- Home
- Entertainment
- నా తమ్ముడి చావుకు కారణం అదే, బ్యాన్ చేయండి..అత్యంత విషాదంలో సీఎంకి కమెడియన్ రిక్వస్ట్
నా తమ్ముడి చావుకు కారణం అదే, బ్యాన్ చేయండి..అత్యంత విషాదంలో సీఎంకి కమెడియన్ రిక్వస్ట్
ఆర్ఆర్ఆర్ నటుడు, కమెడియన్ రాహుల్ రామకృష్ణ కుటుంబంలో అత్యంత విషాదం చోటు చేసుకుంది. రాహుల్ రామకృష్ణ తన తమ్ముడిని కోల్పోయారు. వ్యవసాయంలో ఉపయోగించే ఒక రసాయనం వల్ల తన సోదరుడు మరణించాడు అని రాహుల్ తెలిపారు.
సినీ నటుడు రాహుల్ రామకృష్ణ సోదరుడు మృతి
తెలుగు సినీ నటుడు రాహుల్ రామకృష్ణ తన కుటుంబంలో చోటుచేసుకున్న విషాద ఘటనతో తీవ్రంగా మానసిక వేదనకు గురయ్యారు. పారా క్వాట్ అనే ప్రమాదకర రసాయనంతో విషప్రయోగం జరగడంతో ఆయన సోదరుడు గురువారం మృతి చెందారు. ఈ ఘటనపై స్పందించిన రాహుల్ రామకృష్ణ, ఈ హెర్బిసైడ్ వినియోగంపై కఠిన నియంత్రణలు విధించాలని ప్రభుత్వాన్ని కోరారు.
గడ్డి మందు
పారా క్వాట్ అనేది కలుపు మొక్కలను నియంత్రించేందుకు ఉపయోగించే అత్యంత విషపూరిత హెర్బిసైడ్గా గుర్తించబడింది. దీనిని రైతులు వ్యవసాయంలో గడ్డి మందు అని పిలుస్తూ ఉంటారు. ఈ రసాయనం ప్రాణాంతకంగా మారే అవకాశాలు అధికంగా ఉండటంతో, దీని వినియోగంపై ఇప్పటికే పలువురు వైద్యులు, నిపుణులు ఆందోళన వ్యక్తం చేస్తున్నారు. ఈ నేపథ్యంలో తన సోదరుడి మరణం తర్వాత రాహుల్ రామకృష్ణ ఈ అంశాన్ని సోషల్ మీడియాలో ప్రస్తావిస్తూ ప్రజల్లో చర్చకు దారితీశారు.
వెంటనే దీనిని నిషేధించి ప్రాణాలను కాపాడండి
ఎక్స్లో రాహుల్ రామకృష్ణ చేసిన పోస్టులో, “ఈ రోజు నా సోదరుడిని పారా క్వాట్ విషప్రయోగంతో కోల్పోయాను. ఇది చాలా ప్రమాదకరం, స్వయంహానికీ విస్తృతంగా దుర్వినియోగం అవుతోంది. ఇది ఎంత సులభంగా అందుబాటులో ఉందో ఆశ్చర్యంగా ఉంది. కేసుల సంఖ్య పెరగడంతో వైద్యులు తీవ్ర ఒత్తిడికి గురవుతున్నారు. వెంటనే దీనిని నిషేధించి ప్రాణాలను కాపాడండి” అని పేర్కొన్నారు. ఈ పోస్టులో ఆయన ప్రధానమంత్రి కార్యాలయం, తెలంగాణ ముఖ్యమంత్రి కార్యాలయాన్ని కూడా ట్యాగ్ చేశారు.
రాహుల్ రామకృష్ణ విజ్ఞప్తి
రాహుల్ రామకృష్ణ చేసిన ఈ విజ్ఞప్తికి వైద్య రంగం నుంచి కూడా స్పందన లభించింది. హైదరాబాద్కు చెందిన ఓ వైద్య నిపుణుడు, పారా క్వాట్ నిషేధం కోసం ఇప్పటికే ప్రయత్నాలు జరుగుతున్నాయని వెల్లడించారు. “మేము డాక్టర్ల సమూహంగా దీన్ని నిషేధించేందుకు పోరాడుతున్నాం. ‘డాక్టర్స్ అగెనెస్ట్ పారా క్వాట్ పాయిజనింగ్’ అనే గ్రూప్ను ప్రారంభించాం. ఇటీవల తెలంగాణ ఫార్మర్స్ కమిషనర్ను కలిసి చర్చించాం. ఎమ్మెల్యేలు, ఎంపీలు అసెంబ్లీ, పార్లమెంట్లో ఈ అంశాన్ని ప్రస్తావించేలా చర్యలు తీసుకున్నాం” అని తెలిపారు.
పారా క్వాట్ వినియోగంపై చర్చ
ఈ ఘటనతో పారా క్వాట్ వినియోగంపై మరింత చర్చ మొదలైంది. వ్యవసాయ రంగంలో ఉపయోగించే రసాయనాల భద్రత, వాటి నియంత్రణపై ప్రభుత్వాలు మరింత జాగ్రత్తలు తీసుకోవాల్సిన అవసరం ఉందన్న అంశం మరోసారి ముందుకు వచ్చింది. ప్రజల ప్రాణాలకు ముప్పుగా మారే రసాయనాలపై కఠిన చర్యలు తీసుకోవాలని పలు వర్గాలు కోరుతున్నాయి.
