పరీక్ష లేకుండానే సెంట్రల్ గవర్నమెంట్ జాబ్ ... నెలకు రూ.80,000 జీతం...!!

ప్రభుత్వ రంగ సంస్థలో ఉద్యోగం... అది కూడా ఎలాంటి రాతపరీక్ష లేకుండానే పొందే అవకాశం. ఈ అద్భుత అవకాశాన్ని ఆయిల్ ఇండియా లిమిటెడ్ సంస్థ కల్పిస్తోంది. ఈ సంస్థ పలు ఉద్యోగాల భర్తీకి నోటిఫికేషన్ విడుదల చేసింది. కేవలం ఇంటర్వ్యూ ద్వారానే ఈ ఉద్యోగాలను భర్తీచేయనున్నట్లు ఆ సంస్థ ప్రకటించింది. 
 

ఆయిల్ ఇండియా కంపనీ భారీ జీతభత్యాలతో ఇంజనీర్స్ నియామక ప్రక్రియ చేపట్టింది. పోస్టులు చాలా తక్కువే అయినా... ఎలాంటి రాతపరీక్ష లేకపోవడంతో అర్హత కలిగిన ప్రతిఒక్కరు ఈ జాబ్ కోసం ప్రయత్నించవచ్చు. కేవలం ఇంటర్వ్యూలో  ప్రతిభ కనబరిస్తే ఈ ఉద్యోగం మీ సొంతం అవుతుంది. 
 

ఇలా ఆయిల్ ఇండియా కంపనీలో మొత్తం 7 పోస్టుల భర్తీ ప్రక్రియ కొనసాగుతోంది. ఇందులో కెమిస్ట్ 2, డ్రిల్లింగ్ ఇంజనీర్ 2, సివిల్ ఇంజనీర్ 1, జియాలజిస్ట్ 2 పోస్టులున్నాయి. ఈ ఉద్యోగాలకు సంబంధించిన పూర్తి వివరాల కోస కంపనీ అధికారికి వెబ్ సైట్ www.oil-india.com పరిశీలించండి.   
 

విద్యార్హతలు‌-వయో పరిమితి :

కెమిస్ట్ : 

ఈ ఉద్యోగానికి ఏదయినా గుర్తింపుపొందిన యూనివర్సిటీ నుండి కెమిస్ట్రిలో పోస్ట్ గ్రాడ్యుయేషన్ చేసినవారు అర్హులు. లేదంటే కెమికల్, పెట్రోలియం,మెకానికల్ ఇంజనీరింగ్ పూర్తిచేసి వుండాలి. రెండేళ్ల అనుభవం వుండాలి. 

పైన పేర్కొన్న విద్యార్హతలు కలిగి 24-50 ఏళ్లలోపువారు ఈ జాబ్ కోసం ప్రయత్నించవచ్చు. ఈ ఉద్యోగానికి ఎంపికయితే నెలకు రూ.70 వేల జీతం పొందవచ్చు. 
 

డ్రిల్లింగ్ ఇంజనీర్ : 

పెట్రోలియంలో బ్యాచిలర్ డిగ్రీ లేదా నాలుగేళ్ల మెకానికల్ ఇంజనీరింగ్ చేసి వుండాలి. అలాగే మూడేళ్లు పాటు గ్యాస్ ఇండస్ట్రీ లేదా ఆయిల్ కంపనీలో ఉద్యోగానుభవం వున్నవారు ఈ ఉద్యోగాలకు అర్హులు.  

20-40 ఏళ్లలోపు వయసున్నవారు అర్హులు. ఈ ఉద్యోగానికి ఎంపికైనవారికి నెలకు రూ.80,000 సాలరీ వస్తుంది. 
 

జియాలజిస్ట్ :

జియాలజీలో పిజి చేయడంతో పాటు రెండేళ్లపాటు గుర్తింపు పొందిన సంస్థలో అప్లైడ్ జియాలజీ చేసివుండాలి. అలాగే మూడేళ్ల అనుభవం వుండాలి. ఈ అర్హతలు కలిగి 24-40 ఏళ్లలోపు వయసుండాలి. ఈ ఉద్యోగం పొందినవారికి ప్రతినెలా రూ.80 వేల జీతం వస్తుంది. 

సివిల్ ఇంజనీర్ : 

గుర్తింపు పొందిన సంస్థలో నాలుగేళ్ల సివిల్ ఇంజనీరింగ్ కోర్సు చేసివుండాలి. మూడేళ్ళ అనుభవం వుండాలి. 24-40 ఏళ్లలోపు వయసుండాలి. ఈ పోస్ట్ కు ఎంపికైనవారికి నెలకు రూ.70 వేల సాలరీ అందుతుంది. 
 

ఇంటర్వ్యూ : 

పైన పేర్కొన్న అర్హతలు కలిగినవారు ఈ నెల అంటే ఆగస్ట్ 16, 2024 న ఇంటర్వ్యూకు హాజరుకావాల్సి వుంటుంది. ఒడిశా రాష్ట్రంలోని భువనేశ్వర్ లో గల  మహానది బేసిన్ ప్రాజెక్ట్, ఆయిల్ ఇండియా లిమిటెడ్,  IDCO టవర్స్ మూడో అంతస్తులో ఈ ఇంటర్వ్యూ వుంటుంది. విద్యార్హతలతో పాటు నోటిఫికేషన్ లో పేర్కొన్న పత్రాలతో (ఒరిజినల్స్) ఉదయం 9 గంటల నుండి 11 గంటల వరకు రిజిస్ట్రేషన్ చేసుకోవాలి. ఆ తర్వాత ఇంటర్వ్యూ వుంటుంది.