పీడకలలు ఇందుకే వస్తయ్ తెలుసా?

పీడకలలు రావడానికి ఎన్నో కారణాలున్నాయి. కానీ చికిత్స, జీవన శైలి మార్పుల వల్ల పీడకలల ఫ్రీక్వెన్సీని తగ్గించొచ్చంటున్నారు నిపుణులు.  

ప్రశాంతంగా, హాయిగా నిద్రపట్టాలంటే ఎలాంటి డిస్టబెన్స్ ఉండకూడదు. కానీ చాలా మందికి రాత్రిళ్లు పీడకలలు పడుతుంటాయి. ఈ పీడకలల వల్ల  భయంతో పాటుగా రాత్రిళ్లు కంటి నిండా నిద్రకూడా ఉండదు. ఇలా ఎప్పుడో ఒకసారి జరిగితే ఏం కాదు కానీ.. రోజూ ఇలాగే అయితే మాత్రం ఆరోగ్యం బాగా దెబ్బ తింటుంది. అసలు పీడకలలు ఎందుకు పడుతాయో ఇప్పుడు తెలుసుకుందాం.. 

ఒత్తిడి, ఆందోళన

పీడకలలు పడటానికి ఒత్తిడి, యాంగ్జైటీ సాధారణ కారణాలలో ఒకటి. మనస్సు ప్రతికూల ఆలోచనలు, ఆందోళనలతో నిండినప్పుడు నిద్ర నాణ్యత ప్రభావితం అవుతుంది. అలాగే భయంకరమైన కలలు పడుతాయి. అంతేకాదు మన శరీరం ఒత్తిడిని కలిగించే కార్టిసాల్, ఆడ్రినలిన్ వంటి ఒత్తిడి హార్మోన్లను రిలీజ్ చేస్తుంది. ఇది పీడకలలు పడేలా చేస్తుంది. 

గాయాలు

గాయం లేదా పోస్ట్ ట్రామాటిక్ స్ట్రెస్ డిజార్డర్ తో బాధపడుతున్న వ్యక్తులకు కూడా తరచుగా పీడకలలు పడుతాయని నిపుణులు అంటున్నారు. ఇవి గత జ్ఞాపకాలను ప్రేరేపించే స్పష్టమైన, భయంకరమైన కలలకు దారితీస్తుంది.

మందులు

యాంటీ డిప్రెసెంట్స్, బీటా-బ్లాకర్స్, రక్తపోటు మందులు వంటి కొన్ని మందులు భయంకరమైన కలలు, పీడకలలకు కారణమవుతాయి. ఈ మందులు నిద్ర, కలలను నియంత్రించే మెదడులోని న్యూరోట్రాన్స్మిటర్లను ప్రభావితం చేస్తాయి.

నిద్ర రుగ్మతలు

స్లీప్ అప్నియా, నార్కోలెప్సీ, రెస్ట్ లెస్ లెగ్ సిండ్రోమ్ వంటి నిద్ర రుగ్మతలు నిద్ర నాణ్యతను తగ్గిస్తాయి. అలాగే పీడకలలకు కారణమవుతాయి. స్లీప్ అప్నియా ఉన్నవారు నిద్రపోతున్నప్పుడు శ్వాసతీసుకోవడంలో ఇబ్బంది పడతారు. ఇది కార్బన్ డయాక్సైడ్ స్థాయిలు పెరగడానికి దారితీస్తుంది. తర్వాత పీడకలలకు కారణమవుతుంది. 

మాదకద్రవ్యాల దుర్వినియోగం

ఆల్కహాల్, మాదకద్రవ్యాలు, నిద్ర మాత్రలు వంటి మందులతో సహా మాదకద్రవ్యాల దుర్వినియోగం పీడకలలకు కారణమవుతుంది. ఈ పదార్థాలు ఆర్ఈఎం నిద్రను నియంత్రించే మెదడు సామర్థ్యానికి ఆటంకం కలిగిస్తాయి. ఇది కలలు, పీడకలలకు దారితీస్తుంది.

పేలవమైన నిద్ర వాతావరణం

ప్రతికూల నిద్ర వాతావరణం కూడా పీడకలలకు కారణమవుతుంది. శబ్దాలు రావడం, పరుపు అసౌకర్యంగా లేకపోవడం, చాలా వేడి లేదా చల్లని ఉష్ణోగ్రతలు వంటి అంశాలు కూడా పీడకలలకు దారితీస్తాయి. 

తగినంత నిద్ర లేకపోవడం

తగినంత నిద్ర లేకపోవడం లేదా నాణ్యమైన నిద్ర లేకపోవడం వల్ల కలలను నియంత్రించే మెదడు సామర్థ్యం ప్రభావితం అవుతుంది. ఇది పీడకలలకు కారణమవుతుంది.

కొన్ని ఆహారాలు

కొన్ని రకాల ఆహారాలు, పానీయాలు కూడా పీడకలలకు కారణమవుతాయి. ఉదాహరణకు పడుకునే ముందు హెవీగా తినడం వల్ల అజీర్ణం సమస్య వస్తుంది. అలాగే ఇది కలలకు దారితీస్తుంది.

అనారోగ్య సమస్యలు

మూర్ఛ, పార్కిన్సన్ వ్యాధి, అల్జీమర్స్ వ్యాధి వంటి అనారోగ్య సమస్యలు కూడా పీడకలలకు కారణమవుతాయి. ఈ సమస్యలు నిద్ర, కలలను నియంత్రించే మెదడు సామర్థ్యాన్ని ప్రభావితం చేస్తాయి.