MI vs SRH : మొదట్లో శర్మ, చివర్లో వర్మ ... ముంబైకి హైదరబాదీ శావర్మ రుచిచూపించారుగా

సన్ రైజర్స్ హైదరాబాద్ ఆటగాళ్లు అభిషేక్ శర్మ, అనికేత్ వర్మ లు ముంబై ఇండియన్స్ పై అదరగొట్టారు. వీరిద్దరి మెరుపు ఇన్నింగ్స్ వల్లే హైదరాబాద్ టీం గౌరవప్రదమైన 162 పరుగులు చేయగలిగింది. ఇలా శావర్మ స్పెషల్ ఇన్నింగ్స్ ఎలా సాగిందో ఇక్కడ చూద్దాం. 

Abhishek Sharma

Indian Premier League 2025 SRH vs MI : ఐపిఎల్ 2025 లో మరో ఉత్కంఠభరిత పోరు కొనసాగుతోంది... ముంబైలోని వాంఖడే స్టేడియం ఈ మ్యాచ్ కు వేదికయ్యింది. ముంబై ఇండియన్స్ తో సన్ రైజర్స్ హైదరాబాద్ తలపడుతోంది... మొదట బ్యాటింగ్ చేసిన ఎస్‌ఆర్‌హెచ్ నిర్ణీత ఓవర్లలో ఐదు వికెట్ల నష్టానికి 162 పరుగులు మాత్రమే చేసింది.  

అయితే హైదరాబాద్ లో టాప్ క్లాస్ హిట్టర్లున్నా పెద్ద స్కోరు సాధించలేకపోయింది. కానీ మొదట్లో ఓపెనర్ అభిషేక్ శర్మ, చివర్లో అనికేత్ వర్మ బ్యాటింగ్ అభిమానులను అలరించింది. ఈ ఇద్దరూ మెరుపు ఇన్నింగ్స్ ఆడారు... క్రీజులో ఉన్నది కొద్దిసేపే అయినా మైదానాన్ని షేక్ చేసారు. ఇలా శర్మ, వర్మ కలిసి ముంబై బౌలర్లకి హైదరబాదీ శావర్మ రుచి చూపించారు. 

ఓపెనర్ అభిషేక్ శర్మ కేవలం 28 బంతుల్లోనే 40 పరుగులు చేసాడు. ఇందులో 7 బౌండరీలు ఉన్నాయి. ఇక అనికేత్ వర్మ చివర్లో కీలకమైన పరుగులు రాబట్టాడు... అతడు కేవలం 8 బంతులే ఆడి 18 పరుగులు చేసాడు. రెండు సిక్సర్లు, 225 స్ట్రైక్ రేట్ తో అతడి బ్యాటింగ్ సాగింది. అతడు ధనాధన్ హిట్టింగ్ వల్లే సన్ రైజర్స్ కనీసం 162 పరుగులు చేయగలిగింది. 

Aniket Verma

సన్ రైజర్స్ హైదరాబాద్ ఇన్నింగ్ సాగిందిలా.. 

మొత్తంగా సన్ రైజర్స్ హైదరాబాద్ బ్యాటింగ్ విషయానికి వస్తే ఓపెనర్లు అభిషేక్ శర్మ, హెడ్ మంచి ప్రారంభమే అందించారు. హెడ్ తన స్టైల్ కు భిన్నంగా మెల్లగా ఆడాడు... అతడు 29 బంతుల్లో 28 పరుగులు మాత్రమే చేసాడు. ఇలా ఎక్కువ బంతుల్లో తక్కువ పరుగులు చేయడం హెడ్ కెరీర్ లోనే ఇదే మొదటిసారి కావచ్చు. 

ఇక మొదటిమ్యాచ్ లో సెంచరీతో అదరగొట్టిన ఇషాన్ కిషన్ తర్వాత తేలిపోతున్నాడు. గత నాలుగైదు మ్యాచుల్లో అతడు సింగిల్ డిజిట్ కు పరిమితం అవుతున్నాడు. ఈసారి కూడా కేవలం 2 పరుగులకే పెవిలియన్ కు చేరాడు. మధ్యలో తెలుగు కుర్రాడు నితీష్ రెడ్డితో కలిసి క్లాసేన్ ఇన్నింగ్స్ ను నిర్మించే ప్రయత్నం చేసాడు. నితీష్ 21 బంతుల్లో 19 పరుగులు, క్లాసేన్ 28 బంతుల్లో 37 పరుగులు చేసారు.  చివర్లో కమిన్స్ కేవలం 4 బంతులాడి 8 పరుగులు చేసాడు. 

59 పరుగుల వద్ద మొదటి వికెట్ కోల్పోయిన సన్ రైజర్స్ జట్టు క్రమంగా వికెట్లు కోల్పోయింది. 68 పరుగులకు రెండోది, 82 పరుగులకు మూడోది, 113 పరుగులకు నాలుగో వికెట్ కోల్పోయారు. 136 పరుగుల వద్ద ఐదో వికెట్ కోల్పోగా అనికేత్ వర్మ, కమిన్స్ చివర్లో  మెరుపు బ్యాటింగ్ చేయడంతో 163 పరుగుల విజయలక్ష్యాన్ని ముంబై ముందు ఉంచగలిగారు. 

Indian Premier League 2025

అదరగొట్టిన ముంబై బౌలర్లు : 

భారీ హిట్టర్లు కలిగిన సన్ రైజర్స్ జట్టును తక్కువ పరుగులకే నిలువరించడంలో ముంబై సక్సెస్ అయ్యింది. ముంబై బౌలర్లలో విల్ జాక్స్ మ్యాజిక్ చేసాడు... 3 ఓవర్లేసిన ఇతడు కేవలం 14 పరుగులు మాత్రమే ఇచ్చి 2 వికెట్లు పడగొట్టాడు.  కీలకమైన హెడ్, ఇషాన్ కిషన్ వికెట్లను ఇతడే పడగొట్టాడు. 

అయితే దీపక్ చాహర్, హార్దిక్ పాండ్యా మాత్రం చాలా పరుగులు సమర్పించుకున్నారు. చాహర్ 4 ఓవర్లలో 47 పరుగులు ఇచ్చాడు, పాండ్యా కూడా 4 ఓవర్లలో 42 పరుగులు సమర్పించుకుని కీలకమైన అభిషేక్ శర్మ వికెట్ పడగొట్టాడు. ఇక బోల్ట్ 4 ఓవర్లలో 29 పరుగులు 1 వికెట్, బుమ్రా 4 ఓవర్లలో 21 పరుగులు 1 వికెట్ పడగొట్టారు. సాట్నర్ కేవలం ఒకే ఓవర్ వేసి 8 పరుగులు సమర్పించుకున్నాడు.