కింగ్స్ ఎలెవన్ పర్సులో రూ. 53.20 కోట్లు... ఈసారి వేలంలో ఎవరి దగ్గర ఎంత మిగిలి ఉందంటే...
కోట్లు కుమ్మరించి కొనుగోలు చేసిన ప్లేయర్లలో చాలామందిని 2021 ఐపీఎల్ మినీ వేలానికి విడుదల చేసేసింది కింగ్స్ ఎలెవన్ పంజాబ్. మిగిలిన జట్లతో పోలిస్తే... ఈ రిలీజ్ కారణంగా కింగ్స్ ఎలెవన్ పంజాబ్ పర్సులో భారీగా డబ్బు వచ్చి చేరింది. 2021 ఐపీఎల్ వేలానికి ముందు ఏయే ఫ్రాంఛైజీ పర్సులో ఎంతెంత డబ్బు ఉందో తెలుసా... రూ.53.20 కోట్ల రూపాయలతో పంజాబ్ పర్సు భారీగా బరువు ఉండగా...2020 రన్నరప్ ఢిల్లీ క్యాపిటల్స్ ఖాతాలో కేవలం 9 కోట్లు మాత్రమే ఉన్నాయి.
రూ.10.75 కోట్లు కుమ్మరించి కొనుగోలు చేసిన గ్లెన్ మ్యాక్స్వెల్, గత ఏడాది 13 మ్యాచుల్లో ఒక్కటంటే ఒక్క సిక్స్ కూడా కొట్టలేకపోయాడు. ఐపీఎల్లో మ్యాక్స్వెల్ ఫెయిల్యూర్ కూడా ఎవ్వరినీ పెద్దగా బాధించలేదు కానీ ఆ తర్వాత జరిగిన వన్డే, టీ20 సిరీస్లో అతను సిక్సర్లతో విరుచుకుపడడం అందర్నీ ఆశ్చర్యానికి గురి చేసింది.
ఎంతో ఇష్టపడి కొన్న మ్యాక్స్వెల్తో పాటు రూ.8 కోట్ల 50 లక్షలు పెట్టి కొనుగోలు చేసిన విండీస్ స్టార్ షెల్డన్ కాట్రెల్ను కూడా వేలానికి విడుదల చేసింది పంజాబ్.
వీరితో పాటు కృష్ణప్ప గౌతమ్ (రూ.6.20 కోట్లు), కరణ్ నాయర్ (రూ.5.60 కోట్లు), ముజీబ్ ఉర్ రెహ్మన్ (రూ. 4 కోట్లు), హర్డస్ విల్జీన్ (రూ.75 లక్షలు), జేమ్స్ నీశమ్ (రూ.50 లక్షలు), జగదీశన్ సుచిత్ (రూ.20 లక్షలు), తేజిందర్ దిల్లాన్ (రూ.20 లక్షలు)లను వేలానికి విడుదల చేసిన పంజాబ్ పర్సులో రూ.53.20 కోట్లు ఉన్నాయి.
రాయల్ ఛాలెంజర్స్ బెంగళూరు ఖాతాలో రూ.35.70 కోట్లు ఉన్నాయి. రూ.10 కోట్లు పెట్టి కొనుగోలు చేసిన క్రిస్ మోరిస్తో పాటు, రూ.5 కోట్లు పెట్టి కొన్న శివమ్ దూబే, రూ.4.40 కోట్లు పెట్టి కొన్న ఆరోన్ ఫించ్, ఉమేశ్ యాదవ్ (రూ.4.20 కోట్లు), కేన్ రిచర్డ్సన్ (రూ.4 కోట్లు), డేల్ స్టెయిన్ (రూ.2 కోట్లు)లను వేలానికి విడుదల చేసింది ఆర్సీబీ.
వీరితో పాటు మొయిన్ ఆలీ (రూ.1.70 కోట్లు), ఇసురు ఉదాన (రూ.50 లక్షలు), పవన్ నేగి (రూ. కోటి), గురకీరట్ మాన్ (రూ.50 లక్షలు), పార్థివ్ పటేల్ (రూ.కోటి 70 లక్షలు)లను రిలీజ్ చేస్తున్నట్టు ప్రకటించింది రాయల్ ఛాలెంజర్స్ బెంగళూరు.
రాజస్థాన్ రాయల్స్ ఖాతాలో రూ. 34.85 కోట్లు ఉన్నాయి. స్టీవ్ స్మిత్ (రూ.12 కోట్ల 50 లక్షలు)తో పాటు ఒషానో థామస్ (రూ.50 లక్షలు), టామ్ కుర్రాన్ (రూ. కోటి), వరుణ్ అరోన్ (రూ.2 కోట్ల 20 లక్షలు), అంకిత్ రాజ్పుత్ (రూ.3 కోట్లు), అనిరుథ్ జోషి, శశాంత్ సింగ్, ఆకాశ్ సింగ్ (తలా రూ.20 లక్షలు)లను విడుదల చేసింది ఆర్ఆర్.
చెన్నై సూపర్ కింగ్స్ ఖాతాలో రూ.22.90 కోట్లు ఉన్నాయి. కేదార్ జాదవ్ (రూ.7.80 కోట్లు), పియూష్ చావ్లా (రూ. 6.75 కోట్లు), షేన్ వాట్సన్ (రూ.4 కోట్లు), మురళీ విజయ్ (రూ.2 కోట్లు), హర్భజన్ సింగ్ (రూ. 2 కోట్లు), మోను కుమార్ (రూ.20 లక్షలు)లను విడుదల చేసింది సీఎస్కే.
ముంబై ఇండియన్స్ ఖాతాలో రూ.15.35 కోట్లు ఉన్నాయి. లసిత్ మలింగ (రూ.2 కోట్లు), మెక్లాగన్ (రూ.కోటి), జేమ్స్ ప్యాటిన్సన్ (రూ.కోటి), నాథన్ కౌంటర్ నీల్ (రూ.కోటి), రూథర్డ్ ఫర్డ్ (రూ.2 కోట్లు), బల్వంత్ రాయ్ (రూ.20 లక్షలు), దిగ్విజయ్ దేశ్ముఖ్ (రూ.20 లక్షలు) ప్లేయర్లను వేలానికి విడుదల చేసింది ముంబై.
కోల్కత్తా నైట్రైడర్స్ పర్సులో రూ.10.85 కోట్లు ఉన్నాయి. టామ్ బంటన్ (రూ. కోటి), క్రిస్ గ్రీన్ (రూ.20 లక్షలు), సిద్ధేశ్ లాడ్ (రూ.20 లక్షలు), సిద్ధార్థ్ (20 లక్షలు), హారీ గుర్నే (రూ.50 లక్షలు), నిఖిల్ నాయక్ (రూ.20 లక్షలు) ప్లేయర్లను మినీ వేలానికి విడుదల చేసింది కేకేఆర్.
సన్రైజర్స్ హైదరాబాద్ పర్సులో రూ.10.75 కోట్లు ఉన్నాయి. ఫాబియన్ ఆలెన్ (రూ.50 లక్షలు), సంజయ్ యాదవ్ (రూ.20 లక్షలు), బిల్లే స్టాన్లేక్ (రూ.50 లక్షలు), సందీప్ (రూ.20 లక్షలు), ఎర్రా పృథ్వీరాజ్ (రూ.20 లక్షలు)ప్లేయర్లను మినీ వేలానికి రిలీజ్ చేసింది ఎస్ఆర్హెచ్.
ఢిల్లీ క్యాపిటల్స్ పర్సులో రూ.9 కోట్లు ఉన్నాయి. ఆలెక్స్ క్యారీ (రూ.2.40 కోట్లు), జేసన్ రాయ్ (రూ.1.50 కోట్లు). మోహిత్ శర్మ (రూ.50 లక్షలు), తుషార్ దేశ్పాండే (రూ.20 లక్షలు), కీమో పాల్ (రూ.50 లక్షలు), సందీప్ లామిచానే (రూ.20 లక్షలు)లను 2021 మినీ వేలానికి రిలీజ్ చేసింది ఢిల్లీ.