చలికాలంలో వెల్లుల్లిని తింటే ఏమౌతుందో తెలుసా?

 మనం చేసే ప్రతి కూరలో అల్లంవెల్లుల్లి పేస్ట్ ఖచ్చితంగా ఉంటుంది. కొందరైతే వెల్లుల్లిని మాత్రమే వంటల్లో వేస్తుంటారు. నిజానికి వెల్లుల్లిలో ఎన్నో ఔషదగుణాలుంటాయి. ఇవి మన ఆరోగ్యానికి ఎన్నో విధాలుగా మేలు చేస్తాయి. వీటిని వంటల్లో వేయడం వల్ల కేవలం దాని రుచి పెరగడమే కాకుండా.. మన ఆరోగ్యానికి కూడా మంచి మేలు జరుగుతుంది. అందుకే ప్రాచీన కాలం నుంచి సంప్రదాయ వైద్యంలో వెల్లుల్లిని బాగా ఉపయోగిస్తారు. 

వెల్లుల్లిలో యాంటీ ఆక్సిడెంట్లు, సల్ఫర్, విటమిన్లు, అమైనో ఆమ్లాలు పుష్కలంగా ఉంటాయి. ఇవి మన శరీరానికి ఎన్నో విధాలుగా ఉపయోగపడతాయి. ముఖ్యంగా ఇవి చలికాలంలో మన శరీరానికి చేసే మేలు అంతా ఇంతా కాదు. అసలు చలికాలంలో వెల్లుల్లిని తినడం వల్ల కలిగే  ఆరోగ్య ప్రయోజనాలేంటో ఇప్పుడు తెలుసుకుందాం పదండి. 
 

వెల్లుల్లిలో సిస్టైన్ అనే అమైనో ఆమ్లం పుష్కలంగా ఉంటుంది. ఇది మన జట్టుకు ఎంతో ప్రయోజనకరంగా ఉంటుంది. అంటే వెల్లుల్లిని తింటే జుట్టు బాగా పొడుగ్గా పెరుగుతుంది. అలాగే జుట్టు హెల్తీగా ఉంటుంది. ముఖ్యంగా ఈ మసాలా దినుసులో ఉండే లక్షణాలు జుట్టు రాలిపోకుండా, తెగిపోకుండా ఉంచడానికి సహాయపడుతుంది. 

వెల్లుల్లిలో శక్తివంతమైన యాంటీఆక్సిడెంట్లు కూడా పుష్కలంగా ఉంటాయి. ఇవి మన శరీరాన్ని ఎన్నో రకాల ఇన్ఫెక్షన్ల నుంచి రక్షించడానికి బాగా సహాయపడతాయి. వెల్లుల్లిని తినడం వల్ల మనకు సీజనల్ వ్యాధులు వచ్చే ప్రమాదం కూడా చాలా వరకు తగ్గుతుంది.

ఆరోగ్య నిపుణుల ప్రకారం.. వెల్లుల్లి అధిక రక్తపోటును నియంత్రించడానికి కూడా బాగా సహాయపడుతుంది. దీనిలో నైట్రిక్ ఆక్సైడ్ స్థాయిలను పెంచే సామర్థ్యం ఉంటుంది. దీంతో శరీరంలో సులువుగా రక్తం సరఫరా జరుగుతుంది. దీంతో రక్తపోటు అదుపులో ఉంటుంది. దీనివల్ల గుండె జబ్బులొచ్చే ముప్పు కూడా తగ్గుతుందని నిపుణులు చెబుతున్నారు. 

మిగతా కాలాల కంటే చలికాలంలోనే ఇమ్యూనిటీ పవర్ బాగా తగ్గిపోతుంది. దీనివల్ల మనకు దగ్గు, జలుబు, జ్వరంతో పాటుగా ఎన్నో రకాల అనారోగ్య సమస్యలు వస్తుంటాయి. అయితే మీరు ఈ సీజన్ లో వెల్లుల్లిని తింటే మీ ఇమ్యూనిటీ పవర్ బాగా పెరుగుతుంది. ఇందుకోసం వెల్లుల్లిని తేనెతో తినొచ్చు. 
 

జలుబు, దగ్గు నుంచి రక్షణ

చలికాలంలో తరచుగా దగ్గు, జలుబు, జ్వరాలు ఎక్కువగా వస్తుంటాయి. దీనివల్ల మనం యాక్టీవ్ గా ఉండలేం. అయితే మీరు ఈ సీజన్ లో రోజూ రెండు పచ్చి వెల్లుల్లి రెబ్బలను తింటే  ఈ సమస్యలు వచ్చే అవకాశమే ఉండదు. ఒకవేళ వచ్చినా తొందరగా తగ్గిపోతాయి. 

గుండె ఆరోగ్యం

చలికాలంలో గుండె జబ్బులొచ్చే ముప్పు బాగా పెరుగుతుంది. ఎందుకంటే మీరు తినే కొన్ని ఆహారాల వల్ల అధిక రక్తపోటు, ఒంట్లో కొలెస్ట్రాల్ లు బాగా పెరుగుతాయి. ఇవి మీకు గుండెపోటు, స్ట్రోక్ తో పాటుగా ఇతర గుండె జబ్బులు వచ్చేలా చేస్తాయి. కాబట్టి మీరు రోజూ పచ్చి వెల్లుల్లి రెబ్బలను తింటే ఒంట్లో కొలెస్ట్రాల్ తగ్గుతుంది. గుండె జబ్బుల ముప్పు కూడా తగ్గుతుంది. వెల్లుల్లి గుండెను ఆరోగ్యంగా ఉంచడానికి ఎంతగానో సహాయపడుతుంది. 

డయాబెటీస్ కంట్రోల్

వెల్లుల్లిని తినడం వల్ల మధుమేహం కూడా అదుపులో ఉంటుంది. వెల్లుల్లిలో ఉండే ఔషద లక్షణాలు బ్లడ్ షుగర్ ను కంట్రోల్ చేస్తాయి. అలాగే జలుబు వల్ల వచ్చే కీళ్ల నొప్పులను తగ్గించడానికి కూడా సహాయపడతాయి.