ఆరోన్ ఫించ్, దినేశ్ కార్తీక్, రోహిత్ శర్మ... ఆఖరిసారి టీ20 వరల్డ్ కప్ ఆడబోతున్న ప్లేయర్లు వీరే...

ఆరోన్ ఫించ్: 35  ఏళ్ల ఆస్ట్రేలియా వైట్ బాల్ కెప్టెన్ ఆరోన్ ఫించ్, టీ20 వరల్డ్ కప్ 2022 టోర్నీకి ముందే వన్డే ఫార్మాట్‌కి రిటైర్మెంట్ ప్రకటించాడు. కొద్దికాలంగా సరైన ఫామ్‌లో లేక పరుగులు చేయడానికి ఆపసోపాలు పడుతున్న ఆరోన్ ఫించ్, టీ20 వరల్డ్ కప్ ముగిసిన తర్వాత  అంతర్జాతీయ క్రికెట్‌ నుంచి వీడ్కోలు తీసుకుంటాడని టాక్ వినబడుతోంది.

మార్టిన్ గుప్టిల్:న్యూజిలాండ్ క్రికెటర్ మార్టిన్ గుప్టిల్, తన కెరీర్‌లో ఆరో టీ20 వరల్డ్ కప్‌లో ఆడబోతున్నాడు. 36 ఏళ్ల మార్టిన్ గుప్టిల్, టీ20 వరల్డ్ కప్ 2024 టోర్నీకి అందుబాటులో ఉండడం అనుమానమే. ఇప్పటికే సరైన ఫామ్‌లో లేక తుది జట్టులో చోటు కోసం కష్టపడుతున్న గుప్టిల్, తన కెరీర్‌లో 121 టీ20 మ్యాచులు ఆడి 3497 పరుగులు చేశాడు...

దినేశ్ కార్తీక్: ఐపీఎల్ 2022 సీజన్ పర్ఫామెన్స్ కారణంగా 37 ఏళ్ల వయసులో టీమిండియాలో చోటు దక్కించుకోగలిగాడు సీనియర్ వికెట్ కీపర్ దినేశ్ కార్తీక్. టీమిండియా ఆడిన మొట్టమొదటి టీ20 మ్యాచ్‌లో సభ్యుడిగా ఉన్న దినేశ్ కార్తీక్, 2024 టీ20 వరల్డ్ కప్‌ వరకూ ఆడడం అనుమానమే... ఆడినా అతన్ని అప్పటిదాకా కొనసాగిస్తే అది ఆరవై ఆరో వింతే అవుతుంది...

మహ్మద్ నబీ: ఆఫ్ఘాన్ కెప్టెన్ మహ్మద్ నబీ వయసు 38 ఏళ్లు. ఇప్పటిదాకా 101 టీ20 మ్యాచులు ఆడిన మహ్మద్ నబీకి ఇదే ఆఖరి టీ20 వరల్డ్ కప్ అయ్యే అవకాశాలు చాలా ఎక్కువగానే ఉన్నాయి.. 

మొయిన్ ఆలీ: ఇంగ్లాండ్ ఆల్‌రౌండర్ మొయిన్ ఆలీ వయసు 35 ఏళ్లకు పైనే. టీ20 వరల్డ్ కప్ 2022 టోర్నీ ఆడుతున్న ఇంగ్లాండ్ జట్టులో అతి పెద్ద వయస్కుడు మొయిన్ ఆలీనే. 61 టీ20 మ్యాచులు ఆడిన మొయిన్ ఆలీ మరో రెండేళ్లు నిలకడైన ప్రదర్శన చూపించాలంటే అది జరిగే పని కాకపోవచ్చు...

డేవిడ్ వార్నర్:ఆస్ట్రేలియా ఓపెనర్ డేవిడ్ వార్నర్ కూడా 36 ఏళ్లకు దగ్గరపడ్డాడు. లేటుగా అంతర్జాతీయ క్రికెట్‌లోకి వచ్చిన డేవిడ్ వార్నర్, త్వరలో ఆస్ట్రేలియా వైట్ బాల్ కెప్టెన్సీ తీసుకుంటాడని టాక్ వినబడుతోంది. అయితే వార్నర్ భాయ్ మరో రెండేళ్లు ఆడతాడా? ఆడగలడా? అనేది అనుమానించాల్సిన విషయమే... 

షకీబ్ అల్ హసన్: 35 ఏళ్ల వయసులో బంగ్లాదేశ్ జట్టుకి కెప్టెన్‌గా టీ20 వరల్డ్ కప్ 2022 టోర్నీ ఆడబోతున్నాడు షకీబ్ అల్ హసన్. మొట్టమొదటి టీ20 వరల్డ్ కప్ నుంచి కొనసాగుతూ వస్తున్న షకీబ్, మరో రెండేళ్ల పాటు అంతర్జాతీయ క్రికెట్‌లో కొనసాగడం కొంచెం కష్టమే...

రోహిత్ శర్మ:టీమిండియా కెప్టెన్ రోహిత్ శర్మ వయసు 35 ఏళ్లు. ఇప్పటికే ఫిట్‌నెస్, గాయాలు, బిజీ షెడ్యూల్ కారణంగా క్రికెట్‌కి బ్రేక్ తీసుకుంటున్న రోహిత్, టీ20 వరల్డ్ కప్ 2024 వరకూ ఆడే అవకాశాలు కనిపించడం లేదు. కెప్టెన్‌గా మొట్టమొదటిసారి టీ20 వరల్డ్ కప్ ఆడుతున్న హిట్ మ్యాన్, టైటిల్ గెలిస్తే ఆ విజయంతో టీ20 కెరీర్‌కి ముగింపు పలకుతాడని కూడా ప్రచారం జరుగుతోంది...