Subham Review : సమంత 'శుభం' మూవీ రివ్యూ

17

Subham Review

సమంత తొలిసారి నిర్మాతగా రూపొందించిన చిత్రం శుభం. దీనితో ప్రకటనతోనే ఈ చిత్రంపై మంచి బజ్ ఏర్పడింది. ప్రచార కార్యక్రమాలు మొదలయ్యాక వైవిధ్యమైన వినోదాత్మక చిత్రం రాబోతోంది అంటూ అంచనాలు మరింత పెరిగాయి. ప్రవీణ్ కండ్రేగుల దర్శకత్వంలో ఈ చిత్రం తెరకెక్కింది. హర్షిత్ రెడ్డి, గవిరెడ్డి శ్రీనివాస్, చరణ్ పేరి, శ్రియ కొంతం, శ్రావణి లక్ష్మి ఈ చిత్రంలో ప్రధాన పాత్రల్లో నటించారు. సమంత కూడా గెస్ట్ రోల్ లో నటించారు. మే 9న నేడు ఈ చిత్రం గ్రాండ్ గా రిలీజ్ అయింది. ఈ నేపథ్యంలో సమంత తొలి ప్రయత్నంలో నిర్మాతగా సక్సెస్ అయ్యారా ? శుభం చిత్రం  మెప్పించే విధంగా ఉందా ? అనేది రివ్యూలో చూద్దాం. 

27

Subham Movie

కథ 

అప్పుడప్పుడే కేబుల్ టీవీలకు బదులుగా జనాలు డిటిహెచ్ లకు అలవాటు పడుతున్న రోజులవి. భీమునిపట్నంలో శ్రీను (హర్షిత్ రెడ్డి) కేబుల్ టీవీ నెట్ నడుపుతుంటాడు. కేబుల్ నెట్ వర్క్ చూసుకుంటూ తన స్నేహితులతో సరదాగా గడుపుతుంటాడు. అలాంటి సమయంలో డిష్ కుమార్ అనే వ్యక్తి శ్రీనుకి పోటీగా జనాలకు డిటిహెచ్ లని అలవాటు చేస్తుంటాడు. ఈ క్రమంలో శ్రీనుకి శ్రీవల్లి (శ్రియ కొంతం) అనే అమ్మాయితో పెళ్లి జరుగుతుంది. 

సంతోషంగా ఫస్ట్ నైట్ కి రెడీ అయిన శ్రీనుకి భయంకర అనుభవం తన భార్య వల్ల ఎదురవుతుంది. రాత్రి 9 గంటలకు జన్మజన్మల బంధం అనే టీవీ సీరియల్  ప్రారంభం కాగానే శ్రీవల్లి వింతగా ప్రవర్తిస్తుంది. సీరియల్ పూర్తయ్యే వరకు తనని ఏదో ఆత్మ ఆవహించినట్లు శ్రీవల్లి ప్రవర్తిస్తుంది. శ్రీను స్నేహితుల ఇళ్లల్లో కూడా ఇదే పరిస్థితి. ఆడవారి వల్ల భయపడ్డాం అని ఊర్లో తెలిస్తే పరువుపోతుందని బయటకి చెప్పుకోరు. టివి సీరియల్ వస్తున్నంతసేపు తమ భర్తలపై భార్యలు దాడులు చేస్తుంటారు. 

ఊరు మొత్తం ఇదే పరిస్థితి ఉందని తెలిసి శ్రీను అతని స్నేహితులు షాక్ అవుతారు. అసలు ఆ ఊరిలో భార్యలని ఆత్మలు ఎందుకు ఆవహిస్తున్నాయి. అది కూడా జన్మజన్మల సంబంధం టీవీ సీరియల్ సమయంలోనే. టీవీ సీరియల్ కి, ఆత్మలకు సంబంధం ఏంటి ? చివరికి సమంత శ్రీను అతని స్నేహితులకు ఎలా సాయం చేసింది ? లాంటి విషయాలు మూవీ చూసి తెలుసుకోవాలి. 

37

విశ్లేషణ 

హారర్ కామెడీ చిత్రాలు చాలా వచ్చాయి కానీ.. టీవీ సీరియల్ తో ముడిపడిన  హారర్ కామెడీ కథాంశం శుభం చిత్రంలో చాలా వైవిధ్యంగా ఉంటుంది.  హారర్ కామెడీ చిత్రం అయినప్పటికీ  హారర్ అంశాలు అంతగా ఉండవు. టీవీ సీరియల్ నేపథ్యంతో ఉన్న కథ ఆకట్టుకుంటుంది. అయితే దర్శకుడు ప్రవీణ్ స్క్రీన్ ప్లే విషయంలో తడబడ్డారు. ట్విస్ట్ లు ఉన్నప్పటికీ కథనం స్లోగా సాగుతూ ఉన్నట్లు అనిపిస్తుంది. వైవిధ్యమైన కాన్సెప్ట్ కి మంచి స్క్రీన్ ప్లే తోడై ఉంటే మూవీ నెక్స్ట్ లెవల్ లో ఉండేది. 

భార్యలు భర్తలపై దాడి చేసే సన్నివేశాలు ప్రతి ఇంట్లో కామన్. దీనితో అవి రిపీట్ అయినట్లు అనిపిస్తాయి. మహిళా ప్రేక్షకులు ఈ చిత్రానికి బాగా కనెక్ట్ అవుతారు. హాస్యం పడించడం కోసం రాసుకున్న సన్నివేశాలు బాగా వర్కౌట్ అయ్యాయి. ఫస్ట్ హాఫ్ లో కథ వేగం పుంజుకోవడానికి టైం పట్టింది. సినిమా స్లోగా ఉన్నప్పటికీ.. నెక్స్ట్ ఏం జరుగుతుంది అనే సస్పెన్స్ ని సినిమా మొత్తం క్యారీ చేయడంలో డైరెక్టర్ సక్సెస్ అయ్యారు. 

47

ఫస్ట్ హాఫ్ లో ఒక దశలో సినిమా ఆసక్తికరంగా మారుతుంది. ఆ తర్వాత రిపీట్ సన్నివేశాల రావడం మైనస్ గా మారుతుంది. తిరిగి సెకండ్ హాఫ్ లో కొన్ని అద్భుతమైన సన్నివేశాలు పడ్డాయి. పేపర్ పై ఈ కథ చాలా ఆసక్తికరంగా ఉంటుంది. కానీ దీనితో కంప్లీట్ ఎంటర్టైనర్ గా ఎగ్జిక్యూట్ చేయడంలో స్పష్టంగా తడబాటు కనిపిస్తుంది. 

సినిమా మొత్తం ఒకే పాయింట్ పై సాగుతూ ఉండడంతో ప్రేక్షకులు అక్కడక్కడా బోర్ ఫీల్ అవుతారు. కానీ కొన్ని అద్భుతమైన కామెడీ సన్నివేశాలు ఈ చిత్రాన్ని నిలబెట్టాయి. క్లీన్ కామెడీ, ఫ్యామిలీ ఆడియన్స్ ని ఆకర్షించే అంశాలు ఉండడం ఈ చిత్రానికి కలసి వచ్చే అంశం అని చెప్పొచ్చు. 

57

నటీనటులు 

ఈ చిత్రంలో నటించిన వారంతా దాదాపుగా కొత్త తరం నటీనటులే. దీనితో వారి పెర్ఫార్మెన్స్ కథకి ప్రెష్ నెస్ తీసుకువస్తుంది. హర్షిత్, శ్రియ కొంతం మధ్య కెమిస్ట్రీ, ఇతర సన్నివేశాలు బాగా వర్కౌట్ అయ్యాయి. శ్రీనివాస్ గవిరెడ్డి, చరణ్ ల కామెడీ టైమింగ్ కూడా బావుంది. షాలిని కొండెపూడి, శర్వాని లక్ష్మి కూడా భార్యల పాత్రల్లో నవ్వులు పూయించారు. వీరిద్దరి పాత్రలు కథకి చాలా బలాన్ని చేకూర్చాయి అని చెప్పొచ్చు. 

ఇక సమంత అతిథి పాత్రలో నటిస్తూ తన అనుభవం ప్రదర్శించింది. కామెడీ టైమింగ్ తో ఆకట్టుకుంది. సోషల్ మీడియాలో పాపులర్ అయిన డైలాగులని సమంత అద్భుతంగా చెప్పింది. అయితే సమంత పాత్ర ఇంకాస్త ప్రభావవంతంగా ఉంటే బాగుండేది. 

67

టెక్నీషియన్లు 

ముందుగా నిర్మాతగా సమంత తొలి ప్రయత్నం గురించి మాట్లాడుకుంటే.. ఈ చిత్రానికి అవసరమైనట్లుగా నిర్మాణ విలువలు బాగానే ఉన్నాయి. ఆ విషయంలో సమంతని అభినందించాల్సిందే. ఇక దర్శకుడు ప్రవీణ్ కండ్రేగుల హాస్యాన్ని, హర్రర్ అంశాలని మిక్స్ చేస్తూ ఈ కథని తెరకెక్కించడంలో సక్సెస్ అయ్యారు. అక్కడక్కడా కథ గ్రిప్ కోల్పోయినప్పటికీ సస్పెన్స్, కామెడీ మైంటైన్ చేసిన విధానం ఆకట్టుకుంది. 

సినిమాటోగ్రఫీ అందించిన మృదుల్ సుజిత్ సేన్ కెమెరా పనితనం చూపించారు. మంచి విజువల్స్ రాబట్టారు. పాటలు పర్వాలేదనిపిస్తాయి. వివేక్ సాగర్ బ్యాగ్ గ్రౌండ్ స్కోర్ కూడా మెప్పిస్తుంది. 

77

ఫైనల్‌గా 

ఎక్కువగా అంచనాలు పెట్టుకోకుండా హాస్యం, హారర్ కలగలిపిన ఈ చిత్రాన్ని ఫ్యామిలీతో కలసి ఒకసారి చూడొచ్చు.