5 కోట్ల బడ్జెట్ తో 50 కోట్లు కలెక్ట్ చేసిన చిన్న సినిమా.. ఓటీటీ స్ట్రీమింగ్ ఎప్పుడు.. ఎక్కడ చూడొచ్చంటే?

కేవలం 5 కోట్లతో తెరకెక్కిన ఓ చిన్న సినిమా.. 50 కోట్లు వసూలు చేసి.. భారీ లాభాలు తెచ్చింది. అంతే కాదు ఆడియన్స్ మనసులను గెలిచింది. ఇంతకీ ఏంటా సినిమా? ఓటీటీలో రిలీజ్ ఎప్పుడు? ఎక్కడా?

Image Credit : Aaradyaa Studios

అలరిస్తున్న మలయాళ సినిమాలు..

ఈ మధ్య కాలంలో మలయాళ సినిమాలు ఎక్కువగా ఆడియన్స్ ను అలరిస్తున్నాయి. ఓటీటీల ప్రభావంతో అన్ని భాషల్లో మలయాళ సినిమాలకు ఆదరణ పెరిగిపోయింది. మంచి కథ, కాన్సెప్ట్, నటన తో ఆ సినిమాలు అన్నిభాషల ప్రేక్షకులను ఆకర్శిస్తున్నాయి. గతఏడాది అద్భుతమైన విజయాలతో మలయాళ పరిశ్రమ దేశవ్యాప్తంగా దూసుకుపోయింది... చాలా తక్కువ బడ్జెట్‌తో తెరకెక్కిన సినిమాలు వందల కోట్ల వసూళ్లను సాధిస్తూ పరిశ్రమ స్థాయిని మరో మెట్టు పైకి తీసుకెళ్లాయి. ఈ ఏడాది కూడా లోకా లాంటి సినిమాలతో అదే విజయపరంపరను కొనసాగిస్తూ మలయాళ పరిశ్రమ బలమైన కంటెంట్‌తో ప్రేక్షకులను ఆకట్టుకుంటోంది. అలాంటి విజయవంతమైన సినిమాల జాబితాలో ‘ఎకో’ సినిమా ఒకటిగా నిలిచింది.

Image Credit : Muzik247/ Youtube

బ్లాక్ బస్టర్ హిట్ అయిన ఎకో మూవీ..

సందీప్ వినీత్, నరేన్, బినూ పప్పు, సౌరభ్ సచ్ దేవా కీలక పాత్రల్లో నటించిన ఎకో సినిమాకు దింజిత్ అయ్యతన్ దర్శకత్వం వహించారు. ఈ చిత్రాన్ని ప్రముఖ నటుడు జయరామ్ నిర్మించగా, కథ , స్క్రీన్‌ప్లేను బాహుల్ రమేశ్ అందించారు. ముజీబ్ అందించిన నేపథ్య సంగీతం సినిమాకు ప్రధాన ఆకర్షణగా నిలిచి ప్రేక్షకుల నుంచి మంచి స్పందనను పొందింది. నవంబర్ 21న థియేటర్లలో విడుదలైన ‘ఎకో’ సినిమాకు మొదటి షో నుంచే పాజిటివ్ టాక్ వచ్చింది. కేవలం 5 కోట్ల రూపాయల బడ్జెట్‌తో నిర్మించిన.. ఈ సినిమా, బాక్సాఫీస్ వద్ద 50 కోట్ల రూపాయలకు పైగా వసూళ్లు సాధించడం విశేషం.

Image Credit : PR Team

ఓటీటీలో ఎకో రిలీజ్ ఎప్పుడు? ఎక్కడ?

ఈ ఏడాది చివర్లో కూడా మలయాళ సినిమా విజయ పరంపరను కొనసాగించిన చిత్రంగా ‘ఎకో’ గుర్తింపు పొందింది.థియేటర్లలో మంచి విజయాన్ని అందుకున్న ఈ సినిమా ఇప్పుడు ఓటీటీ ప్రేక్షకుల ముందుకు రావడానికి సిద్ధమవుతోంది. ‘ఎకో’ సినిమా ఓటీటీ హక్కులను ప్రముఖ స్ట్రీమింగ్ సంస్థ నెట్‌ఫ్లిక్స్ సొంతం చేసుకుంది. ఈ నెల 31 నుంచి ఈ సినిమాను మలయాళంతో పాటు తెలుగు, తమిళ, కన్నడ, హిందీ భాషల్లో స్ట్రీమింగ్ చేయనున్నట్లు సమాచారం.

Image Credit : Aaradyaa Studios

అద్భుతమైన కథ, స్క్రీన్ ప్లే తో..

ఇక ఎకో సినిమా కథ విషయానికి వస్తే, కొంతమంది వ్యక్తులు ఒక నిందితుడిని వెతుకుతూ అడవిలోని ఓ కొండ ప్రాంతానికి చేరుకుంటారు. ఆ కొండ ప్రాంతంలో వారికి ఎదురయ్యే సంఘటనలు, అక్కడ దాగి ఉన్న రహస్యాలు ఏమిటి అనే అంశాల చుట్టూ సినిమా కథ సాగుతుంది. మిస్టరీ , థ్రిల్లర్ అంశాలతో రూపొందిన ఈ సినిమా ఓటీటీ ప్రేక్షకులను కూడా ఆకట్టుకుంటుందని అంచనా వేస్తున్నారు.థియేటర్లలో సాధించిన విజయంతో పాటు, ఇప్పుడు ఓటీటీ విడుదలతో ‘ఎకో’ సినిమా మరింతగా ప్రేక్షకుల వరకు చేరుకోనుంది. మలయాళ సినిమాలపై ఆసక్తి ఉన్న ప్రేక్షకులు ఈ సినిమాను నెట్‌ఫ్లిక్స్‌లో ఆస్వాదించేందుకు సిద్ధమవుతున్నారు.