SRH: రెండు వరుస పరాజయాలు.. సన్ రైజర్స్ కు మరో బిగ్ షాక్.. స్టార్ ఆల్ రౌండర్ దూరం
TATA IPL 2022: వరుసగా ఐదు విజయాలు సాధించి ఆ తర్వాత మళ్లీ పరాజయాల బాట పట్టిన సన్ రైజర్స్ హైదరాబాద్ కు మరో భారీ షాక్ తగిలింది. ఆ జట్టుకు చెందిన స్టార్ ఆల్ రౌండర్ మళ్లీ గాయపడ్డాడు.
మూలిగే నక్క మీద తాటి పండు పడటం అంటే ఇదేనేమో. ఇప్పటికే వరుసగా రెండు మ్యాచులు ఓడి ప్లేఆఫ్ అవకాశాలను సంక్లిష్టం చేసుకున్న సన్ రైజర్స్ హైదరాబాద్ కు ఇప్పుడు మరో షాక్ తగిలింది. ఇటీవలే గాయం నుంచి కోలుకున్న స్టార్ ఆల్ రౌండర్ వాషింగ్టన్ సుందర్.. మళ్లీ గాయపడ్డాడు.
చెన్నై సూపర్ కింగ్స్ తో జరిగిన మ్యాచ్ లో వాషింగ్టన్ సుందర్ కుడి చేతికి గాయమైంది. దీంతో ఈ మ్యాచ్ లో సుందర్ ఒక్క ఓవర్ కూడా బౌలింగ్ చేయలేదు.
ఐపీఎల్ లో తొలుత వరుసగా రెండు మ్యాచులు ఓడిన తర్వాత సుందర్ గాయపడ్డాడు. కుడి చేతి బొటనవేలికి గాయం కావడంతో తర్వాత జరిగిన మూడు మ్యాచులు అతడు ఆడలేదు.
గుజరాత్ టైటాన్స్ తో మ్యాచ్ లోనే తిరిగి జట్టుతో చేరిన సుందర్.. ఆ మ్యాచ్ లో కూడా సరిగా బౌలింగ్ చేయలేకపోయాడు. ఇక సీఎస్కేతో మ్యాచ్ లో ఇప్పటికే గాయమైన చోటే మళ్లీ గాయం కావడంతో అతడు అతడు ఒక్క ఓవర్ కూడా బౌలింగ్ చేయలేదు.
ఇదే విషయమై సన్ రైజర్స్ హైదరాబాద్ హెడ్ కోచ్ టామ్ మూడీ మాట్లాడుతూ... ‘దురదృష్టవశాత్తూ సుందర్ కుడి చేతికి మళ్లీ గాయమైంది. ప్రస్తుతం అతడు బౌలింగ్ చేసే స్థితిలో లేడు. అయితే అతడికి బ్యాండేజ్ వేసి చికిత్స చేసేంత గాయమైతే లేదు.
కానీ మేం తర్వాత ఢిల్లీ క్యాపిటల్స్ తో ఆడబోయే మ్యాచ్ కు మాత్రం సుందర్ దూరమయ్యే అవకాశాలున్నాయి. అతడు దూరమైతే ఆ ప్రభావం జట్టు మీద తీవ్రంగా పడుతుంది. మా జట్టుకు అతడు కీలక బౌలర్..’అని తెలిపాడు.
సుందర్ తో పాటు నటరాజన్ కూడా గాయపడినట్టు తెలుస్తున్నది. అయితే నట్టూకు అయిన గాయం అంత పెద్దదేమీ కాదని తెలిసింది. ఇక చెన్నైతో మ్యాచ్ లో సన్ రైజర్స్ బౌలింగ్ అత్యంత చెత్తగా సాగింది. ఒక్క భువీ తప్ప మిగిలిన బౌలర్లంతా భారీగా పరుగులిచ్చుకున్నారు.