిన తర్వాత కండీషనర్ వాడటం మర్చిపోకండి. 

దువ్వడం

స్నానం చేసిన వెంటనే జుట్టును ఎట్టి పరిస్థితిలో దువ్వకండి. ఎందుకంటే తడిగా ఉన్న జుట్టును దువ్వడం వల్ల జుట్టు బాగా రాలిపోతుంది. అలాగే హెయిర్ డ్రయ్యర్ తో జుట్టును ఆరబెట్టే అలవాటు కూడా మంచిది కాదు.

హెయిర్ మాస్క్

నేచురల్ హెయిర్ మాస్క్ లను తయారు చేసే ముందు జుట్టు స్వభావంపై కూడా అవగాహన ఉండాలి. కొన్నిసార్లు మీరు ఎంచుకున్న వస్తువులు మీ జుట్టు స్వభావానికి ఏమాత్రం సరిపోకపోవచ్చు. ఇలాంటి ప్రయోగాలు జుట్టు ఆరోగ్యంపై ప్రభావం చూపుతాయి.