సమ్మర్ లో ఎలాంటి రోగాలు రాకూడదంటే..?
మండుతున్న ఎండల వల్ల శరీరంలో ఉష్ణోగ్రత పెరిగిపోతుంది. దీనివల్ల ఎన్నో అనారోగ్య సమస్యలు వస్తాయి. అయితే కొన్నిచిట్కాలను పాటిస్తే ఈ సీజన్ లో మీరు ఎలాంటి రోగాలు లేకుండా ఆరోగ్యంగా ఉంటారు.
సీజన్ తో పాటుగా ఆహారపు అలవాట్లను మార్చుకోవాలి. అలాగే ఎన్నో ఆరోగ్య జాగ్రత్తలు కూడా తీసుకోవాలి. లేదంటే ఎండాకాలంలో ఎన్నో అనారోగ్య సమస్యలు కూడా వస్తాయి. నిర్జలీకరణం, ఊబకాయం, రక్తంలో చక్కెర స్థాయిలు పెరగడం, బీపీ ఎక్కువ కావడం వంటి సమస్యలు రాకూడదంటే ఈ సీజన్ లో కొన్ని చిట్కాలను తప్పక పాటించాలంటున్నారు నిపుణులు. ఎండాకాలంలో ఆరోగ్యంగా ఉండేందుకు ఎలాంటి జాగ్రత్తలు తీసుకోవాలో ఇప్పుడు తెలుసుకుందాం..
నీరు తాగాలి
మన ఆరోగ్యాన్ని కాపాడుకోవడానికి హైడ్రేటెడ్ గా ఉండటం చాలా ముఖ్యం. ఏ సీజన్ అయినా సరే శరీరాన్ని హైడ్రేట్ గా ఉంచుకోవాలి. ముఖ్యంగా ఎండాకాలంలో. మండుతున్న ఎండల వల్ల చెమటలు ఎక్కువగా పట్టడం వల్ల ఒంట్లోని నీరంతా బయటకు పోతుంది. దీనివల్ల శరీరం డీహైడ్రేషన్ బారిన పడే అవకాశం ఉంది. అందుకే ఈ సీజన్ లో నీటిని పుష్కలంగా తాగాలి. వాటర్ శరీర ఉష్ణోగ్రతను నియంత్రించడానికి, శారీరక విధులకు మద్దతునివ్వడానికి సహాయపడుతుంది. అంతేకాదు నీరు తాగడం వల్ల మీ చర్మం ఆరోగ్యంగా ఉంటుంది. జీర్ణక్రియ మెరుగ్గా పనిచేస్తుంది. మీ మొత్తం శక్తి స్థాయిలు బాగుంటాయి.
క్రమం తప్పకుండా నడవండి
అత్యంత సరళమైన, సమర్థవంతమైన వ్యాయామాలలో నడక ఒకటి. ఇది దీర్ఘకాలిక వ్యాధులు వచ్చే ప్రమాదాన్ని తగ్గిస్తుంది. అలాగే ఆరోగ్యకరమైన బరువును నిర్వహించడానికి మీకు సహాయపడుతుంది. అలాగే మిమ్మల్ని రోజంతా ఉత్సాహంగా ఉంచుతుంది. ప్రతిరోజూ 30 నిమిషాల పాటు శరీరం కదిలేటట్టు నడవండి. అయితే పని మధ్యమధ్యలో నడవడం కూడా మంచిది. కొద్ది దూరం వెళ్లడానికి కూడా బైక్ ను వాడకండి. నడుచుకుంటూ వెళితే మీ ఆరోగ్యం బాగుంటుంది. లేదంటే సైక్లింగ్ కూడా చేయొచ్చు.
Image: Getty
తగినంత నిద్ర
ఆరోగ్యం బాగుండాలంటే కంటినిండా నిద్ర ఖచ్చితంగా ఉండాలి. కానీ ప్రస్తుతం చాలా మంది నిద్రలేమి సమస్యలతో బాధపడుతున్నారు. ఈ నిద్రలేమి సమస్యల వల్ల ఊబకాయం, డయాబెటిస్, డిప్రెషన్ వంటి ఎన్నో దీర్ఘకాలిక అనారోగ్య సమస్యలు వస్తాయి. ప్రతి రాత్రి 7 నుంచి 9 గంటలు ఖచ్చితంగా నిద్రపోయేలా చూసుకోండి. రెగ్యులర్ గా ఒకే సమయానికి పడుకోవడం, లేవడం అలవాటు చేసుకోండి. పడుకునే ముందు ఫోన్, ల్యాప్ టాప్, టీవీ వంటి ఎలక్ట్రానిక్ గాడ్జెట్లను ఉపయోగించడం మానేయండి. నిద్రపోయే ముందు మంచి పుస్తకాన్ని చదవండి. లేదా గోరువెచ్చని నీటితో స్నానం చేయండి. దీనివల్ల మీరు తొందరగా నిద్రలోకి జారుకుంటారు.
ఆరోగ్యకరమైన ఆహారాన్ని తినండి
ఉక్కువగా పండ్లు, కూరగాయలు, తృణధాన్యాలు, లీన్ ప్రోటీన్లు, ఆరోగ్యకరమైన కొవ్వులనే తినండి. అలాగే ప్రాసెస్ చేసిన, కేలరీలు ఎక్కువగా ఉన్న ఆహారాలను తినడం మానేయండి. ఎండలు మండుతున్నాయని సోడాలను తాగకండి. నీటిని, కొబ్బరి నీళ్లు, నిమ్మరసం వంటి ఆరోగ్యకరమైన పానీయాలను మాత్రమే తాగండి. వేయించిన ఆహారాలకు బదులుగా కాల్చిన లేదా ఉడకబెట్టిన ఆహారాలను తినండి. మీ ఆహారంలో ఎక్కువ మొక్కల ఆధారిత భోజనాన్ని చేర్చితే మీరు ఆరోగ్యంగా ఉంటారు.