LPG Gas Cylinder : గ్యాస్ కనెక్షన్ లేకున్నా సరే.. ఇంట్లో కూర్చునే నిమిషాల్లో సిలిండర్ తెప్పించుకునే సూపర్ ట్రిక్

కిరాణా సరుకులు, పండ్లు, కూరగాయలే కాదు ఇకపై ఎల్పీజీ సిలిండర్ ను కూడా క్విక్ కామర్స్ ప్లాట్ ఫామ్ ద్వారా పొందవచ్చు. ఇన్‌స్టామార్ట్, హెచ్‌పీసీఎల్ కలిసి ఈ సరికొత్త సర్వీసును ప్రారంభించాయి.

Image Credit : Gemini AI

ఇకపై ఇన్‌స్టామార్ట్ లో గ్యాస్ సిలిండర్

ఆన్‌లైన్‌లో ఫుడ్, సరుకులు ఆర్డర్ చేయడం ఇప్పుడు కామన్ అయిపోయింది. కానీ వంట గ్యాస్ సిలిండర్‌ను కూడా నిమిషాల్లో ఇంటికి తెప్పించుకోవచ్చు అంటే నమ్మగలరా? క్విక్-కామర్స్ ప్లాట్‌ఫామ్ ఇన్‌స్టామార్ట్ (Instamart), హిందుస్థాన్ పెట్రోలియం కార్పొరేషన్ లిమిటెడ్ (HPCL)తో కలిసి ఈ కొత్త సేవను అందుబాటులోకి తెచ్చింది. దీంతో ఇండియాలో ఆన్-డిమాండ్ ఎల్పీజీ సిలిండర్లను డెలివరీ చేస్తున్న తొలి క్విక్-కామర్స్ సంస్థగా ఇన్‌స్టామార్ట్ నిలిచింది. ప్రస్తుతం ఈ సేవలు కర్ణాటక రాజధాని బెంగళూరులో ప్రారంభమయ్యాయి. ఈ ప్రయోగం సక్సెస్ అయితే త్వరలోనే హైదరాబాద్, చెన్నై, ముంబై, ఢిల్లీ వంటి ప్రధాన నగరాల్లోనూ ఈ సేవలను విస్తరించే అవకాశం ఉంది.

Image Credit : Getty

ఏయే సిలిండర్లు అందుబాటులో ఉన్నాయి?

హెచ్‌పీసీఎల్ ఇటీవల లాంచ్ చేసిన 'హెచ్‌పీ నవ్య' (HP Navya) 10 కేజీల కాంపోజిట్ ఎల్పీజీ సిలిండర్‌ను ఇన్‌స్టామార్ట్ ద్వారా పొందవచ్చు. ఈ సిలిండర్ పాత ఇనుప సిలిండర్ల కన్నా బరువు తక్కువగా ఉంటుంది. అంతేకాదు దీనికి ఉన్న పారదర్శక డిజైన్ వల్ల లోపల గ్యాస్ ఎంత మిగిలి ఉందో సులభంగా చూసుకోవచ్చు. అంటే గ్యాస్ అయిపోతుంది అనగా మరో గ్యాస్ బుక్ చేసుకోవచ్చు. 

ఇక హెచ్‌పీసీఎల్ అందిస్తున్న 5 కేజీల మెటల్ సిలిండర్లు కూడా ఇన్‌స్టామార్ట్ అందుబాటులో ఉంటుంది. దీన్ని కూడా ఆర్డర్ చేసి కేవలం నిమిషాల్లోని ఇంటికి తెప్పించుకోవచ్చు. ఈ కొత్త సర్వీస్ ముఖ్యంగా విద్యార్థులు, ఒంటరిగా నివసించే యువత, ఐటీ ఉద్యోగులు, చిన్న కుటుంబాలకు ఎంతో ఉపయోగకరంగా ఉంటుందని భావిస్తున్నారు.

Image Credit : istock

ఆన్లైన్ డెలివరీకి గ్యాస్ కనెక్షన్ అవసరమా?

ఈ సేవలో ఉన్న అతిపెద్ద సౌలభ్యం ఏంటంటే కస్టమర్లకు ముందే గ్యాస్ కనెక్షన్ ఉండాల్సిన అవసరం లేదు. మొదటిసారి సిలిండర్ కొనేవారిని కొత్త కస్టమర్లగా నమోదు చేసుకుంటారు. ఆ తర్వాత సిలిండర్ ఖాళీ అయ్యాక పాతదాన్ని ఇచ్చి కొత్త సిలిండర్ తీసుకోవచ్చు. 

ఎల్పీజీ వంటి ఇంధనాన్ని డెలివరీ చేయడంలో భద్రతకు అధిక ప్రాధాన్యం ఇస్తున్నారు. అన్ని ఆర్డర్లను హెచ్‌పీసీఎల్ అధీకృత డిస్ట్రిబ్యూటర్ల ద్వారానే డెలివరీ చేస్తారు. శిక్షణ పొందిన సిబ్బంది మాత్రమే సిలిండర్లను అందిస్తారు. మొదటిసారి కొనే కస్టమర్లు తప్పనిసరిగా గుర్తింపు ధ్రువీకరణ (ID verification) పూర్తి చేయాలి.

Image Credit : X

వేగంగా పెరుగుతున్న క్విక్ కామర్స్ మార్కెట్

గత కొన్నేళ్లుగా ఇండియాలో క్విక్ కామర్స్ రంగం వేగంగా అభివృద్ధి చెందింది. 10 నుంచి 20 నిమిషాల్లో సరుకులు, మందులు వంటివి ఇంటికి వస్తున్నాయి. ఇప్పుడు ఈ జాబితాలో ఎల్పీజీ సిలిండర్లు కూడా చేరాయి. 

2020లో ప్రారంభమైన ఇన్‌స్టామార్ట్ ప్రస్తుతం 130కి పైగా నగరాల్లో పనిచేస్తోంది. 50,000కు పైగా వస్తువులను డెలివరీ చేస్తున్న ఈ సంస్థ, ఇప్పుడు ఎల్పీజీ డెలివరీ రంగంలోకి కూడా అడుగుపెట్టింది. ఇన్‌స్టామార్ట్, హెచ్‌పీసీఎల్ భాగస్వామ్యం.. ఇండియాలో ఎల్పీజీ కొనుగోలు విధానాన్ని మార్చే కీలక ముందడుగుగా నిపుణులు భావిస్తున్నారు.