అరవకండి.. ఆరోగ్యం దెబ్బతింటుంది

భార్యాభర్తలు కొట్లాడినప్పుడు.. పిల్లలు కొంటెపనులు చేసినప్పుడు చాలా మంది అరుస్తారు. కోపంతో ఊగిపోతారు. కానీ కోపంతో బిగ్గరగా అరవడం వల్ల ఎన్నో అనారోగ్య సమస్యలు వస్తాయి తెలుసా? . 

మన దైనందిన జీవితంలో ఎన్నో కారణాల వల్ల ఒత్తిడికి గురవుతుంటాం. ఇంటి పనులు, ఆఫీసు పనులు, పిల్లల బాగోగులు, కుటుంబం బాధ్యతలు మూడ్ స్వింగ్స్ కు కారణమవుతాయి. ముఖ్యంగా ఇవి ఆడవాళ్ల మూడ్ ను నాశనం చేస్తుంటాయి. దీనివల్ల ఆడవాళ్లకు పట్టరాని కోపం, చిరాకు, విసుగు ఎక్కువవుతాయి. ఈ భావాలన్నింటినీ వీళ్లు గట్టిగా అరవడం, తిట్టడం, ఇంట్లో సామాన్లను కిందేయడం వంటి పనుల ద్వారా వ్యక్తపరుస్తారు. ఇక కొంటె పనులు, అల్లరి పనులు చేసే పిల్లలున్న ఇండ్లలో ఆడవాళ్లు గట్టి గట్టిగా అరుస్తూనే ఉంటారు. ఇలా అరవడం నిత్యకృత్యంగా మారుతుంది. కానీ దీనివల్ల పిల్లలకు శారీరక, మానసిక సమస్యలు వస్తాయని ఆరోగ్య నిపుణులు చెబుతున్నారు. 

గట్టిగా అరవడం వల్ల స్వరపేటిక, గొంతుపై ఒత్తిడి పడుతుంది. గొంతులోని స్వరపేటికలో ప్రకంపనల వల్లనే మనం మాట్లాడగలుగుతాం. అయితే మీరు  గట్టిగా మాట్లాడటం, అరవడం వల్ల స్వరపేటికలోని సన్నని కండరాలు దెబ్బతింటాయి. అలాగే కాలక్రమేణా మీరుమాట్లాడటం కష్టంగా మారుతుంది. ఎక్కువగా అరిచే వారికి రోగనిరోధక శక్తి తగ్గే అవకాశం 6 రెట్లు ఉందని నిపుణులు చెబుతున్నారు. 

కోపంతో మీరు అరిచిన ప్రతిసారీ మీ హృదయ స్పందన రేటు బాగా పెరుగుతుంది. కోపం పెరిగితే శరీరంలో రక్తపోటు పెరుగుతుంది. దీనివల్ల గుండె సక్రమంగా కొట్టుకోదు. అలాగే ఫాస్ట్ ఫాస్ట్ గా గుండె కొట్టుకోవడం మొదలుపెడుతుంది. అలాగే శ్వాస వేగం పెరుగుతుంది. అలాగే కండరాలపై ఒత్తిడి బాగా పడుతుంది. 

మీకు తెలుసా? కోపంతో అరవడం వల్ల మీ శరీరంలో హార్మోన్ల మార్పులు వస్తాయి. ఇది జీవక్రియను నెమ్మదింపజేస్తుంది. ఎప్పుడూ కోపంతో అరిచేవారికి తలనొప్పి, యాంగ్జైటీ, నిద్రలేమి, జీర్ణ సంబంధిత సమస్యలు, చర్మ సమస్యలు వచ్చే అవకాశం ఎక్కువగా ఉంది. అలాగే స్ట్రోక్, హార్ట్ ఎటాక్ వచ్చే అవకాశం కూడా ఎక్కువగానే ఉంటుంది.

ఎప్పుడూ అరవడం వల్ల పిల్లలు, తల్లిదండ్రుల మధ్య సంబంధాలలో విభేదాలు వస్తాయి. అలాగే పిల్లలకు తల్లిదండ్రులంటే భయం ఏర్పడుతుంది. ప్రేమ తగ్గుతుంది. తల్లిదండ్రులు గట్టిగా మందలించడం వల్ల పిల్లలకు ఎన్నో శారీరక, మానసిక సమస్యలు కూడా వస్తాయి. 

బాల్యంలో మెదడు, శరీర అవయవాల అభివృద్ధి ఎక్కువగా ఉంటుంది. కానీ తల్లిదండ్రులు గట్టిగా మందలిస్తే పిల్లల మెదడు ఎదుగుదల దెబ్బతింటుంది. ఇలాంటి పరిస్థితిలో పెరిగే పిల్లలకు ఆర్థరైటిస్, తలనొప్పి, వెన్ను, మెడ నొప్పి వచ్చే ప్రమాదం ఉంది.