IPL2021 RCB vs MI: హర్షల్ హ్యాట్రిక్, మ్యాక్స్వెల్ మ్యాజిక్... ముంబైపై ఆర్సీబీ ఘన విజయం...
ఐపీఎల్ 2021 ఫేజ్ 2లో వరుసగా రెండు మ్యాచుల్లో ఓడిన ఆర్సీబీ, ఎట్టకేలకు అవసరమైన విజయాన్ని అందుకుంది. ముంబై ఇండియన్స్పై 54 పరుగుల తేడాతో ఘన విజయాన్ని అందుకున్న ఆర్సీబీ, మూడో స్థానానికి ఎగబాకింది. డిఫెడింగ్ ఛాంపియన్ ముంబై ఇండియన్స్ మాత్రం, ఐపీఎల్ 2021 సీజన్ ఫేజ్ 2లో హ్యాట్రిక్ పరాజయాలను మూటకట్టుకుంది...
166 పరుగుల టార్గెట్తో బ్యాటింగ్ మొదలెట్టిన ముంబై ఇండియన్స్కి ఓపెనర్లు శుభారంభం అందించారు... 6 ఓవర్లలోనే 50+ పరుగులను దాటింది ముంబై ఇండియన్స్...
23 బంతుల్లో 4 ఫోర్లతో 24 పరుగులు చేసిన డి కాక్, యజ్వేంద్ర చాహాల్ బౌలింగ్లో అవుట్ కాగా 57 పరుగుల వద్ద తొలి వికెట్ కోల్పోయింది ముంబై ఇండియన్స్...
28 బంతుల్లో 5 ఫోర్లు, ఓ సిక్సర్తో 43 పరుగులు చేసిన రోహిత్ శర్మ, మ్యాక్స్వెల్ బౌలింగ్లో పడిక్కల్కి క్యాచ్ ఇచ్చి అవుట్ అయ్యాడు...
ఆ తర్వాత వరుస వికెట్లను కోల్పోయింది ముంబై ఇండియన్స్. ఇషాన్ కిషన్ 9 పరుగులు చేసి చాహాల్ బౌలింగ్లో, సూర్యకుమార్ యాదవ్ 8 పరుగులు చేసి సిరాజ్ బౌలింగ్లో పెవిలియన్ చేరారు.
ఆ తర్వాత కృనాల్ పాండ్యాను మ్యాక్స్వెల్ క్లీన్బౌల్డ్ చేయగా, హర్షల్ పటేల్ హ్యాట్రిక్ వికెట్లు తీసి ముంబై పతనాన్ని శాసించాడు...
3 పరుగులు చేసిన హార్దిక్ పాండ్యా, కోహ్లీ పట్టిన క్యాచ్కి పెవిలియన్కి చేరగా ఆ తర్వాతి బంతికి పోలార్డ్ను బౌల్డ్ చేశాడు హర్షల్ పటేల్... ఆ తర్వాతి బంతికి రాహుల్ చాహార్ను ఎల్బీడబ్ల్యూగా అవుట్ చేసి హ్యాట్రిక్ సాధించాడు...
పర్పుల్ క్యాప్ హోల్డర్, రాయల్ ఛాలెంజర్స్ బెంగళూరు బౌలర్ హర్షల్ పటేల్, ఐపీఎల్ 2021 ఫేజ్ 2లో మొట్టమొదటి హ్యాట్రిక్ నమోదుచేశాడు... 17వ ఓవర్లో బౌలింగ్కి వచ్చిన హర్షల్ పటేల్, వరుసగా హార్ధిక్ పాండ్యా, కిరన్ పోలార్డ్, రాహుల్ చాహార్ వికెట్లు తీసి హ్యాట్రిక్ నమోదుచేశాడు..
ఐపీఎల్ చరిత్రలో ఆర్సీబీ తరుపున 2010లో ప్రవీణ్ కుమార్, 2017లో శ్యామూల్ బాద్రే తర్వాత హ్యాట్రిక్ తీసిన బౌలర్గా మూడో బౌలర్గా రికార్డు క్రియేట్ చేశాడు హర్షల్ పటేల్..
ఫస్టాఫ్లో ముంబై ఇండియన్స్తో జరిగిన మ్యాచ్లో ఐదు వికెట్లు తీసిన హర్షల్ పటేల్, సెకండాఫ్లో హ్యాట్రిక్ తీసి అదరగొట్టాడు...
బుమ్రా కూడా చాహాల్ బౌలింగ్లో అవుట్ కాగా... ఆడమ్ మిల్నేను హర్షల్ పటేల్ బౌల్డ్ చేయడంతో 111 పరుగులకి ఆలౌట్ అయ్యింది ముంబై ఇండియన్స్...