భారీ బందోబస్తుతో అల్లు అర్జున్ విడుదల..జైలులో నేలపైనే పడుకున్న బన్నీ, రాత్రంతా ఏం చేశారో తెలుసా

శుక్రవారం రోజు 12 గంటలకు అరెస్ట్ అయిన అల్లు అర్జున్ శనివారం ఉదయం మధ్యంతర బెయిలుతో విడుదల అయ్యారు. భారీ బందోబస్తుతో అల్లు అర్జున్ ని పోలీస్ అధికారులు ఎస్కార్ట్ వాహనంలో ఇంటికి తరలించారు.

allu arjun

శుక్రవారం రోజు 12 గంటలకు అరెస్ట్ అయిన అల్లు అర్జున్ శనివారం ఉదయం మధ్యంతర బెయిలుతో విడుదల అయ్యారు. భారీ బందోబస్తుతో అల్లు అర్జున్ ని పోలీస్ అధికారులు ఎస్కార్ట్ వాహనంలో ఇంటికి తరలించారు. వాస్తవానికి అల్లు అర్జున్ శుక్రవారం సాయంత్రమే విడుదల కావలసి ఉంది. కానీ హై కోర్టు బెయిల్ ఆర్డర్ కాపీలు అప్లోడ్ కాలేదు అని అధికారులు చెప్పడంతో అల్లు అర్జున్ విడుదల శనివారం ఉదయంకి వాయిదా పడింది. 

డిసెంబర్ 4న విషాదంతో వివాదం మొదలు 

డిసెంబర్ 4న సంధ్య థియేటర్ వద్ద పుష్ప 2 ప్రీమియర్ షో సందర్భంగా జరిగిన తొక్కిసలాటలో 35 ఏళ్ళ రేవతి అనే మహిళ మరణించారు. ఆమె కొడుకు అపస్మారక స్థితితో ఆసుపత్రిలో చికిత్స పొందుతున్నారు. అల్లు అర్జున్ థియేటర్ ని అనుమతి లేకుండా విజిట్ చేయడం వల్లే ఈ సంఘటన జరిగింది అంటూ పోలీసులు థియేటర్ యాజమాన్యం, అల్లు అర్జున్ పై పలు సెక్షన్ల కింద కేసు నమోదు చేసిన సంగతి తెలిసిందే. అక్కడి నుంచి ఈ వివాదం మొదలయింది. అయితే అల్లు అర్జున్ వెంటనే స్పందించి రేవతి కుటుంబసభ్యులకు సహాయంగా 25 లక్షలు ప్రకటించారు. 

శుక్రవారం బన్నీ అరెస్ట్ 

పోలీసులు కేసు నమోదు చేసి విచారణ ప్రారంభించారు. ఈ నేథ్యంలో అనూహ్యంగా శుక్రవారం రోజు 11.30 గంటల ప్రాంతంలో అల్లు అర్జున్ నివాసానికి వెళ్లి అతడిని అరెస్ట్ చేశారు. స్వల్ప వాగ్వాదం తర్వాత అల్లు అర్జున్ పోలీసులకు సహకరించి పోలీస్ స్టేషన్ కి వెళ్లారు. అక్కడి నుంచి అల్లు అర్జున్ ని కోర్టులో పోలీసులు హాజరు పరిచారు. కోర్టు 14 రోజుల రిమాండ్ విధించింది. వైద్య పరీక్షల అనంతరం బన్నీని  చంచల్ గూడ జైలుకి తరలించారు. 

మధ్యంతర బెయిల్ మంజూరు 

అల్లు అర్జున్ ని బయటకి తీసుకువచ్చేందుకు అల్లు అరవింద్, మెగా ఫ్యామిలీ తీవ్ర ప్రయత్నాలు చేసినట్లు తెలుస్తోంది. ఇందులో భాగంగా హైకోర్టులో లాయర్ నిరంజన్ రెడ్డి బన్నీ బెయిల్ పిటిషన్ ని వాదించారు. అక్కడ జరిగింది తొక్కిసలాట అని.. ఈ కేసుని అల్లు అర్జున్ కి ఎలా ఆపాదిస్తారు అంటూ నిరంజన్ రెడ్డి వాదించారు. ఆయన వాదనలతో ఏకీభవించిన కోర్టు సాయంత్రానికి మధ్యంతర బెయిలు మంజూరు చేసింది. అల్లు అర్జున్ సొంత పూచికత్తు, 50 వేల బాండ్ తో బెయిల్ ఇచ్చింది. 

రాత్రంతా జైలులోనే పుష్పరాజ్.. 

కొద్దిసేపట్లో అల్లు అర్జున్ రిలీజ్ అవుతారని అంతా భావించారు. కానీ హై కోర్టు ఆర్డర్ కాపీ అప్లోడ్ కాలేదని జైలు అధికారులు ఆలస్యం చేశారు. ఇక రాత్రి విడుదల చేయడం వీలు కాలేదు. దీనితో శనివారం ఉదయం అల్లు అర్జున్ ని జైలు అధికారులు విడుదల చేశారు. శుక్రవారం రాత్రి వరకు అల్లు అరవింద్, మామగారు చంద్రశేఖర్ రెడ్డి జైలు వద్దే ఉన్నట్లు తెలుస్తోంది. కావాలనే అల్లు అర్జున్ రిలీజ్ ని ఆలస్యం చేస్తున్నారని అల్లు అరవింద్ అసహనంతో జైలు నుంచి క్యాబ్ బుక్ చేసుకుని వెళ్లిపోయారు. 

ఏమి తినకుండా నేలపైనే పడుకున్న బన్నీ 

రాత్రంతా అల్లు అర్జున్ జైలు ఇబ్బందికి గురైనట్లు తెలుస్తోంది. అల్లు అర్జున్ కి జైలు అధికారులు క్లాస్ 1 బ్యారర్ కేటాయించారు. కేవలం టీ స్నాక్స్ మాత్రమే తీసుకున్న బన్నీ ఏమి తినకుండా పడుకున్నారట. అల్లు అర్జున్ కి జైలు అధికారులు కొత్త దుప్పటి ఏర్పాటు చేశారట. కానీ బన్నీ వాటిని తిరస్కరించినట్లు తెలుస్తోంది. సాధారణ వ్యక్తి లాగే నేలపైనే పడుకుంటానని చెప్పారట. ఇబ్బంది పడుతున్నా జైలు అధికారులు ఇచ్చిన సౌకర్యాలని బన్నీ అంగీకరించలేదని సమాచారం. మొత్తంగా బన్నీ శనివారం ఉదయం విడుదల అయ్యారు. జైలు మెయిన్ గేటు నుంచి కాకుండా మరో గేటు నుంచి పోలీసులు అల్లు అర్జున్ ని బందోబస్తుతో తరలించారు. మీడియా హంగామా తగ్గించేందుకు ఇలా చేసినట్లు తెలుస్తోంది. రిలీజ్ అయిన అల్లు అర్జున్ ఈ సంఘటనపై ఏం మాట్లాడతారు అనేది ఇప్పుడు ఉత్కంఠగా మారింది.