మంచిరోజులొచ్చాయి... ఆగస్టులో కళకళాడుతున్న టాలీవుడ్ బాక్సాఫీస్!

ఆగస్టు టాలీవుడ్ కి ఊపిరి పోసింది. బ్యాక్ టు బ్యాక్ హిట్స్ తో థియేటర్స్ కి కళ తెచ్చింది. డిజాస్టర్స్ తో జులై తీవ్ర ఆందోళనకు గురి చేయగా... ఈ నెలలో విడుదలైన చిత్రాలు రిలీఫ్ ఇచ్చాయి.  

Tollywood

టాలీవుడ్ కి మంచి రోజులొచ్చాయి. వరుస హిట్స్ తో బాక్సాఫీస్ కళకళలాడుతుంది. ఆగస్టు నెలలో విడుదలైన చిన్న చిత్రాలు భారీ విజయాలు నమోదు చేశాయి. జులై నెల పరిశ్రమకు పీడకలగా మారగా, ఆగస్టు గొప్ప ఉపశనమిచ్చింది. వరుస డిజాస్టర్స్ టాలీవుడ్ ని కలవరపెట్టాయి. ముఖ్యంగా జులై నెలలో విడుదలైన పక్కా కమర్షియల్, ది వారియర్, థాంక్యూ, రామారావు ఆన్ డ్యూటీ బాక్సాఫీస్ వద్ద చతికిలపడ్డాయి. కోట్ల రూపాయల నష్టాలు మిగిల్చిన ఈ చిత్రాలు మేకర్స్ లో కొత్త ఆందోళనకు బీజం వేశాయి. 

పెరిగిన టికెట్స్ ధరలతో పాటు ఓటీటీ ప్రభావంతో ప్రేక్షకులు థియేటర్స్ కి రావడం లేదన్న అభిప్రాయానికి నిర్మాతలు వచ్చారు. నిర్మాతలు, డిస్ట్రిబ్యూటర్స్ దారుణంగా నష్టపోతున్న తరుణంలో కొన్ని ప్రతిపాదనలు చేయడం జరిగింది. అలాగే ఆగస్టు 1నుండి కొత్త చిత్రాల షూటింగ్స్ నిలిపివేయాలని నిర్మాతల మండలి నిర్ణయం తీసుకుంది. అయితే ఆగస్టు లో విడుదలైన బింబిసార, సీతారామం ఈ అభిప్రాయాన్ని మార్చేశాయి. సినిమాలో విషయం ఉంటే ప్రేక్షకులు థియేటర్స్ కి క్యూకడతారని నిరూపించాయి. 

ఆగస్టు 4న విడుదలైన బింబిసార, సీతారామం(Sitaramam) సూపర్ హిట్ టాక్ సొంతం చేసుకున్నాయి. రికార్డు ఓపెనింగ్స్ దక్కించుకున్న ఈ రెండు చిత్రాలు భారీ లాభాలు పంచడం ఖాయంగా కనిపిస్తుంది. 9 రోజులకు సీతారామం రూ. 22 కోట్లకు పైగా వరల్డ్ వైడ్ షేర్ అందుకుంది. ఈ మూవీ బ్రేక్ ఈవెన్ రూ. 17 కోట్లు కాగా ఇప్పటికే రూ. 5 కోట్ల లాభాలు రాబట్టింది. ఇక బింబిసార(Bimbisara) 9 రోజులకు రూ. 24.5 కోట్ల వరల్డ్ వైడ్ షేర్ అందుకుంది. ఈ మూవీ బ్రేక్ ఈవెన్ కేవలం రూ. 16 కోట్లు.. అంటే రూ. 8 కోట్ల ప్రాఫిట్ మేకర్స్ ఎంజాయ్ చేస్తున్నారు. ఈ రెండు చిత్రాలు రన్ సెకండ్ వీక్ కూడా సాలిడ్ గా ఉంది.

ఇక ఈ వారం మాచర్ల నియోజకవర్గం, కార్తికేయ 2(Karthikeya 2) చిత్రాలు ఒక రోజు వ్యవధిలో విడుదలయ్యాయి. నితిన్ హీరోగా తెరకెక్కిన మాచర్ల నియోజకవర్గం మిక్స్డ్ టాక్ సొంతం చేసుకోగా... కార్తికేయ 2 సూపర్ హిట్ టాక్ సొంతం చేసుకుంది. కార్తికేయ 2 మరో ప్రాఫిటబుల్ వెంచర్ గా ట్రేడ్ వర్గాలు అంచనా వేస్తున్నాయి. ఓపెనింగ్ డే వసూళ్లు సైతం సాలిడ్ గా ఉన్నాయి. ఇక మాచర్ల నియోజకవర్గం మాత్రం స్వల్ప నష్టాలు మిగిల్చే సూచనలు కనిపిస్తున్నాయి. ఓపెనింగ్ డే జోరు చూపించిన ఈ మూవీ సెకండ్ డే నెమ్మదించింది. మాచర్ల నియోజకవర్గం మినహాయిస్తే ఆగస్టు నెలలో విడుదలైన మూడు చిన్న చిత్రాలు భారీ విజయాల దిశగా అడుగులు వేస్తున్నాయి. 

ఇక ఇదే నెలలో విడుదల కానున్న లైగర్ ఫలితం చాలా కీలకం. విజయ్ దేవరకొండ మార్కెట్ తో సంబంధం లేకుండా భారీ ధరలకు లైగర్ హక్కులు బయ్యర్లు కొన్నారు. మంచి హైప్ ఉన్న లైగర్(liger) విజయం సాధిస్తే టాలీవుడ్ పంట పండినట్లే. మరి ట్రెండ్ కంటిన్యు అయ్యి విజయ్ దేవరకొండకు కూడా హిట్ దక్కుతుందేమో చూడాలి.