ధనుష్ కంటే ముందు కుబేర మూవీ మిస్సైన టాలీవుడ్ యంగ్ హీరో ఎవరో తెలుసా?
ధనుష్ నటించిన రీసెంట్ హిట్ మూవీ కుబేర. ఈ సినిమా కథను డైరెక్టర్ శేఖర్ కమ్ముల ధనుష్ కోసం రాయలేదా? కుబేర సినిమాను మిస్ అయిన టాలీవుడ్ యంగ్ హీరో ఎవరు?
శేఖర్ కమ్ముల దర్శకత్వంలో ధనుష్ నటించిన సినిమా కుబేరా. ఈ మూవీ జూన్ 20న తెలుగు , తమిళం, హిందీ, మలయాళం, కన్నడ భాషల్లో విడుదలైంది. ఈ సినిమాలో హీరోగా ధనుష్తో పాటు నాగార్జున, రష్మిక మందన్న, సునైనా, భాగ్యరాజ్ లాంటి స్టార్ కాస్ట్ నటించారు. ఈ చిత్రానికి దేవి శ్రీ ప్రసాద్ సంగీతం అందించారు. శ్రీ వెంకటేశ్వర సినిమాస్ పతాకంపై దాదాపు 120 కోట్ల భారీ బడ్జెట్ తో సునిల్ నారంగ్, శేఖర్ కమ్ముల కలిసి ఈసినిమాను నిర్మించారు. ఈ సినిమాలో నటుడు ధనుష్ బిచ్చగాడి పాత్రలో అద్భుతంగా నటించి మెప్పించాడు.
కుబేరా సినిమా భారీ అంచనాల నడుమ జూన్ 20న విడుదలైంది. కానీ ఈ సినిమాకు తమిళంలో మిశ్రమ స్పందన లభించింది. అంతేకాకుండా, సినిమా డ్యూరేషన్్ 3 గంటలకు పైగా ఉండటం పెద్ద మైనస్గా మారింది. దీంతో కుబేరా సినిమా తమిళనాడులో ఆకట్టుకోలేకపోయింది. ఈ చిత్రం విడుదలై రెండు వారాలు గడిచినా తమిళనాడులో కేవలం 20 కోట్లు మాత్రమే వసూలు చేసింది. ఈ చిత్రానికి తమిళనాడులో మాత్రమే రూ.15 కోట్ల వరకు నష్టం వాటిల్లే అవకాశం ఉందని సినీ వర్గాల్లో చర్చ జరుగుతోంది.
అదే సమయంలో కుబేరా చిత్రం ఆంధ్రప్రదేశ్ , తెలంగాణలో విజయవంతంగా ప్రదర్శితమవుతోంది. దీంతో ఈ చిత్రం బాక్సాఫీస్ వద్ద రూ.125 కోట్లకు పైగా వసూలు చేసింది. ఇది ధనుష్ 100 కోట్ల వసూళ్లు సాధించిన ఐదో సినిమాగా నిలిచింది. ఈ సినిమా సక్సెస్ తో హీరో ధనుష్కు పూర్తి సంతృప్తిని ఇవ్వలేదని చెబుతున్నారు. ఎందుకంటే తమిళనాడులో ఈ చిత్రానికి అనుకున్నంత ఆదరణ లభించకపోవడంతో చిత్ర బృందం కూడా నిరాశలో ఉందట. దర్శకుడు శేఖర్ కమ్ముల ఇటీవలి ఇంటర్వ్యూలో తమిళ ప్రేక్షకుల స్పందనతో నిరాశ చెందానని తెలిపారు.
కాని కుబేరా సినిమాలో ధనుష్ నటనను మంచి మార్కులు పడ్డాయి. విమర్శకుల నుంచి ప్రశంసలు కూడా అందాయి. ఇక ఈ సినిమాకు జాతీయ అవార్డు కూడా వచ్చే అవకాశం ఉన్నట్టు సినీ పండితులు చెబుతున్నారు. ముఖ్యంగా హీరోలు చేయడానికి సంకోచించే పాత్రను నటుడు ధనుష్ చక్కగా పోషించారని చాలా మంది అన్నారు. ఈ నేపథ్యంలో, కుబేరా చిత్రం గురించి ఒక ఆశ్చర్యకరమైన విషయం వెలుగులోకి వచ్చింది. దాని ప్రకారం, ఈ చిత్రంలో నటించడానికి దర్శకుడు శేఖర్ కమ్ముల మొదటి ఎంపిక ధనుష్ కాదట.
సమాచారం ప్రకారం, కుబేరా చిత్రం కథను దర్శకుడు శేఖర్ కమ్ముల మొదట విజయ్ దేవరకొండకు చెప్పారట. కానీ కథ విన్న తర్వాత, తాను బిచ్చగాడిగా నటిస్తే అభిమానులు అంగీకరించరని, ఆ పాత్ర తనకు సరిపోదని చెప్పి నటించడానికి నిరాకరించారట. దీని తర్వాతే ఈ కథ ధనుష్కు వెళ్లింది. ఇది తెలుసుకున్న అభిమానులు మంచి అవకాశాన్ని విజయ్ దేవరకొండ వదులుకున్నారని అంటున్నారు.
