వరల్డ్ టెస్టు ఛాంపియన్షిప్ ఫైనల్ ఆడే న్యూజిలాండ్ జట్టు ఇదే... కేన్ విలియంసన్ రీఎంట్రీ...
ఐసీసీ వరల్డ్ టెస్టు ఛాంపియన్షిప్ ఫైనల్ మ్యాచ్ ఆడే జట్టును న్యూజిలాండ్ ప్రకటించింది. 15 మంది సభ్యులతో కూడిన జట్టును ప్రకటించిన ఈ టీమ్లోకి గాయం కారణంగా ఇంగ్లాండ్తో జరిగిన రెండో టెస్టు నుంచి దూరమైన సభ్యులకు తిరిగి చోటు కల్పించింది కివీస్ క్రికెట్ టీమ్.
జూన్ 18 నుంచి ప్రారంభమయ్యే ఐసీసీ మొట్టమొదటి వరల్డ్ టెస్టు ఛాంపియన్షిప్ ఫైనల్ మ్యాచ్లో న్యూజిలాండ్ హాట్ ఫెవరెట్గా బరిలో దిగుతోంది. కొన్నాళ్లుగా అద్భుత ఆటతీరుతో అదరగొడుతున్న న్యూజిలాండ్, ఇంగ్లాండ్లో ఇంగ్లాండ్ని చిత్తు చేసి టెస్టు సిరీస్ గెలిచింది.
తాజాగా ఫైనల్ మ్యాచ్ ఆడేందుకు 15 మందితో కూడిన జట్టును ప్రకటించింది న్యూజిలాండ్ జట్టు. ఇందులో ఇంగ్లాండ్పై జరిగిన రెండో టెస్టులో అదరగొట్టిన భారత సంతతి ప్లేయర్ ఆజజ్ పటేల్కి ఫైనల్ మ్యాచ్ ఆడే జట్టులో చోటు దక్కింది.
తొలి టెస్టులోనే డబుల్ సెంచరీతో ఆకట్టుకున్న ఓపెనర్ డివాన్ కాన్వేకి కూడా ఫైనల్ జట్టులో చోటు కల్పించిన న్యూజిలాండ్ టీమ్, రచిన్ రవీంద్ర, మిచెల్ సాంట్నర్, జాకోబ్ డఫీ, డార్ల్ మిచెల్, డాగ్ బ్రాస్వెల్ వంటి ఐదుగురు ప్లేయర్లను జట్టు నుంచి తప్పించింది.
‘రెండో టెస్టులో నాలుగు వికెట్లు తీసిన అజజ్ పటేల్, స్పెషలిస్టు స్పిన్నర్గా ఆకట్టుకున్నాడు. సౌంతిప్టన్లో జరిగే ఫైనల్లో అతను గేమ్ ఛేంజర్ అవుతాడని భావిస్తున్నాం...’ అంటూ న్యూజిలాండ్ హెడ్ కోచ్ గ్యారీ స్టెడ్ కామెంట్ చేశాడు.
అలాగే మొదటి టెస్టులో గాయపడి, రెండో టెస్టులో బరిలో దిగని న్యూజిలాండ్ రెగ్యూలర్ కెప్టెన్ కేన్ విలియంసన్, వికెట్ కీపర్ బ్యాట్స్మెన్ బీజే వాట్లింగ్ కూడా ఫిట్నెస్ సాధించారని, వాళ్లు కచ్ఛితంగా ఫైనల్లో ఆడతారని చెప్పాడు...
రెండో టెస్టులో ఇంగ్లాండ్ పతనాన్ని శాసించిన మాట్ హెన్రీతో కేల్ జెమ్మీసన్, టిమ్ సౌథీ, ట్రెంట్ బౌల్ట్, నీల్ వాగ్నర్ వంటి టాప్ క్లాస్ ఫాస్ట్ బౌలర్లు... ఐసీసీ వరల్డ్ టెస్టు ఛాంపియన్షిప్ ఫైనల్ మ్యాచ్లో బరిలో దిగబోతున్నారు.
వరల్డ్ టెస్టు ఛాంపియన్షిప్ ఫైనల్ ఆడే న్యూజిలాండ్ జట్టు ఇదే: కేన్ విలియంసన్ (కెప్టెన్), టామ్ బ్లండెల్ (వికెట్ కీపర్), బీజే వాట్లింగ్ (వికెట్ కీపర్), ట్రెంట్ బౌల్ట్, డివాన్ కాన్వే, కోలిన్ డి గ్రాండ్హోమ్, మాట్ హెన్రీ, కేల్ జెమ్మీసన్, టామ్ లాథమ్, హెన్రీ నికోలస్, ఆజజ్ పటేల్, టిమ్ సౌథీ, రాస్ టేలర్, నీల్ వాగ్నర్, విల్ యంగ్