సారీ చెప్పడానికి రాత్రి మూడున్నరకి ఇంటికొచ్చాడు... - రిషబ్ పంత్ చిన్ననాటి కోచ్ తారక్ సిన్హా...
ఆస్ట్రేలియా టూర్ నుంచి రిషబ్ పంత్ ఓ కొత్త క్రికెటర్‌లా కనిపిస్తున్నాడు. మెల్‌బోర్న్‌లో మెరుపులు, సిడ్నీలో సెంచరీకి చేరువైన రిషబ్ పంత్, గబ్బాలో ఆస్ట్రేలియాకి దిమ్మెతిరిగే ఇన్నింగ్స్‌తో మ్యాచ్ విన్నర్‌గా మారిపోయాడు. రిషబ్ పంత్ గురించి కొన్ని ఇంట్రెస్టింగ్ విషయాలు బయటపెట్టాడు అతని చిన్ననాటి కోచ్ తారక్ సిన్హా...
ఉత్తరాఖండ్‌లో జన్మించిన రిషబ్ పంత్, ఢిల్లీలోని ప్రఖ్యాత క్లబ్ సోన్నెట్‌లో శిక్షణ తీసుకున్నాడు. ఇక్కడే హెడ్‌కోచ్‌గా ఉండేవాడు తారక్ సిన్హా...
‘సౌత్ ఢిల్లీలో ఉన్న నా క్లబ్ సోన్నెట్‌లో రిషబ్ పంత్ ట్రైయినింగ్‌కి వచ్చేవాడు. ఓ రోజు నెట్ సెషన్స్‌లో అతని తీరు నాకు ఏ మాత్రం నచ్చలేదు... నేను అసంతృప్తిగా ఉన్నానని అతను గమనించాడు.
రిషబ్ పంత్ ఆ రాత్రి నిద్రపోలేదు. తన ఇంటి నుంచి దాదాపు గంటసేపు బండి నడుపుకుంటూ వైశాలి ఏరియాకి వచ్చాడు.... అర్ధరాత్రి దాటాక ఎవరో తలుపు కొడుతున్న సౌండ్ వచ్చి వెళ్లి చూస్తే... రిషబ్ పంత్ బయట నించున్నాడు.
ఈ సమయంలో ఏంటి? ఎందుకు వచ్చావు? ఏమైంది? అని అడిగాను. కేవలం మిమ్మల్ని అప్‌సెట్ చేసినందుకు సారీ చెప్పడానికి వచ్చా... అని చెప్పాడు. ఆ సంఘటన నాకు ఎప్పటికీ గుర్తిండిపోయింది.
రిషబ్ పంత్‌తో నేను చాలా కఠినంగా వ్యవహారించానని నా కుటుంబం నాతో గొడవపడ్డారు. అంత రాత్రి, చలిలో గంట సేపు ప్రయాణం చేసి సారీ చెప్పడానికి వచ్చాడంటే, రిషబ్ పంత్ చాలా ఎత్తుకు ఎదుగుతాడని ఆరోజే అర్థమైంది...’ అంటూ చెప్పుకొచ్చాడు రిషబ్ పంత్ చిన్ననాటి కోచ్ తారక్ సిన్హా.
టీమిండియా తరుపున 2017లో ఎంట్రీ ఇచ్చిన రిషబ్ పంత్, 2018 నుంచి టీమిండియాలో కీలక సభ్యుడిగా ఉన్నాడు. అయితే 2020-21 బోర్డర్ గవాస్కర్ ట్రోఫీ నుంచి రిషబ్ పంత్ ఆడుతున్న తీరు పూర్తిగా మారిపోయింది.
ఐపీఎల్ 2021 సీజన్‌లో ఢిల్లీ క్యాపిటల్స్‌కి కెప్టెన్‌గా వ్యవహారించిన రిషబ్ పంత్, కరోనా కారణంగా లీగ్‌కి బ్రేక్ పడే దాకా తన జట్టును పాయింట్ల పట్టికలో టాప్‌లో నిలబెట్టాడు.
‘రిషబ్ పంత్, టీమిండియాకి కెప్టెన్ అవుతాడా? లేదా ఇప్పుడే చెప్పడం తొందరపాటు అవుతుంది. ప్రస్తుతం అతను ప్లేయర్‌గా తనను తాను పూర్తిగా నిరూపించుకోవాల్సి ఉంది.
మహేంద్ర సింగ్ ధోనీ, విరాట్ కోహ్లీ లాంటి ప్లేయర్లు కూడా కెప్టెన్సీకి ముందు తమని తాము నిరూపించుకున్నారు. రిషబ్ పంత్‌కి అలాంటి పర్ఫామెన్స్ కావాలి’ అంటూ చెప్పుకొచ్చాడు తారక్ సిన్హా.
