ఆ జిల్లా కలెక్టర్ కథతో రామ్ చరణ్ - శంకర్ సినిమా, రియల్ గేమ్ ఛేంజర్ ఎవరో తెలుసా..?

గేమ్ ఛేంజర్ రియల్ కథ అని మీకు తెలుసా..? ఓ జిల్ల కలెక్టర్ రియల్ స్టోరీతో.. శంకర్ ఈసినిమా చేశాడని మీకు తెలుసా..? రీల్ గేమ్ ఛేంజర్ రామ్ చరణ్ అయితే..  ఇంతకీ ఆ రియల్ గేమ్ ఛేంజర్ ఎవరు..?

రియల్ గేమ్ ఛేంజర్

శంకర్ దర్శకత్వంలో రూపొందిన గేమ్ ఛేంజర్ సినిమాలో రామ్ చరణ్ ఐఏఎస్ అధికారిగా నటించారు. ఈ సినిమా పొంగల్ కానుకగా జనవరి 10న పాన్ ఇండియా రేంజ్ లో రిలీజ్ అయ్యి  మంచి విజయాన్ని సాధిస్తోంది. ఈ సినిమా కథ ఒక జిల్లా  కలెక్టర్ నిజ జీవిత కథ అని నటుడు ఎస్.జే.సూర్య ఒక ఇంటర్వ్యూలో చెప్పారు. ఆ కలెక్టర్ పేరు టీ.ఎన్.శేషన్. ఆయన ఎవరు? ఆయన ఏం చేశారు? 

టీఎన్ శేషన్

ఎవరీ టీ.ఎన్.శేషన్?

మధురై జిల్లా కలెక్టర్  టీ.ఎన్.శేషన్. ఆయన  1933లో తమిళనాడులో పుట్టారు. 1953లో మద్రాస్ పోలీస్ ఉద్యోగంలో ఉత్తీర్ణులైనప్పటికీ ఆ ఉద్యోగంలో చేరలేదు. 1954లో యూపీఎస్సీ సివిల్ సర్వీసెస్ పరీక్షలో ఉత్తీర్ణులై 1955లో ఐఏఎస్ అధికారిగా నియమితులయ్యారు. పలు జిల్లాల్లో కలెక్టర్‌గా పనిచేసిన తర్వాత, అణుశక్తి సంఘం కార్యదర్శిగా, అంతరిక్ష శాఖలో జాయింట్ సెక్రటరీగా, పర్యావరణ, అటవీ శాఖ మంత్రిత్వ శాఖ కార్యదర్శిగా పనిచేశారు. చివరకు భారత సివిల్ సర్వీసెస్‌లో అత్యున్నత పదవి అయిన కేబినెట్ కార్యదర్శిగా కూడా శేషన్ పనిచేశారు.

టీఎన్ శేషన్ ఎవరు

తన ఉద్యోగ జీవితంలో పలుమార్లు అప్పటి రాజకీయ నాయకులతో, అధికారులతో శేషన్ ఘర్షణ పడ్డారు. ముఖ్యంగా 1970లలో, తమిళనాడు పరిశ్రమలు, వ్యవసాయ శాఖ కార్యదర్శిగా ఉన్నప్పుడు, అప్పటి ముఖ్యమంత్రితో విభేదాలు రావడంతో ఆ పదవికి రాజీనామా చేశారు. అదేవిధంగా, పర్యావరణ, అటవీ శాఖ మంత్రిత్వ శాఖ కార్యదర్శిగా ఉన్నప్పుడు, టెహ్రీ డ్యామ్, సర్దార్ సరోవర్ డ్యామ్ నిర్మాణ ప్రాజెక్టులను వ్యతిరేకించారు.

గేమ్ ఛేంజర్ కథ శేషన్ జీవితంలోని పలు సంఘటనలను ఆధారంగా చేసుకుని తీయబడింది. ఇందులో హీరో రామ్ చరణ్ పోలీస్ ఉద్యోగం కంటే ఐఏఎస్‌ను ఎంచుకోవడం, రాజకీయ నాయకులతో ఘర్షణ పడటం వంటివి ఉన్నాయి.

ఎన్నికల కమిషనర్ గా టీఎన్ శేషన్

టీ.ఎన్. శేషన్ 1990-96 వరకు భారతదేశ ప్రధాన ఎన్నికల కమిషనర్‌గా పనిచేశారు. భారత ఎన్నికల వ్యవస్థను రూపొందించడంలో ఆయన కీలక పాత్ర పోషించారు. అనేక ఎన్నికల సంస్కరణలను తీసుకురావడం ద్వారా ఆయన బాగా ప్రసిద్ధి చెందారు.

మరీ ముఖ్యంగా ఓటర్లకు లంచాలు ఇవ్వడం, బెదిరించడం, ఎన్నికల సమయంలో మద్యం పంపిణీ చేయడం, ప్రచారానికి ప్రభుత్వ నిధులు, వాహనాలను ఉపయోగించడం, ఓటర్లలో కుల, మత విద్వేషాలు రెచ్చగొట్టడం, ప్రచారానికి ప్రార్థనా స్థలాలను ఉపయోగించడం వంటి అక్రమాలను ఆయన అరికట్టారు. 

మాజీ ఐఏఎస్ టీఎన్ శేషన్

ఎన్నికల ప్రవర్తనా నియమావళి, ఓటరు గుర్తింపు కార్డు, ఎన్నికల ఖర్చులకు పరిమితి విధించడం వంటివి శేషన్ తీసుకొచ్చిన సంస్కరణలే. 1992లో, ఎన్నికల సమస్యల కారణంగా బీహార్, పంజాబ్‌లలో జరిగిన అసెంబ్లీ ఎన్నికలను ఆయన నేతృత్వంలోని ఎన్నికల సంఘం రద్దు చేసింది. తన పదవీకాలంలో, శేషన్ 40,000కు పైగా ఖర్చు ఖాతాలను సమీక్షించి 14,000 మంది అభ్యర్థులను అనర్హులుగా ప్రకటించారు. ఆయన ఎన్నికల సంస్కరణలకు గాను 1996లో రామన్ మెగ్సెసే అవార్డు లభించింది.

టీఎన్ శేషన్ కథ

1996లో ప్రధాన ఎన్నికల కమిషనర్ పదవి నుంచి టీ.ఎన్.శేషన్ పదవీ విరమణ చేశారు. 1997లో, రాష్ట్రపతి ఎన్నికల్లో కె.ఆర్.నారాయణన్‌పై పోటీ చేసి ఓడిపోయారు. 1999లో గాంధీనగర్ లోక్‌సభ నియోజకవర్గం నుంచి కాంగ్రెస్ తరపున పోటీ చేసి బిజెపి నాయకుడు ఎల్.కె.అద్వానీ చేతిలో ఓడిపోయారు. ఆ తర్వాత ప్రజా జీవితం నుంచి వైదొలిగిన శేషన్, చెన్నైలోని గ్రేట్ లేక్స్ మేనేజ్‌మెంట్ ఇన్‌స్టిట్యూట్‌లో, ఆ తర్వాత ముసోరీలోని LBSNAAలో కీలక బాధ్యతలు నిర్వర్తించారు. 2019లో చెన్నైలోని తన ఇంట్లో శేషన్ మరణించారు. అప్పుడు ఆయన వయసు 86.