- Home
- Entertainment
- ఒక్క మూవీతో ఆస్తులన్నీ పోగొట్టుకున్న తెలుగు స్టార్ హీరోయిన్, కాపాడిన తమిళ హీరో ఎవరో తెలుసా?
ఒక్క మూవీతో ఆస్తులన్నీ పోగొట్టుకున్న తెలుగు స్టార్ హీరోయిన్, కాపాడిన తమిళ హీరో ఎవరో తెలుసా?
తెలుగు సినీమా చరిత్రలో తిరుగులేని తారగా వెలుగు వెలిగిన హీరోయిన్ అంజలీదేవి. తొలితరం హీరోయిన్ గా రికార్డ్ సాధించిన ఆ నటి.. ఒకే ఒక్క సినిమాతో ఆస్తులు ఎలా పొగొట్టుకుందో తెలుసా?
తెలుగు సినిమా చరిత్రలో తొలి తరం హీరోయిన్ గా గుర్తింపు పొందిన వారిలో అంజలీదేవి ఒకరు. 1940లలో సినీ రంగ ప్రవేశం చేసిన ఆమె, అనేక విజయవంతమైన చిత్రాల్లో నటించి ప్రేక్షకుల మనసుల్లో చిరస్థాయిగా నిలిచిపోయారు. చిన్ననాటి నుంచే నాటక ప్రదర్శనలలో పాల్గొన్న అంజలీదేవి, ఆ అనుభవంతోనే మద్రాస్‌కు చేరుకుని సినిమా రంగంలో అడుగుపెట్టారు.
ఆమెకు తొలి గుర్తింపు తెచ్చిన చిత్రం ‘గొల్లభామ’. అనంతరం వచ్చిన ‘కీలుగుర్రం’ సినిమా కూడా ఆమెకు మంచి పేరు తెచ్చిపెట్టింది. అంజలీదేవి అప్పటి టాప్ హీరోలందరితో కలిసి నటించడంతో పాటు, తన అభినయంతో ప్రేక్షకుల హృదయాలను గెలుచుకున్నారు. ఆమె భర్త, ప్రసిద్ధ సంగీత దర్శకుడు పి. ఆదినారాయణరావుతో కలిసి కొన్ని సినిమాలు కూడా నిర్మించింది అంజలీదేవి. అయితే ఓ సినిమా వల్ల ఆమె ఆస్తులన్నీకోల్పోయిందని మీకు తెలుసా? ఈ విషయాన్ని రీసెంట్ గా ఓ దర్శకుడు ఇంటర్వ్యూలో వెల్లడించారు.
రీసెంట్ గా ప్రముఖ దర్శకుడు నందం హరిశ్చంద్రరావు ‘ట్రీ మీడియా’కు ఇచ్చిన ఇంటర్వ్యూలో అంజలీదేవి జీవితంలో ఒక ముఖ్యమైన ఘట్టాన్ని వెల్లడించారు. నందం హరిశ్చంద్రరావు మాట్లాడుతూ: ‘‘హిందీలో వారు నిర్మించిన సినిమా 'ఫూలోమ్ కి శేజ్' (Phoolon Ki Sej) అనుకోని విధంగా భారీ బడ్జెట్‌ను దాటి పోయింది.
ఈ సినిమా విడుదలైన తర్వాత ఆశించిన స్థాయిలో ఆడకపోవడంతో, ఆర్థికంగా తీరని నష్టాలను ఎదుర్కొన్నారు. ఈ నష్టాలను భరించేందుకు వారు అప్పటి వరకు కూడబెట్టిన ఆస్తులన్నీ అమ్ముకోవాల్సి వచ్చింది’’ అని చెప్పారు.
అయితే ఈ పరిస్థితుల్లోనూ అంజలీదేవి కుంగిపోకుండా, తన భర్తతో కలిసి మరోసారి సరికొత్త ప్రయాణాన్ని మొదలుపెట్టారు. అందులో భాగంగా రూపొందించిన ‘సతీ సక్కుబాయి’, ‘భక్త తుకారాం’ చిత్రాలు మంచి విజయాలను సాధించాయి. ప్రత్యేకించి ‘భక్త తుకారాం’ సినిమాలో తమిళ సినీ లెజెండ్ శివాజీ గణేశన్ ప్రధాన పాత్ర పోషించారు.
అంజలీదేవి ఆర్థికంగా కష్టాల్లో ఉన్నారని తెలుసుకున్న శివాజీ గణేశన్ ఈ సినిమాలో ఒక్క రూపాయి కూడా తీసుకోకుండా నటించారు. అప్పట్లో ఇది సంచలనంగా మారింది. మంచి ఆలోచనతో శివాజీ గణేషన్ చేసిన త్యాగం అంజలీదేవి కుటుంబాన్ని మళ్లీ నిలదొక్కుకునే స్థాయికి తీసుకువచ్చింది’’ అని నందం తెలిపారు.
ఈ సంఘటనలు అంజలీదేవి జీవితంలో ఎంతటి ధైర్యం, పట్టుదల ఉన్నాయో తెలియజేస్తున్నాయి. ఆమె కథ సినీ రంగంలో పనిచేస్తున్న ప్రతి ఒక్కరికి ఒక ప్రేరణగా నిలుస్తుంది. ఒకటి కాదు రెండు కాదు, ఎన్నో ఒడిదుడుకులను ఎదుర్కొంటూ, పదేళ్లకు పైగా స్టార్ హీరోయిన్ గా నిలిచిన అంజలీదేవి నిజమైన లెజెండ్.
అంతే కాదు హీరోయిన్ గా కెరీర్ ముగిసిన తరువాత తాను జంటగా నటించిన హీరోలకు తల్లి పాత్రలు కూడా చేశారు అంజలీదేవి. ఆతరువాత తరం హీరోలకు బామ్మ పాత్రల్లో కూడా నటించారు సీనియర్ నటీమణి. తొలితరం హీరోయిన్ గా ఆతరువాత క్యారెక్టర్ ఆర్టిస్ట్ గా అంజలీదేవి ఎంతో మంది తారలకు మార్గదర్శకంగా నిలిచారు.
