SRHvsRCB: సన్రైజర్స్ హైదరాబాద్కి రెండో ఓటమి... ఆర్సీబీ ఉత్కంఠ విజయం...
ఐపీఎల్ 2021 సీజన్లో ముంబై, కేకేఆర్ మధ్య లో స్కోరింగ్ ఉత్కంఠ గేమ్ను చూసిన అభిమానులకు మరో మ్యాచ్ అలాంటి మజాను అందించింది. ఒకనొక దశలో 96/1తో ఈజీగా లక్ష్యాన్ని చేధించేలా కనిపించిన సన్రైజర్స్ హైదరాబాద్, ఒకే ఓవర్లో 3 వికెట్లు కోల్పోయి కష్టాల్లో పడింది.. 150 పరుగుల చేధనలో 143 పరుగులకే పరిమితమై 6 పరుగుల తేడాతో ఓడింది..
150 పరుగుల టార్గెట్తో బరిలో దిగిన సన్రైజర్స్ హైదరాబాద్కి శుభారంభం దక్కలేదు. 9 బంతులు ఆడి కేవలం 1 పరుగు చేసిన వృద్ధిమాన్ సాహా, సిరాజ్ బౌలింగ్లో మ్యాక్స్వెల్కి క్యాచ్ ఇచ్చి అవుట్ అయ్యాడు...
13 పరుగులకే తొలి వికెట్ కోల్పోయిన సన్రైజర్స్ను డేవిడ్ వార్నర్, మనీశ్ పాండే కలిసి ఆదుకునే ప్రయత్నం చేశారు. ఈ ఇద్దరూ కలిసి రెండో వికెట్కి 83 పరుగుల భాగస్వామ్యం నెలకొల్పారు...
37 బంతుల్లో ఏడు ఫోర్లు, ఓ సిక్సర్తో 54 పరుగులు చేసిన డేవిడ్ వార్నర్, ఐపీఎల్లో 53వ హాఫ్ సెంచరీ పూర్తిచేసుకున్నాడు. జెమ్మీసన్ బౌలింగ్లో డాన్ క్రిస్టియన్కి క్యాచ్ ఇచ్చి అవుట్ అయ్యాడు వార్నర్...
13 బంతుల్లో ఓ ఫోర్తో 12 పరుగులు చేసిన జానీ బెయిర్ స్టో... భారీ షాట్కి ప్రయత్నించి అవుట్ అయ్యాడు. ఆ తర్వాతి బంతికే మనీశ్ పాండే కూడా భారీ షాట్కి ప్రయత్నించి అవుట్ అయ్యాడు.
అదే ఓవర్లో అబ్దుల్ సమద్ను డకౌట్ చేసిన షాబజ్ అహ్మద్... ఒకే ఓవర్లో మూడు కీలక వికెట్లు తీసి మ్యాచ్ను ఒక్కసారిగా మలుపు తిప్పేశాడు...
ఆ తర్వాతి ఓవర్లో విజయ్ శంకర్ను హర్షల్ పటేల్ అవుట్ చేయగా, జాసన్ హోల్డర్ను మహ్మద్ సిరాజ్ పెవిలియన్ చేర్చాడు...
19వ ఓవర్ మొదటి బంతికే సిక్సర్ బాదిన రషీద్ ఖాన్... ఆఖరి ఓవర్ రెండో బంతికి బౌండరీ బాదినా... రెండు బంతుల్లో 8 పరుగులు కావాల్సిన దశలో రనౌట్ అయ్యాడు.
ఆ తర్వాతి బంతికే భారీ షాట్కి ప్రయత్నించిన షాబజ్ నదీమ్, షాబాజ్ అహ్మద్కి క్యాచ్ ఇచ్చి అవుట్ అయ్యాడు. దాంతో ఆఖరి బంతికి సింగిల్ తీసినా... 6 పరుగుల తేడాతో ఆర్సీబీకి విజయం దక్కింది...
రాయల్ ఛాలెంజర్స్ బౌలర్లలో షాబజ్ అహ్మద్ 2 ఓవర్లలో 7 పరుగులిచ్చి మూడు వికెట్లు తీయగా సిరాజ్, హర్షల్ పటేల్ రెండేసి వికెట్లు తీశారు.