రెండేళ్ల క్రితమే రిటైర్మెంట్ తీసుకుందామనుకున్నా, కానీ అప్పుడు... న్యూజిలాండ్ ప్లేయర్ రాస్ టేలర్...
ప్రస్తుతం క్రికెట్లో కొనసాగుతున్న సీనియర్ మోస్ట్ ప్లేయర్లలో రాస్ టేలర్ ఒకడు. 37 ఏళ్ల రాస్ టేలర్, ఇప్పటికీ ధారాళంగా పరుగులు సాధిస్తే, న్యూజిలాండ్ జట్టు తరుపున రెగ్యూలర్గా మ్యాచులు ఆడుతున్నాడు. టీమిండియాతో జరిగే వరల్డ్ టెస్ట్ ఛాంపియన్షిప్ ఫైనల్కి ముందు ఇంగ్లాండ్ సిరీస్లో పాల్గొంటున్న రాస్ టేలర్, కొన్ని ఇంట్రెస్టింగ్ కామెంట్లు చేశాడు...
‘నా దృష్టిలో వయసు కేవలం ఓ నెంబర్ మాత్రమే. నేను ఆటను ఎంజాయ్ చేసినంత కాలం, క్రికెట్లో కొనసాగాలని అనుకుంటున్నా. ప్రస్తుతం జట్టుకి అవసరమైన పరుగులు చేయగలుగుతున్నా, నేను పర్ఫామ్ చేయలేనప్పుడు తప్పుకోవడం గురించి ఆలోచిస్తా...
ప్రతీ ప్లేయర్ 30 ఏళ్లు దాటిన తర్వాత రిటైర్మెంట్ గురించి ఆలోచిస్తాడు. అయితే నేను 35 ఏళ్ల వరకూ క్రికెట్లో కొనసాగాలని అనుకున్నా. 35 దాటిన తర్వాత 2019 వన్డే వరల్డ్కప్ వరకూ ఆడాలని ఫిక్స్ అయ్యాను.
అయితే వన్డే వరల్డ్కప్ తర్వాత నాకు అనిపించింది, కేవలం ఓ టోర్నీ కోసం క్రికెట్లో కొనసాగాలని అనుకోవడం కరెక్ట్ కాదు. అందుకే ఇప్పుడు రిటైర్మెంట్ గురించి ఇంకా ఎలాంటి ఆలోచన చేయలేదు.
నాకు ఆడాలనిపించినంతకాలం, నేను పరుగులు చేసినంత కాలం ఆడాలని అనుకుంటున్నా... సుదీర్ఘకాలంగా క్రికెట్ ఆడుతున్నావ్, ఇక రిటైర్మెంట్ ఇవ్వొచ్చు కదా అని చాలామంది నాతో అంటూ ఉంటారు... అవును నిజమే.
కానీ నేను ఎప్పుడైతే వికెట్ల మధ్య పరుగులు చేయడానికి ఇబ్బందిగా ఫీల్ అవుతానో... నా దృష్టిలో నా రిటైర్మెంట్కి అదే సరైన సమయం...’ అంటున్నాడు రాస్ టేలర్.
రాస్ టేలర్ మాదిరిగానే న్యూజిలాండ్ ప్రస్తుత కెప్టెన్ కేన్ విలియంసన్ కూడా సుదీర్ఘకాలం క్రికెట్ కొనసాగించాలని భావిస్తున్నాడట.
‘న్యూజిలాండ్ క్రికెటర్లు చాలామంది 30ల్లోకి రాగానే రిటైర్మెంట్ ప్రకటించేవాళ్లు. కానీ నేను ఆ సంప్రదాయాన్ని బ్రేక్ చేశాను. నాలాగే కేన్ విలియంసన్ కూడా సుదీర్ఘ కాలం క్రికెట్ ఆడాలని అనుకుంటున్నాడు. ఇది కివీస్ క్రికెట్కి మేలు చేస్తుంది’ అంటూ కామెంట్ చేశాడు రాస్ టేలర్.
37 ఏళ్ల రాస్ టేలర్, 2006లో క్రికెట్ ఎంట్రీ ఇచ్చాడు. 232 వన్డేలు ఆడిన టేలర్, 102 టీ20 మ్యాచులు ఆడి న్యూజిలాండ్ తరుపున అత్యధిక వన్డేలు, అత్యధిక టీ20 మ్యాచులు ఆడిన క్రికెటర్గా రికార్డు క్రియేట్ చేశాడు.
105 టెస్టుల్లో 19 సెంచరీలతో 7379 పరుగులు చేసిన రాస్ టేలర్, పుట్టినరోజున వన్డే సెంచరీ చేసిన అతికొద్దిమంది క్రికెటర్లలో ఒకటిగా రికార్డు క్రియేట్ చేశాడు. 81 బంతుల్లో టెస్టు సెంచరీ చేసి, టెస్టుల్లో అత్యంత వేగంగా సెంచరీ బాదిన న్యూజిలాండ్ ప్లేయర్గా నిలిచాడు.