జబర్దస్త్ లో కుళ్ళు రాజకీయాలు భరించలేకపోయా..నరకం చూపించారు, అసలు బాగోతం బయటపెట్టిన నూకరాజు

బుల్లితెర టీవీ కార్యక్రమాలతో పలువురు నటీనటులు కమెడియన్లు గా రాణిస్తున్నారు. కొందరు బిగ్ బాస్ లాంటి రియాలిటీ షోలకి వెళ్లి పాపులారిటీ మరింత పెంచుకుంటున్నారు. హాస్యం బాగా పండించే వారికి జబర్దస్త్ షోలలో గుర్తింపు దక్కుతోంది. తన ట్యాలెంట్ తో బాగా పాపులర్ అయిన కమెడియన్ నూకరాజు. 

షార్ప్ గా కామెడీ పంచ్ లు పేల్చడంలో నూకరాజు దిట్ట. జబర్దస్త్ తో పాటు, శ్రీదేవి డ్రామా కంపెనీలో కూడా నూకరాజు అప్పుడప్పుడూ సందడి చేస్తుంటాడు. దాదాపు రెండున్నరేళ్ల పాటు అవమానాలు ఎదుర్కొని కష్టపడితే తనకి ఈ గుర్తింపు దక్కినట్లు నూకరాజు తెలిపాడు. ఇటీవల ఇంటర్వ్యూలో నూకరాజు జబర్దస్త్ షో గురించి సంచలన వ్యాఖ్యలు చేశాడు. 

టీమ్ లీడర్లుగా ఉన్న వాళ్ళు, సీనియర్స్ కొందరు కుళ్ళు రాజకీయాలు ప్రదర్శిస్తారని.. తాను ఎదుగుతున్న టైంలో ఆ కుళ్ళు రాజకీయాలని భరించలేకపోయానని నూకరాజు కుండబద్దలు కొట్టేశాడు. జబర్దస్త్ షోలో ట్యాలెంట్ గురించి పట్టించుకునేది చాలా తక్కువ. వాళ్ళకి కావలసిన వాళ్ళని మాత్రమే హైలైట్ చేయడానికి ప్రయత్నిస్తారు. 

కనీసం డైలాగ్ చెప్పడం కూడా రానివాళ్ళని బలవంతంగా హైలైట్ చేయాలనీ చూస్తారు. ముందుగా ట్యాలెంట్ ఉన్న వాళ్ళకి అవకాశం ఇచ్చి ఆ తర్వాత తమకి కావలసిన వాళ్ళకి ఛాన్స్ ఇస్తే అదో పద్ధతి. కానీ ఇక్కడ అలా ఉండదు. కొన్నిసార్లు ఈ రాజకీయాలు భరించలేక ముఖం మీద అడిగేసిన సందర్భాలు ఉన్నాయి. 

అలా అడిగినప్పుడు నన్ను కొన్ని ఎపిసోడ్స్ నుంచి తీసేశారు. మరికొన్నిసార్లు ప్రోమోలో కూడా నేను కనపడకుండా చేసేవారు. దీనివల్ల చాలా సందర్భాల్లో మెంటల్ గా డిస్ట్రబ్ అయ్యా. ఇంత రాజకీయం జరుగుతున్నా నన్ను నా రైటింగ్ కాపాడింది. ఆడియన్స్ కి చేరువ చేసింది అని నూకరాజు తెలిపారు. ఇప్పుడు నూకరాజు జబర్దస్త్ లో స్వయంగా టీం లీడర్ గా ఎదిగాడు. 

ప్రస్తుతం తన సమస్యలు కొంత వరకు తీరాయని నూకరాజు తెలిపారు. ఒక సమస్య తీరింది అనుకుంటే మరో సమస్య ఉందట. అదే తన పెళ్లి. నూకరాజు ప్రస్తుతం ఏంజెల్ ఆసియాతో ప్రేమలో ఉన్న సంగతి తెలిసిందే. వీరిద్దరి పెళ్ళికి పెద్దలు అంగీకారం తెలపడం లేదట. ఎప్పటికైనా వాళ్ళని ఒప్పించే పెళ్లి చేసుకుంటాం అని నూకరాజు తెలిపారు. 

అయితే లేట్ అయ్యే కొద్దీ ఇది ఎక్కడ ప్రేమ లేదు ఫ్రెండ్ షిప్ మాత్రమే అంటుందేమో అని మరో టెన్షన్ అంటూ సరదాగా తన ప్రియురాలిని ఉద్దేశించి తెలిపాడు. పక్కనే ఉన్న ఆమె దిండుతో నూకరాజుని ప్రేమగా కొట్టింది.