బలంతోనే కాదు తెలివితో కూడా బతకొచ్చు.. ఈ జింక కథ చదివితే అదెలాగో మీకే అర్థమవుతుంది
Motivational story: జీవితంలో బలంగా ఉండటం అంటే కేవలం శారీరక శక్తి కాదు. కొన్ని సందర్భాల్లో మన తెలివి మనల్ని కాపాడుతుంది. అలాంటి గొప్ప సందేశం ఇచ్చే ఓ చిన్న జింక కథ ఇప్పుడు చూద్దాం.
అడవిలో ఆందోళనలో తల్లి సింహం
ఒక పెద్ద అడవిలో ఓ సింహం ఉండేది. దానికి ఒక చిన్న బిడ్డ ఉంది. ఒక రోజు ఆ బిడ్డ సింహం అడవిలో ఎక్కడో తప్పిపోయింది. దీంతో తల్లి సింహం చాలా ఆందోళన చెందింది. అడవి అంతా తిరుగుతూ తన బిడ్డను వెతుకుతూ అలసిపోయింది. వేట కూడా చేయకుండా తిరుగుతూ ఉండటంతో దానికి తీవ్రమైన ఆకలి వేసింది. అయినా బిడ్డ కోసం వెతుకుతూనే ఉంది.
ఆకలి, అలసట… ఆశగా కనిపించిన జింక
చాలా సేపు తిరిగిన తర్వాత సింహం ఒక వాగు దగ్గరకు వచ్చింది. అక్కడ అలసిపోయి కూర్చుంది. ఆ సమయంలో వాగు అవతల ఓ జింక కనిపించింది. ఆ జింకకు గాయం అయింది. కానీ అది సింహానికి తెలియదు. ఆకలితో ఉన్న సింహానికి ఆ జింక ఆహారంలా కనిపించింది. వెంటనే దానిని పట్టుకోవాలని నిర్ణయించింది.
ప్రాణాల కోసం జింక తెలివైన ప్లాన్
సింహం వాగు దాటేందుకు ప్రయత్నిస్తున్నప్పుడు జింక పరిస్థితిని అర్థం చేసుకుంది. “బలంతో తప్పించుకోలేను… తెలివితో ప్రయత్నించాలి” అని నిర్ణయించుకుంది. అప్పుడు జింక సింహంతో ఇలా చెప్పింది: “ఆ వాగులో మొసళ్లు ఉన్నాయి. నువ్వు దాటితే చచ్చిపోవడం ఖాయం.”
సింహానికి అనుమానం..
సింహం వెంటనే నమ్మలేదు. “నువ్వు ప్రాణాలు కాపాడుకోవడానికి అబద్ధం చెబుతున్నావు. నాకు ఆకలి ఉంది. ఈరోజు నువ్వు తప్పించుకోలేవు” అని చెప్పింది. అప్పుడు జింక మరింత తెలివిగా ఇలా మాట్లాడింది. “అయ్యో… ఉదయం ఒక చిన్న జింక ఈ వాగు దాటుతూ మొసళ్లకు ఆహారమైంది. అది నీ బిడ్డ అయి ఉండొచ్చు కదా?” ఇది విన్న సింహం ఒక్కసారిగా షాక్ అయ్యింది. తన బిడ్డ గురించి ఆలోచన వచ్చేసరికి భయపడింది. నిజంగానే వాగులో ప్రమాదం ఉందని నమ్మింది. వెంటనే అక్కడి నుంచి వెనక్కి వెళ్లిపోయింది.
ఈ కథ చెప్పే గొప్ప పాఠం
ఈ జింక కథ మనకు ఒక గొప్ప నిజం చెబుతుంది. జీవితంలో ప్రతి సమస్యను బలంతోనే ఎదుర్కోలేం. కొన్ని సందర్భాల్లో తెలివిగా ఆలోచిస్తేనే బయటపడగలం. కష్టాలు వచ్చినప్పుడు గాబరా పడకుండా, పరిస్థితిని అర్థం చేసుకుని సరైన నిర్ణయం తీసుకోవాలి. అప్పుడు అసాధ్యం అనుకున్న సమస్య కూడా సులభంగా పరిష్కారం అవుతుంది. డబ్బు, శక్తి మాత్రమే కాదు… సరైన సమయంలో ఉపయోగించిన తెలివే మనల్ని కాపాడే అసలైన బలం.
