సముద్రంలో ఫ్లోటింగ్ మూవీ థియేటర్ చూశారా, అబ్బురపరిచే దృశ్యాలు

నేటి కాలంలో నెట్‌ఫ్లిక్స్, అమెజాన్ ప్రైమ్, హాట్‌స్టార్ వంటి అనేక ఓటిటి ప్లాట్‌ఫామ్‌లు మన చేతిలో ఉన్నప్పటికీ, థియేటర్‌లో సినిమా చూడటం అనేది ఒక ప్రత్యేక అనుభవం. దాన్ని ఏ ఓటిటి ప్లాట్‌ఫామ్‌తోనూ భర్తీ చేయలేమనేది వాస్తవం. అందుకే థియేటర్లకు ఇప్పటికీ ఆదరణ తగ్గలేదు. థియేటర్‌లో ప్రజలతో కలిసి కూర్చుని సినిమా చూసి, అరుస్తూ, చప్పట్లు కొడుతూ ఆనందించడం ఎప్పుడూ ప్రత్యేక ఆనందాన్ని ఇస్తుంది.

ఈ సినిమా అనుభవాన్ని మించి, విభిన్నమైన, కొత్త రకమైన ఫీచర్లతో కూడిన థియేటర్లు ప్రపంచంలోని కొన్ని ప్రాంతాల్లో మాత్రమే ఉన్నాయి. సాధారణంగా వెళ్లి కూర్చుని సినిమా చూడటం కాకుండా, మరో విభిన్నమైన అనుభూతిని అందించే ఒక అరుదైన థియేటర్ గురించి ఇప్పుడు చూద్దాం. ఆ థియేటర్ పేరు ఆర్కిపెలాగో సినిమాస్. థాయిలాండ్‌లో ఉన్న ఈ థియేటర్ చాలా ప్రత్యేకమైనది.

అసలు ఏంటి దాని ప్రత్యేకత అని ఆలోచిస్తున్నారా? ఈ థియేటర్ భూమి మీద లేదు. ఇది సముద్రంలో ఉంది. ఈ థియేటర్‌లో రాత్రిపూట మాత్రమే సినిమా ప్రదర్శిస్తారు. సముద్రంలో కూర్చుని సినిమా చూస్తే ఎలా ఉంటుందో అని ఆలోచించేవారికి ఈ ఆర్కిపెలాగో సినిమా సరైన ప్రదేశం. థాయిలాండ్‌లోని కుడు అనే ద్వీపంలో ఈ విచిత్రమైన థియేటర్ ఉంది. సముద్రంలో తేలియాడే తెప్పపై కూర్చుని ఇక్కడ సినిమా చూడవచ్చు.

ఓలే షీరెన్ అనే జర్మన్ ఆర్కిటెక్ట్ ఈ థియేటర్‌ను డిజైన్ చేశారు. థాయిలాండ్‌లోని స్థానికులు తెప్పపై చేపలు పట్టడం చూసి, సముద్రంలో తెప్ప సహాయంతో థియేటర్ ఎందుకు నిర్మించకూడదనే ఆలోచన ఓలే షీరెన్‌కు వచ్చింది. సముద్రంలో తేలియాడుతూ సినిమా చూడాలనే ఉద్దేశంతో, కుర్చీలకు బదులుగా ప్రేక్షకులు కూర్చోవడానికి బీన్ బ్యాగ్‌లను ఈ థియేటర్‌లో ఉపయోగిస్తున్నారు. ఇలాంటి ప్రదేశంలో సినిమా చూడటం ఖచ్చితంగా జీవితకాల అనుభూతి అని చెప్పవచ్చు.