Car Tyres: టైర్లు నలుపు రంగులోనే ఎందుకు ఉంటాయి.? వేరే కలర్లో ఎందుకు ఉండవో ఆలోచించారా.?
Car Tyres: కార్లు, బైకులు, బస్సులు ఏవైనా వాటి టైర్లన్నీ నలుపు రంగులోనే ఉంటాయి. అయితే ఇదేదో యాదృశ్చికం కాదు. టైర్లన్నీ ఒకే రంగులో ఉండడం వెనకాల శాస్త్రీయ కారణం ఉందని మీకు తెలుసా.? ఇంతకీ దీని వెనకాల ఉన్న అసలు సైన్స్ ఏంటో ఇప్పుడు తెలుసుకుందాం.
మొదట్లో టైర్లు నలుపు రంగులో ఉండేవి కావు
వాహనాల ప్రారంభ దశలో టైర్లు సహజ రబ్బరుతో తయారయ్యేవి. ఆ రబ్బరు స్వభావం వల్ల టైర్లు తెలుపు లేదా లేత గోధుమ రంగులో కనిపించేవి. అయితే అవి ఎక్కువ కాలం మన్నేవి కాదు. రోడ్లపై ఉండే వేడి, వాహనం బరువు, ఘర్షణ వంటి అంశాలను ఎక్కువసేపు తట్టుకోలేక త్వరగా దెబ్బతినేవి. దీంతో మరింత బలమైన టైర్ల అవసరం ఏర్పడింది.
కార్బన్ బ్లాక్ వల్లే టైర్లకు నలుపు రంగు
టైర్ల తయారీలో రబ్బరుతో పాటు "కార్బన్ బ్లాక్" అనే ప్రత్యేక పొడిని కలుపుతారు. ఈ పదార్థమే టైర్లకు నలుపు రంగును ఇస్తుంది. కానీ దీని పని కేవలం రంగు మార్చడం మాత్రమే కాదు. కార్బన్ బ్లాక్ రబ్బరును మరింత గట్టిగా, బలంగా మారుస్తుంది. దీనివల్ల టైర్లు త్వరగా అరిగిపోవు. ఎక్కువ కాలం మన్నుతాయి. అలాగే రోడ్లపై మెరుగైన పనితీరును చూపుతాయి. అందుకే ప్రపంచవ్యాప్తంగా దాదాపు అన్ని టైర్ల తయారీలో ఈ పదార్థాన్ని ఉపయోగిస్తున్నారు.
అధిక వేడి నుంచి టైర్లకు రక్షణ
వాహనం ప్రయాణిస్తున్నప్పుడు టైర్లు రోడ్లతో నిరంతరం తాకడం వల్ల వేడెక్కుతాయి. వేసవికాలంలో ఈ ప్రభావం మరింత ఎక్కువగా ఉంటుంది. కార్బన్ బ్లాక్ ఈ వేడిని నియంత్రించడంలో సహాయపడుతుంది. దీని వల్ల టైర్లు అధిక ఉష్ణోగ్రతల కారణంగా బలహీనపడకుండా ఉంటాయి. ఒకవేళ ఈ పదార్థం లేకపోతే రబ్బరు త్వరగా పగిలిపోవడం లేదా చిట్లిపోవడం జరిగే అవకాశం ఉంటుంది. అందువల్ల టైర్ల జీవితకాలం కూడా తగ్గిపోతుంది.
రోడ్డు భద్రతలో కీలక పాత్ర
నలుపు రంగు టైర్లు వాహన భద్రతలో కూడా ముఖ్యమైన పాత్ర పోషిస్తాయి. కార్బన్ బ్లాక్ కలిగిన టైర్లు రోడ్డుపై మంచి గ్రిప్ను అందిస్తాయి. దీనివల్ల బ్రేక్ వేస్తే వాహనం సులభంగా నియంత్రణలోకి వస్తుంది. వర్షాకాలం లేదా అధిక వేగంతో ప్రయాణించే సమయంలో కూడా టైర్లు రోడ్డుపై మెరుగైన పట్టును కలిగి ఉంటాయి. దీంతో ప్రమాదాల అవకాశాలు తగ్గుతాయి. టైర్లు అధిక వేడి కారణంగా పేలిపోయే ప్రమాదం కూడా తక్కువగా ఉంటుంది.
రంగుల టైర్లు ఎందుకు విజయవంతం కాలేదు?
గతంలో కొన్ని కంపెనీలు ఎరుపు, నీలం, తెలుపు వంటి రంగుల టైర్లను తయారు చేయడానికి ప్రయత్నించాయి. అయితే అవి నలుపు టైర్లతో పోలిస్తే అంత బలంగా, మన్నికగా ఉండలేకపోయాయి. వేడి తట్టుకునే సామర్థ్యం కూడా తక్కువగా ఉండేది. దీంతో యూజర్లు కూడా నలుపు టైర్లకే ప్రాధాన్యం ఇచ్చారు. అందుకే ప్రస్తుతం చిన్న కార్ల నుంచి భారీ ట్రక్కులు, రేసింగ్ కార్ల వరకు అన్ని వాహనాల్లో నలుపు రంగు టైర్లే ఉపయోగిస్తున్నారు.
