జయం రవి కి కోర్టులో ఎదురుదెబ్బ, ఆస్తి పత్రాలు సమర్పించాలని ఆదేశం, కారణం ఏంటంటే?
ఈమధ్య కాలంలో ఎక్కువగా వివాదాలతో వార్తల్లో నిలుస్తున్నాడు సౌత్ హీరో జయం రవి. తాజగా ఆయన తన భార్యతో విడాకుల కోసం కోర్టుకెక్కారు. ఓ సినిమా కాల్షీట్ల విషయంలో కూడా వివాదంలో చిక్కుకున్నాడు రవి. ఈక్రమంలో న్యాయస్థానంలో జయం రవికి ఎదురు దెబ్బ తగిలింది.
తమిళ సినీ పరిశ్రమలో స్టార్ హీరోగా కొనసాగుతున్నారు జయం రవి. ప్రస్తుతం ఆయన నటించిన పరాశక్తి, కరాటే బాబు, జీనీ వంటి సినిమాలు నిర్మాణంలో ఉన్నాయి. ఈ నేపథ్యంలో, కోయంబత్తూరుకు చెందిన బాబీ టచ్ గోల్డ్ యూనివర్సల్ సంస్థ తమ నిర్మాణంలో రెండు సినిమాల్లో నటించడానికి జయం రవితో ఒప్పందం కుదుర్చుకుంది. ఈ సినిమాల కోసం 2025 జనవరి నుండి మార్చి వరకు 80 రోజుల పాటు కాల్షీట్లు ఇచ్చారు రవి మోహన్. ఆయన కాల్షీట్ కేటాయించిన తర్వాత కూడా, షూటింగ్ ప్రారంభం కాకపోవడంతో ఆయన ఇతర చిత్రాలలో నటించలేకపోయారు.
ఇక తాను ఇచ్చిన కాల్షీట్ కాంట్రాక్ట్ గడువు ముగిసినందున రవి మోహన్ ఈ సినిమా నుండి బయటకు వెళ్లినట్లు సమాచారం. ఈక్రమంలో సినిమాలో నటించడానికి తీసుకున్న 6 కోట్ల రూపాయల అడ్వాన్స్ను తిరిగి ఇవ్వడానికి రవి నిరాకరించినట్లు తెలుస్తోంది. దీంతో ఆ 6 కోట్ల రూపాయలను తిరిగి చెల్లించాలని ఆదేశించాలని కోరుతూ బాబీ టచ్ గోల్డ్ సంస్థ హైకోర్టును ఆశ్రయించింది.
అయితే మరో వైపు ఇచ్చిన కాల్షీట్లలో సినిమాను నిర్మించకుండా జాప్యం చేసినందుకు 9 కోట్ల రూపాయల నష్టపరిహారం చెల్లించాలని జయంరవి తరపున లాయర్లు కూడా బాబీ గోల్డ్ టచ్ సంస్థపై దావా వేశారు. ఈ రెండు కేసులు జస్టిస్ అబ్దుల్ కుత్తుస్ ముందు విచారణకు వచ్చాయి. ఈ కేసు ద్వారా ప్రతికూల ప్రచారం జరుగుతుందని, దానికి బదులుగా డబ్బు తిరిగి ఇవ్వవచ్చని న్యాయమూర్తి రవి మోహన్ తరపు న్యాయవాదిని ప్రశ్నించారు.
దీనికి సమాధానంగా రవి మోహన్ తరపు న్యాయవాది కార్తీకై బాలన్ తమ వాదన వినిపించాలనుకుంటున్నట్లు తెలిపారు. తదుపరి సినిమాలో నటించేటప్పుడు డబ్బు తిరిగి ఇస్తామని చెప్పినా నిర్మాణ సంస్థ అంగీకరించలేదని, ఇచ్చిన కాల్షీట్లను కూడా ఉపయోగించలేదని ఆయన అన్నారు.
నిర్మాణ సంస్థ తరఫు న్యాయవాది మాట్లాడుతూ, రవి మోహన్ తన భార్యతో వివాదం సమయంలో అద్దె ఇంట్లో నివసిస్తున్నాడని, ఇప్పుడు సొంతంగా సినిమా నిర్మాణ సంస్థను ప్రారంభించాడని అన్నారు. తమ కంపెనీ ఇచ్చిన ముందస్తు డబ్బుతో రవి మోహన్ సొంత నిర్మాణ సంస్థను ప్రారంభించాడని కూడా వారు ఆరోపించారు.
ఈ వివాదాన్ని పరిష్కరించడానికి మధ్యవర్తిని నియమిస్తామని న్యాయమూర్తి చెప్పారు. అంతే కాదు రూ.9 కోట్ల పరిహారం కోరుతూ రవి మోహన్ దాఖలు చేసిన పిటిషన్ను తోసిపుచ్చారు. నటుడు రవి మోహన్ రూ.5.90 కోట్ల ఆస్తి హామీని దాఖలు చేయాలని న్యాయమూర్తి ఆదేశించారు. అంతే కాదు ఈ విషయంలో నాలుగు వారాల్లోగా నివేదిక దాఖలు చేయాలని పేర్కొంటూ విచారణను వాయిదా వేశారు.