Kids food: ఈ సూపర్ ఫుడ్స్ తో పిల్లల జ్ఞాపకశక్తి పెరుగుతుంది తెలుసా?

పిల్లల ఆరోగ్యంపై వారు తినే ఆహారం ఎంతగా ప్రభావం చూపిస్తుందో అందరికి తెలుసు. మంచి ఫుడ్ తీసుకున్నప్పుడే పిల్లల ఎదుగుదల హెల్తీగా ఉంటుంది. మరి పిల్లల జ్ఞాపకశక్తిని, మెదడు పనితీరును పెంచడానికి ఏ రకమైన ఆహారాలు ఇవ్వాలో మీకు తెలుసా?

ప్రతి తల్లిదండ్రులు తమ పిల్లల ఆరోగ్యకరమైన ఎదుగుదల కోసం శాయశక్తుల ప్రయత్నిస్తారు. పెరుగుతున్న పిల్లలకు శారీరక అభివృద్ధి ఎంత ముఖ్యమో, మానసిక వృద్ధి కూడా అంతే ముఖ్యం. ఇందుకోసం వారికి సరైన ఆహారం అందించాలి. పిల్లల మెదడు పనితీరును పెంచడానికి వారికి ఏ రకమైన ఆహారం ఇవ్వాలో తెలుసుకుందాం.

బెర్రీలు:

బెర్రీలలో ఫ్లేవనాయిడ్లు, యాంటీఆక్సిడెంట్లు పుష్కలంగా ఉంటాయి. ఇది పిల్లల జ్ఞాపకశక్తిని పెంచుతుంది. మెదడులో మంచి రక్త ప్రసరణకు సహాయపడుతుంది. పిల్లల తెలివితేటలు పెంచడానికి వారికి బెర్రీలు ఇవ్వండి.

ఎండు పండ్లు:

బాదం, పిస్తా, వాల్‌నట్స్, గుమ్మడికాయ గింజలు, చియా గింజలు వంటి వాటిలో ఆరోగ్యకరమైన కొవ్వులు, ప్రోటీన్లు, అనేక విటమిన్లు, వివిధ పోషకాలు పుష్కలంగా ఉంటాయి. ఇవి పిల్లల మెదడు సరిగ్గా పనిచేయడానికి సహాయపడతాయి.

చేపలు:

చేపలో ఒమేగా 3 కొవ్వు ఆమ్లాలు ఉంటాయి. ఇవి పిల్లల మెదడు సరిగ్గా పనిచేయడానికి చాలా సహాయపడుతాయి. పిల్లల ఆహారంలో సాల్మన్, సార్డినెస్ చేపలను చేర్చవచ్చు.

గుడ్డు:

గుడ్డు పిల్లలకు ఇవ్వాల్సిన సూపర్ ఫుడ్. ముఖ్యంగా గుడ్డులోని పచ్చసొనలో కోలిన్ ఉంటుంది. ఇది జ్ఞాపకశక్తి పెంచడంలో ముఖ్య పాత్ర పోషిస్తుంది. గుడ్డు.. ప్రోటీన్, విటమిన్ బి12 వంటి ఇతర పోషకాలకు మంచి మూలం కాబట్టి, పిల్లల ఆహారంలో ప్రతిరోజూ గుడ్డును చేర్చండి.

ధాన్యాలు:

ఓట్స్, బ్రౌన్ రైస్, క్వినోవా వంటి ధాన్యాలు కార్బోహైడ్రేట్లకు మంచి మూలాలు. అవి పిల్లల మెదడును పెంచడానికి సహాయపడతాయి. ఇది పిల్లల ఏకాగ్రతను పెంచుతుంది. ధాన్యాలలో విటమిన్ ఇ వంటి ముఖ్యమైన పోషకాలు కూడా ఉన్నాయి. ఇవి పిల్లల మెదడు అభివృద్ధికి చాలా మంచిది.

ఆకుకూరలు

ఆకుకూరలు, బ్రోకలీ, క్యాబేజీలలో అనేక విటమిన్లు, యాంటీఆక్సిడెంట్లు పుష్కలంగా ఉంటాయి. ఇవి మెదడు ఆరోగ్యాన్ని మెరుగుపరచడంలో ముఖ్యమైన పాత్ర పోషిస్తాయి.

పెరుగు:

పెరుగులో ప్రోటీన్, కాల్షియం పుష్కలంగా ఉంటాయి. ఆరోగ్యకరమైన మెదడు అభివృద్ధికి ఇవి చాలా అవసరం. పెరుగులోని ప్రోబయోటిక్స్ పిల్లల జ్ఞాపకశక్తిని పెంచడంలో సహాయపడతాయి.

చిలగడదుంప

చిలగడదుంపలో కార్బోహైడ్రేట్లు పుష్కలంగా ఉంటాయి. ఇది పిల్లల మెదడుకు అవసరమైన శక్తిని అందించడంలో సహాయపడుతుంది. జ్ఞాపకశక్తిని పెంచే బీటా కెరోటిన్ కూడా ఇందులో ఉంటుంది.