Glenn Philips: సూపర్‌మ్యాన్‌లా ఒంటిచేత్తో క‌ళ్లు చెదిరే క్యాచ్ ప‌ట్టిన గ్లెన్ ఫిలిప్స్

Pakistan vs New Zealand: కరాచీలో జరిగిన ఛాంపియన్స్ ట్రోఫీ 2025 ఓపెనర్ మ్యాచ్‌లో గ్లెన్ ఫిలిప్స్ సూపర్‌మ్యాన్‌లా మారి అద్భుతమైన క్యాచ్ పట్టి మహమ్మద్ రిజ్వాన్‌ను పెవిలియన్ కు పంపాడు. 

Pakistan vs New Zealand: గ్లెన్ ఫిలిప్స్ మరోసారి తాను ప్రపంచంలోని అత్యుత్తమ ఫీల్డర్లలో ఒకరిగా ఎందుకు పరిగణించబడుతున్నాడో అందరికీ ఒక ఉదాహరణ చూపించాడు. ఈ న్యూజిలాండ్ స్టార్ క్రికెటర్ ఐసీసీ ఛాంపియన్స్ ట్రోఫీ 2025 మొదటి మ్యాచ్‌లో పాకిస్తాన్ కెప్టెన్ మహ్మద్ రిజ్వాన్ ఆడిన షాట్ ను అద్భుతంగా ఒంటి చేత్తో క్యాచ్‌ను పట్టుకుని అందరినీ ఆశ్చర్యపరిచాడు. 

ప్రత్యర్థి జట్టుపై బ్యాట్ లేదా బంతితోనే కాకుండా తన ఫీల్డింగ్‌తో కూడా అద్భుతం చేయ‌గ‌ల‌న‌ని మ‌రోసారి చూపించాడు. అతను ఎంత గొప్ప క్యాచ్ పట్టాడంటే మీరు నిజంగా న‌మ్మ‌లేరు.. క్యాచ్ ప‌ట్టిన తీరు చూసి అత‌న్ని ప్రశంసించ‌కుండా ఉండ‌లేరు. ఆ వీడియో సోషల్ మీడియాలో వైరల్ అవుతోంది.

Image Credit: Twitter

గ్లెన్ ఫిలిప్స్ సూపర్‌మ్యాన్ క్యాచ్ 

ఇన్నింగ్స్ 10వ ఓవర్ చివరి బంతికి పాకిస్తాన్ కెప్టెన్ మహ్మద్ రిజ్వాన్ ఒక బిగ్ కట్ షాట్ ఆడాడు. బంతి బ్యాట్‌తో ఎంత బాగా తాకిందంటే బంతి బౌండ‌రీ లైన్ వైపు ప‌రుగులు పెట్టింది. కానీ గ్లెన్ ఫిలిప్స్ బంతిని పట్టుకోవడానికి తన ఎడమ వైపునకు గాల్లోకి ఎగిరి ఒంటిచేత్తో క్యాచ్ ప‌ట్టాడు. అతని టైమింగ్ చాలా ఖచ్చితంగా ఉండటం వల్ల బంతి నేరుగా అతని చేతుల్లోకి వచ్చింది. ఈ అద్భుతమైన క్యాచ్ చూసి, మైదానంలో ఉన్న ప్రతి వ్యక్తి తన కళ్ళను నమ్మలేకపోయాడు. ఫిలిప్స్ క్యాచ్ తీసుకున్నాడని బ్యాట్స్‌మన్‌కు కూడా తెలియదు. ఈ కీవీస్ ప్లేయ‌ర్ ఇంత నమ్మశక్యం కాని క్యాచ్ ప‌ట్టి అంద‌రినీ ఆశ్చ‌ర్య‌ప‌రిచాడు.

గ్లెన్ ఫిలిప్స్ క్యాచ్ కోసం ఇక్కడ క్లిక్ చేయండి

సురేష్ రైనా-కైఫ్ ప్రశంసలు 

భారత క్రికెట్ దిగ్గజాలైన సురేష్ రైనా, మహ్మద్ కైఫ్ లు ఫిలిప్స్ అద్భుతమైన క్యాచ్ ను ప్రశంసిస్తూ అతన్ని సూపర్ మ్యాన్ గా అభివర్ణించారు. రైనా మాట్లాడుతూ 'గ్లెన్ ఫిలిప్స్ తాను సూపర్‌మ్యాన్ అని ప్రపంచం ముందు అంగీకరించాలి.' అతను అర్ధ సెంచరీ సాధించాడు. తరువాత రిజ్వాన్ ఇచ్చిన అద్భుతమైన క్యాచ్‌ను అందుకున్నాడు. తాను ఆడే రోజుల్లో ప్రపంచ స్థాయి ఫీల్డర్‌గా ఉన్న మహ్మద్ కైఫ్ కూడా న్యూజిలాండ్ ఆల్ రౌండర్‌ను ప్రశంసించాడు. 'అసాధ్యమైన క్యాచ్‌ను సాధ్యం చేశాడు.' అది నమ్మశక్యం కానిది. ఫిలిప్స్ ఒక సూప‌ర్ ప్యాకేజీ అని కామెంట్స్ చేశాడు.

Glenn Phillips

బ్యాట్‌తో కూడా పవర్ చూపించిన గ్లెన్ ఫిలిప్స్ 

ఈ అద్భుతమైన క్యాచ్ పట్టక ముందు, ఫిలిప్స్ బ్యాట్‌తో కూడా తన ప‌వ‌ర్ చూపించాడు. అతను 39 బంతుల్లో 61 పరుగుల ధ‌నాధ‌న్ ఇన్నింగ్స్ ఆడాడు. త‌న ఇన్నింగ్స్ లో 3 ఫోర్లు, 4  సిక్సర్లు బాదాడు. గ్లెన్ ఫిలిప్స్ ధ‌నాధ‌న్ ఇన్నింగ్స్ తో పాటు విల్ యంగ్ (107), టామ్ లాథమ్ (118*) సెంచరీలు చేయ‌డంతో న్యూజిలాండ్ స్కోరు 5 వికెట్ల నష్టానికి 320 పరుగులకు చేరింది.

భారీ టార్గెట్ తో బ‌రిలోకి దిగిన పాకిస్తాన్ జ‌ట్టు కేవ‌లం 260 ప‌రుగుల‌కే ఆలౌట్ అయింది. బాబార్ ఆజం, ఫ‌ఖ‌ర్ జ‌మాన్ లు చాలా నెమ్మ‌దిగా ఆడ‌టం, ఇత‌ర ప్లేయ‌ర్లు రాణించ‌క‌పోవ‌డంతో పాకిస్తాన్ 60 ప‌రుగుల తేడాతో ఓడిపోయింది. కానీ, సల్మాన్ ఆఘా 42 పరుగులు, ఖుష్దిల్ షా 69 పరుగుల ధనాధన్ బ్యాటింగ్ తో మంచి ఇన్నింగ్స్ లు ఆడారు.