`పుష్ప 2` ప్రపంచమంతా బ్లాక్ బస్టర్‌, అక్కడ మాత్రం ఫ్లాప్‌ !

పుష్ప 2 ది రూల్ : సుకుమార్ దర్శకత్వంలో అల్లు అర్జున్ నటించిన `పుష్ప 2` సినిమా ప్రపంచవ్యాప్తంగా 1500 కోట్లు వసూలు చేసినప్పటికీ అక్కడ మాత్రం పరాజయం చెందింది. 

సుకుమార్, అల్లు అర్జున్

సుకుమార్ దర్శకత్వంలో అల్లు అర్జున్, రష్మిక మందన్న నటించిన `పుష్ప` సినిమా 2021లో విడుదలైంది. ఈ సినిమాలో మలయాళ నటుడు ఫహాద్ ఫాసిల్ విలన్ గా నటించారు. ఇది బ్లాక్ బస్టర్ హిట్ అయ్యింది. దాదాపు మూడేళ్ల తర్వాత దీనికి రెండో భాగం `పుష్ప 2` చిత్రాన్ని తీసుకొచ్చారు. డిసెంబర్‌ 5న విడుదలైంది. 

పుష్ప 2

పుష్ప 2 సినిమా దాదాపు 400 కోట్ల బడ్జెట్ తో నిర్మించబడింది. ఈ సినిమా పాటలకు దేవి శ్రీ ప్రసాద్, నేపథ్య సంగీతాన్ని సామ్ సి.ఎస్, తమన్  అందించారు. భారీ అంచనాల నడుమ విడుదలైన `పుష్ప 2` సినిమా విమర్శకుల నుండి మిశ్రమ స్పందన లభించినప్పటికీ, వసూళ్లలో మాత్రం దూసుకుపోతోంది. ముఖ్యంగా విడుదలైన మొదటి రోజే రూ.294 కోట్లు వసూలు చేసి ఇండియన్ సినిమాని ఆశ్చర్యపరిచింది.

పుష్ప 2 బాక్సాఫీసు వసూళ్లు

విజయవంతంగా ప్రదర్శితమవుతున్న ఈ సినిమా ఇప్పటివరకు బాక్సాఫీసు వద్ద 1500 కోట్లకు పైగా వసూలు చేసింది. ముఖ్యంగా ఈ సినిమా తెలుగు, హిందీ వెర్షన్లు అద్భుతంగా ఆడుతున్నాయి. అందుకే `పుష్ప 2` వేగంగా వెయ్యి కోట్ల వసూళ్లు సాధించిన సినిమాగా రికార్డు సృష్టించింది. ఇంతటి వసూళ్ల సునామీ సృష్టిస్తున్న `పుష్ప 2` ఒక రాష్ట్రంలో మాత్రం పరాజయం పాలైందంటే నమ్మగలరా?... అదే నిజం.

కేరళలో పుష్ప 2 పరాజయం

`పుష్ప 2` మంచి వసూళ్లు సాధిస్తుందని ఆశించి కేరళలో అత్యధిక థియేటర్లలో విడుదల చేశారు. ఈ సినిమా కేరళ థియేట్రికల్ రైట్స్ రూ.20 కోట్లకు అమ్ముడయ్యాయి. కేరళలో మలయాళ నటుల కంటే ఎక్కువ క్రేజ్ ఉన్న ఇతర భాషా నటుడు అంటే అది విజయ్. ఆయన సినిమాల థియేట్రికల్ రైట్స్ 25 కోట్ల వరకు అమ్ముడవుతాయి.

కేరళలో పుష్ప 2 వసూళ్లు

విజయ్ కి ధీటుగా కేరళలో ఫాలోయింగ్ ఉన్న అల్లు అర్జున్ కి అక్కడ బాక్సాఫీసు వద్ద దెబ్బ తగిలింది. పుష్ప 2 కేరళలో కేవలం 16 కోట్లు మాత్రమే వసూలు చేసింది, దీంతో అక్కడ సినిమాను విడుదల చేసిన డిస్ట్రిబ్యూటర్ కి రూ.4 కోట్లకు పైగా నష్టం వచ్చిందని చెబుతున్నారు. అలాగే తమిళనాడులో కూడా ఈ సినిమా పెద్దగా లాభాలు చూపించలేదు. పెట్టుబడికి నష్టం లేకుండా బయటపడ్డారని సమాచారం. కర్నాటకలో మరీ దారుణంగా ఉంది. తెలుగు స్టేట్స్ లో మాత్రం బ్రేక్‌ ఈవెన్‌ స్థాయికి చేరుకుందని టాక్‌.