'అన్‌స్టాపబుల్'కి పోటీగా 'నిజం'.. అతిథులుగా చిరు, నాని, చంద్రబాబు.. కులం గురించి నోరు విప్పిన మెగాస్టార్

నందమూరి బాలకృష్ణ హోస్ట్ గా వ్యవహరిస్తున్న అన్ స్టాపబుల్ షో తిరుగులేని టాక్ షోగా దూసుకుపోతున్న సంగతి తెలిసిందే. చంద్రబాబు, ప్రభాస్, కిరణ్ కుమార్ రెడ్డి, రాజమౌళి, ప్రభాస్ లాంటి ప్రముఖులు ఈ షోకి హాజరయ్యారు. బాలయ్య వారితో జరిపిన సరదా సంభాషణలు.. నిజాలు చెప్పించిన విధానం ప్రతి ఒక్కరిని ఆకట్టుకుంది. అందుకే పేరుకి తగ్గట్లుగానే ఈ షో అన్ స్టాపబుల్ గా దూసుకుపోతోంది. పవర్ స్టార్ పవన్ కళ్యాణ్ అతిథిగా హాజరైన ఎపిసోడ్ నేడు టెలికాస్ట్ కానుండడంతో ఎక్కడ లేని హైప్ నెలకొంది. 

ఈ తరుణంలో బాలయ్య అన్ స్టాపబుల్ కి పోటీగా మరో సెన్సేషనల్ టాక్ షో రెడీ అవుతోంది. ఈ షోకి హోస్ట్ ఎవరో కాదు.. ప్రముఖ గాయని స్మిత. 'నిజం విత్ స్మిత' అనే పేరుతో ఈ షో సోని లివ్ ఓటీటీ వేదికగా ప్రసారం కానుంది. ఫిబ్రవరి 10 నుంచి ఈ షోని లాంచ్ చేస్తున్నారు. తాజాగా ఈ షోకి సంబంధించిన ప్రోమో రిలీజ్ చేశారు. హేమాహేమీలతో పాటు యువ హీరోలు, నటీమణులు నిజం విత్ స్మితలో పాల్గొననున్నారు. 

చంద్రబాబు, చిరంజీవి, బిజెపి నేత రామ్ మాధవ్, క్రేజీ హీరో నాని, అడివి శేష్, రానా దగ్గుబాటి, సాయి పల్లవి, సీనియర్ హీరోయిన్ రాధిక లాంటి ప్రముఖులు నిజం విత్ స్మితలో పాల్గొనబోతున్నారు. తాజాగా విడుదలైన ప్రోమో ఆసక్తికరంగా ఉంది. వాడివేడిగా స్మిత వీరందరిచే నిజాలు మాట్లాడించబోతోంది. 

ప్రోమోలో చూపిన విధంగా చంద్రబాబు వెన్నుపోటు గురించి ఓపెన్ కాబోతున్నారు. ఇక చిరంజీవి తొలిసారి కులం గురించి ఆసక్తికర వ్యాఖ్యలు చేసినట్లు ఉన్నారు. అలాగే నాని నెపోటిజం గురించి మాట్లాడుతూ రాంచరణ్ ని ఉదాహరణగా చెప్పడం ఉత్కంఠ రేపుతోంది. 

నెపోటిజం..నెపోటిజం.. అని గోల చేస్తుంటారు. రాంచరణ్ మొదటి సినిమా కోటి మంది చూశారు. నెపోటిజం అని మాట్లాడేవారు ఆ కోటిమందిలో లేరా అని నాని ప్రశ్నించడం ఆసక్తిగా మారింది. ఉత్కంఠ రేపుతున్న ఈ షోకి సంబంధించిన మరిన్ని వివరాలు త్వరలో తెలియనున్నాయి.  

మరి ఈ షో అన్ స్టాపబుల్ రేంజ్ లో సక్సెస్ అవుతుందా లేదా అనేది వేచి చూడాలి. సింగర్ గా, డ్యాన్సర్ గా అలరించిన స్మిత ఇలా హోస్ట్ గా అవతారం ఎత్తడం ఆసక్తిగా మారింది.