Virat Kohli: చిన్నారి పాపతో విరాట్ కోహ్లీ క్యూట్ సెల్ఫీ.. వామికే అంటున్న ఫ్యాన్స్.. కానీ..!
Virat Kohli's Daughter: మరో నెల రోజులైతే విరాట్ కోహ్లీ-అనుష్క శర్మల కూతురు వామిక పుట్టి ఏడాది కానుంది. కానీ ఇంతవరకు అటు విరాట్ గానీ ఇటు అనుష్క గానీ వామిక ఎలా ఉంటుందనేదానిమీద చిన్న క్లూ కూడా ఇవ్వలేదు. ఒక్క ఫోటో కూడా షేర్ చేయలేదు.
టీమిండియా సారథి విరాట్ కోహ్లీ-అనుష్కశర్మ ల గారాల పట్టి వామిక కోహ్లీ ఎలా ఉంటుందో బయటప్రపంచానికి తెలియదు. ఈ ఏడాది జనవరి 11న జన్మించిన వామిక ఎలా ఉంటుందనే దానిపై కోహ్లీ-అనుష్క ఇంతవరకు ఒక్క ఫోటో కూడా విడుదల చేయలేదు.
అయితే ఇటీవల కోహ్లీ షేర్ చేసిన ఒక ఫోటో మాత్రం సామాజిక మాధ్యమాలలో వైరల్ గా మారింది. ఆ ఫోటోలో కోహ్లీ.. ఒక చిన్న పాపను ఎత్తుకుని సెల్ఫీకి ఫోజులిచ్చాడు.
అయితే ఫ్యాన్స్ అంతా ఆ చిన్నారి వామికే అని అనుకుంటున్నారు. కోహ్లీ కూతురు అని వారి వారి ఖాతాలలో పోస్టులు చేశారు. వాట్సాప్, ఇన్స్టాగ్రామ్, ఫేస్ బుక్ లలో షేర్ కూడా చేశారు.
కానీ కోహ్లీ ఎత్తుకున్నది వామిక కాదు. ఆ పాప టీమిండియా మాజీ స్పిన్నర్ హర్భజన్ సింగ్-గీతా బస్త్రా ల కూతురు హినయ హీర్ ప్లాహా.
ఇదిలాఉండగా.. త్వరలో జరుగబోయే దక్షిణాఫ్రికా సిరీస్ విరాట్ కోహ్లీకి కెరీర్ పరంగానే గాక కుటుంబపరంగా కూడా మెమోరేబుల్ ఈవెంట్ గా మారనున్నది. దక్షిణాఫ్రికా తో జరుగబోయే మూడో టెస్టు ఇందుకు వేదిక కానున్నది.
జనవరి 11న కేప్ టౌన్ లో మూడో టెస్టు జరుగనుండగా.. కోహ్లీకి ఇది వందో టెస్టు. అంతేగాక అదే రోజు వామిక ఫస్ట్ బర్త్ డే కూడా ఉంది. ఈ నేపథ్యంలో కోహ్లీ-అనుష్కలకు ఆ రోజు వారి జీవితాల్లో మరిచిపోలేని రోజుగా మారనున్నది.
దక్షిణాఫ్రికా సిరీస్ లో భారత్ మూడు టెస్టులు, మూడు వన్డేలు ఆడనున్న విషయం తెలిసిందే. షెడ్యూల్ ఇలా ఉంది. డిసెంబర్ 26-30 మధ్య తొలి టెస్టు - సెంచూరియన్ లో జరుగనుండగా.. జనవరి 03-07 మధ్య రెండో టెస్టు - జోహన్నస్బర్గ్ లో నిర్వహించనున్నారు. ఇక సిరీస్ లో చివరిదైన మూడో టెస్టు జనవరి 11-15 మధ్య కేప్ టౌన్ లో జరుగనుంది.
వన్డే సిరీస్ లో భాగంగా.. జనవరి 19: తొలి వన్డే - పార్ల్, జనవరి 21: రెండో వన్డే - పార్ల్, జనవరి 23: మూడో వన్డే - కేప్ టౌన్ లో జరుగుతుంది. నాలుగు వేదికల్లో ఈ సిరీస్ నిర్వహించనున్నారు.